ಪಟ್ಟಣದ ಪ್ರಮುಖ ರಸ್ತೆಗಳಲ್ಲಿರುವ ಖಾಸಗಿ ವಾಣಿಜ್ಯ ಮಳಿಗೆಗಳಿಗೆ ಭಾರಿ ಬೇಡಿಕೆ ಇದೆ. ಲಕ್ಷಾಂತರ ರೂ.ಗಳ ಮುಂಗಡ ಪಾವತಿಯ ಜತೆಗೆ ಕನಿಷ್ಠ 10ಸಾವಿರದಿಂದ 25ಸಾವಿರ ರೂ.ಗಳ ವರೆಗೆ ಮಾಸಿಕ ಬಾಡಿಗೆ ಪಾವತಿಸಿ ವ್ಯಾಪಾರ ವಹಿವಾಟು ನಡೆಸುವ ಅನಿವಾರ್ಯತೆ ಇದೆ. ಖಾಸಗಿ ಮಳಿಗೆಗಳಿಗೆ ಹೋಲಿಸಿದರೆ ಗಜೇಂದ್ರಗಡ ಹಾಗೂ ಬಸ್ ನಿಲ್ದಾಣದ ಪ್ರಮುಖ ರಸ್ತೆಗಳು ಸಂಧಿಸುವ ಹೃದಯ ಭಾಗದಲ್ಲಿರುವ ತಾಪಂ ಮಳಿಗೆಗಳ ಬಾಡಿಗೆ ತೀರಾ ಕಡಿಮೆ ಇದೆ. ಮಳಿಗೆಗಳ ಗಾತ್ರ ಆಧರಿಸಿ ಕನಿಷ್ಠ 500ರೂ.ಗಳಿಂದ ಗರಿಷ್ಠ 7ಸಾವಿರ ರೂ.ಗಳ ವರಗೆ ಬಾಡಿಗೆ ನಿಗದಿ ಮಾಡಲಾಗಿದೆ. ಆದಾಗ್ಯೂ ಬಹುತೇಕರು ಸಕಾಲಕ್ಕೆ ಬಾಡಿಗೆ ಪಾವತಿಸದೆ ಉದಾಸೀನ ತೋರುತ್ತಿದ್ದಾರೆ. ಕೆಲವರು ವರ್ಷಗಟ್ಟಲೇ ಬಾಡಿಗೆ ಪಾವತಿಸದೆ ಮುಂದುವರಿದಿದ್ದು, ಇನ್ನೂ ಕೆಲವರು ದೀರ್ಘ ಕಾಲದ ಬಾಕಿ ಇರಿಸಿಕೊಂಡಿದ್ದಾರೆ. ತಾಪಂ ಅಧಿಕಾರಿಗಳು ನೀಡಿರುವ ಬಾಡಿಗೆ ವಸೂಲಿಯ ಜೂ.ಅಂತ್ಯದ ವರೆಗಿನ ಮಾಹಿತಿಯಂತೆ 54ಮಳಿಗೆಗಳ ಒಟ್ಟು 22.59ಲಕ್ಷ ರೂ. ಬಾಡಿಗೆ ಬಾಕಿ ಇದೆ. ಅಚ್ಚರಿ ಎಂದರೆ ಕೆಲವರು 60ಸಾವಿರದಿಂದ 5ಲಕ್ಷ ರೂ.ಗಳ ವರೆಗೆ ಬಾಕಿ ಇರಿಸಿಕೊಂಡಿದ್ದಾರೆ.
