ತಾಲೂಕಿನ ಬರ್ಗಿಯಲ್ಲಿ ಗುರುವಾರ ಬೆಳಗ್ಗೆ ಗುಡ್ಡ ಕುಸಿತವಾಗಿ ಹೆದ್ದಾರಿಯಲ್ಲಿ ಒಮ್ಮುಖ ಸಂಚಾರ ನಿಗದಿಸಲಾಗಿದೆ. ಎಲ್ಲಕ್ಕಿಂತ ಮುಖ್ಯವಾಗಿ ತಂಡ್ರಕುಳಿ ಸನಿಹದ ದೀವಗಿಯಲ್ಲಿ ಬರೋಬ್ಬರಿ 200 ಅಡಿಯಷ್ಟು ಎತ್ತರದ ದರೆಯೊಂದು ಸಂಭವನೀಯ ದೊಡ್ಡ ಪ್ರಮಾಣದ ಕುಸಿತದ ಅಪಾಯದಲ್ಲಿದೆ. ಈ ದರೆಯ ಅಂಚಿನಲ್ಲಿ ಹೈಟೆನ್ಶನ್ ವಿದ್ಯುತ್ ಸಂಪರ್ಕದ ಕಂಬವೂ ಇದೆ. ದರೆಯ ಕೆಳಭಾಗದಲ್ಲಿ ಚತುಷ್ಪಥದ ಅಂಚಿಗೆ ಎರಡೂ ದಿಕ್ಕಿನಲ್ಲಿ ಹತ್ತಾರು ಜನವಸತಿ ಇದೆ. ಇಲ್ಲಿ ಗುಡ್ಡದಂಚಿನ ಸಂಚಾರ ಭಯಹುಟ್ಟಿಸುತ್ತದೆ. ಇಲ್ಲಿನ ಗುಡ್ಡಕುಸಿತದ ಅಪಾಯದ ಬಗ್ಗೆ ಹಲವಾರು ಬಾರಿ ಸರ್ಕಾರದ, ಜಿಲ್ಲಾಡಳಿತದ ಗಮನ ಸೆಳೆಯಲಾಗಿದೆ. ಶಾಸಕ ದಿನಕರ ಶೆಟ್ಟಿ ಅಧಿವೇಶನದಲ್ಲೂ ಪ್ರಸ್ತಾಪಿಸಿದ್ದಾರೆ. ಮುಂಜಾಗರೂಕತೆಯಿಂದ ಸೂಕ್ತ ಕ್ರಮಕೈಗೊಳ್ಳಲು ಕೋರಿದ್ದಾರೆ. ದೀವಗಿಯಲ್ಲಿ ಮಾತ್ರವಲ್ಲದೇ ಮಿರ್ಜಾನದ ಖೈರೆ ಕ್ರಾಸ್ ಬಳಿಯೂ ಇಂಥದೇ ಸಮಸ್ಯೆ ಇದೆ.
ನಡೆದಿಲ್ಲ ಮಣ್ಣಿನ ಹಿಡಿತ, ಜಾರಿಕೆ ಸಾಮರ್ಥ್ಯ ಪರೀಕ್ಷೆ
ರಸ್ತೆ ನಿರ್ವಿುಸುವಾಗ ಪ್ರತಿ ಗುಡ್ಡ ಅಗೆಯುವಾಗಲೂ ಅಲ್ಲಿ ಒಂದು ಮೀಟರ್ ಆಳದ ಮಣ್ಣನ್ನು ತೆಗೆದುಕೊಂಡು ಹೋಗಿ ಅನಿಯಮಿತ ಸಂಕೋಚನ ಪರೀಕ್ಷೆ ಮಾಡಬೇಕಾಗುತ್ತದೆ. ಇದು ಅತ್ಯಂತ ಕಡಿಮೆ ವೆಚ್ಚದ ಸುಲಭದ ಪರೀಕ್ಷೆಯಾದೆ. ಇದರಿಂದ ಗುಡ್ಡದ ಮಣ್ಣಿನ ಹಿಡಿತ ಮತ್ತು ಜಾರಿಕೆ ಸಾಮರ್ಥ್ಯ ತಿಳಿಯುತ್ತದೆ. ಈ ಪರೀಕ್ಷೆಯ ಆಧಾರದಲ್ಲಿ ಗುಡ್ಡದ ಬದಿಯನ್ನು ಎಷ್ಟು ಇಳಿಜಾರು ಮಾಡಿದರೆ ಸುರಕ್ಷಿತ ಎಂದು ನಿರ್ಧರಿಸಬಹುದಾಗಿದೆ. ಒಂದೊಮ್ಮೆ ಅಷ್ಟೊಂದು ಗುಡ್ಡ ಅಗೆಯಲು ಸಾಧ್ಯವಿಲ್ಲದಿದ್ದರೆ ಸೂಕ್ತ ಕಾಂಕ್ರೀಟ್ ತಡೆಗೋಡೆ ನಿರ್ವಿುಸಬೇಕಾಗುತ್ತದೆ. ಆದರೆ, ಕಾರವಾರದಿಂದ ಭಟ್ಕಳ ತುದಿಯವರೆಗೆ ಎಲ್ಲಿಯೂ ಇಂಜಿನಿಯರಿಂಗ್ ಕಲಿಕೆಯಲ್ಲಿ ಬರುವ ಮಣ್ಣಿನ ಯಂತ್ರಶಾಸ್ತ್ರದ ಪಾಠ ವಾಸ್ತವದಲ್ಲಿ ಬಳಕೆಯೇ ಆಗಿಲ್ಲ ಎನ್ನಬಹುದಾಗಿದೆ. ದರೆಗೆ ಕಾಂಕ್ರೀಟ್ ತಡೆಗೋಡೆ ಎಲ್ಲಿಯೂ ಇಲ್ಲ. ತಂಡ್ರಕುಳಿ, ಖೈರೆಯಲ್ಲಿ ಗುಡ್ಡ ಕುಸಿತದ ಬಳಿಕ ಹಚ್ಚಿದ ಸಿಮೆಂಟ್ ತೇಪೆಯೂ ಅಲ್ಲಲ್ಲಿ ಬಿರುಕಾಗಿ ಉದುರುತ್ತಿರುವುದನ್ನು ಆಡಳಿತ ವ್ಯವಸ್ಥೆ ಗಮನಿಸಬೇಕಿದೆ.
