ಕೋಟಿ-ಕೋಟಿ ಗುತ್ತಿಗೆ: ಗುತ್ತಿಗೆದಾರರಾದ ಡಿವೈ ಉಪ್ಪಾರ್, ಸೋಮಶೇಖರ್, ರಾಹುಲ್ ಎಂಟರ್ ಪ್ರೖೆಸಸ್ ಮಾಲೀಕ ರಾಹುಲ್, ಪ್ರಭಾವಿ ರಾಜಕಾರಣಿ ಆಪ್ತ ಉಮೇಶ್ ಬಳಿ ಅಧಿಕ ಪ್ರಮಾಣದ ಅಕ್ರಮ ಆಸ್ತಿ ಪತ್ತೆಯಾಗಿದೆ. ಗುತ್ತಿಗೆದಾರ ಡಿ.ವೈ ಉಪ್ಪಾರ್ ಹಲವು ನೀರಾವರಿ ಯೋಜನೆ ಗುತ್ತಿಗೆ ಪಡೆದಿದ್ದರು. ಉಪ್ಪಾರ್ ಗುತ್ತಿಗೆ ಪಡೆದ ಕಾಮಗಾರಿಗಳ ವಿರುದ್ದ ಈ ಹಿಂದೆಯೂ ಹಲವು ಆರೋಪ ಕೇಳಿ ಬಂದಿತ್ತು. ಹೇಮಾವತಿ ಎಡದಂಡೆ ನಾಲೆ-562 ಕೋಟಿ, ಸಾಹುಕಾರ್ ಚೆನ್ನಯ್ಯ ನಾಲೆ ಆಧುನೀಕರಣ-809 ಕೋಟಿ, ಘಟಪ್ರಭ ಎಡದಂಡೆ ಕಾಲುವೆ ಆಧುನೀಕರಣ - 573 ಕೋಟಿ ರೂ., 160 ಕೆರೆ ತುಂಬಿಸುವ ಯೋಜನೆ - 333 ಕೋಟಿ ರೂ., ನಾರಾಯಣಪುರ ಬಲದಂಡೆ ಕಾಲುವೆ ಆಧುನೀಕರಣ-750 ಕೋಟಿ ರೂ., ಮಲಪ್ರಭಾ ಕಾಲುವೆ ದುರಸ್ತಿ-1 ಸಾವಿರ ಕೋಟಿ ರೂ. ಸೇರಿ ಸಾವಿರಾರು ಕೋಟಿ ರೂ. ಮೌಲ್ಯದ ಗುತ್ತಿಗೆ ಹಿಡಿದಿದ್ದರು. ಈ ಕಾಮಗಾರಿಯಲ್ಲೂ ಬೋಗಸ್ ಬಿಲ್ ಮೂಲಕ ಅಕ್ರಮ ಎಸಗಿರುವ ಆರೋಪ ಕೇಳಿ ಬಂದಿದೆ. ಸೋಮಶೇಖರ್ ಕೆಲ ವರ್ಷಗಳಿಂದ ನೀರಾವರಿ ಹಾಗೂ ಹೆದ್ದಾರಿ ಯೋಜನೆಗಳಲ್ಲಿ ನೂರಾರು ಕೋಟಿ ರೂ. ಮೌಲ್ಯದ ಟೆಂಡರ್ ಪಡೆದು ಇದೇ ಮಾದರಿಯಲ್ಲಿ ತೆರಿಗೆ ವಂಚಿಸಿರುವುದು ಗೊತ್ತಾಗಿದೆ. ದಾಳಿಗೊಳಗಾದ ಗುತ್ತಿಗೆದಾರರಿಗೆ ಸರ್ಕಾರ ದೊಡ್ಡ ಯೋಜನೆಗಳ ಟೆಂಡರ್ ಸಿಗಲು ಸಹಕರಿಸಿದ್ದ ಉಮೇಶ್, ಇದಕ್ಕಾಗಿ ಅವರಿಂದ ಕೋಟ್ಯಂತರ ರೂ. ಪಡೆದಿದ್ದಾರೆ ಎನ್ನಲಾಗಿದೆ. ಟೆಂಡರ್ ಕಾಮಗಾರಿಗೆ ಸಲಕರಣೆ ಪೂರೈಸುತ್ತಿದ್ದ ರಾಹುಲ್ ಎಂಟರ್ ಪ್ರೖೆಸಸ್ ಸಂಸ್ಥೆ ಅವರ ಜತೆಗೆ ಒಳ ಒಪ್ಪಂದ ಮಾಡಿಕೊಂಡು ನಕಲಿ ಬಿಲ್ ತಯಾರಿಸಿ ತೆರಿಗೆ ವಂಚಿಸಿದೆ. ಐಟಿ ಅಧಿಕಾರಿಗಳು ಪತ್ತೆಯಾದ ಸಾಕ್ಷ್ಯಾಧಾರಗಳ ಆಧಾರದ ಮೇಲೆ ತನಿಖೆ ಮುಂದುವರಿಸಿದ್ದಾರೆ.
