ಗಣತಿ 'ಆ್ಯಪ್​' ಫಜೀತಿ...!

ಸಮೀಕ್ಷಾ ಕಾರ್ಯಕ್ಕೆ ಕೈಕೊಟ್ಟ ತಂತ್ರಜ್ಞಾನ

4 ದಿನ ಕಳೆದರೂ ಪ್ರಾರಂಭವಿಲ್ಲ ಅಭಿಯಾನ

ಪ್ರಶಾಂತ ಭಾಗ್ವತ ಉಡುಪಿ

ರಾಜ್ಯ ಹಿಂದುಳಿದ ವರ್ಗಗಳ ಆಯೋಗದಿಂದ ಸೆ.22ರಿಂದ ಆರಂಭಗೊಂಡಿದ್ದ ಸಾಮಾಜಿಕ, ಆರ್ಥಿಕ ಹಾಗೂ ಶೈಕ್ಷಣಿಕ ಸಮೀಕ್ಷೆ ಇನ್ನೂ ಸಮರ್ಪಕ ಹಾಗೂ ಪೂರ್ಣರೂಪದಲ್ಲಿ ಎಲ್ಲಿಯೂ ಆರಂಭವೇ ಆಗಿಲ್ಲ.

ನಿಯೋಜನೆಗೊಂಡ ಶಿಕ್ಷಕರಿಗೆ ಮನೆಗಳ ಪಟ್ಟಿಯನ್ನೂ ನೀಡಿಲ್ಲ. ಸಮೀಕ್ಷೆಗಾಗಿ ನೀಡಿರುವ ಮೊಬೈಲ್​ ಆ್ಯಪ್​ನಲ್ಲಿ ತಾಂತ್ರಿಕ ದೋಷ ಕಂಡುಬಂದಿದ್ದು, ಮಾಹಿತಿ ಅಪ್​ಡೇಟ್​ ಮಾಡುವ ಆ್ಯಪ್​ ತೆರೆದುಕೊಳ್ಳುತ್ತಿಲ್ಲ. ಇದು ಗಣತಿಗೆಂದು ನೇಮಿಸಲ್ಪಟ್ಟಿರುವ ಶಿಕ್ಷಕರಿಗೂ ಕಿರಿಕಿರಿ ಆಗತೊಡಗಿದೆ.

ಶೇ.5ರಷ್ಟು ಸಮೀಕ್ಷೆ

ಉಡುಪಿ ಜಿಲ್ಲೆಯಲ್ಲಿ ಗಣತಿ ಆರಂಭಗೊಂಡು ಗುರುವಾರ(ಸೆ.25)ಕ್ಕೆ ನಾಲ್ಕು ದಿನ ಕಳೆದರೂ ಸಮೀಕ್ಷೆ ಸರಿಯಾಗಿ ಆರಂಭಗೊಂಡಿಲ್ಲ. ಸೆ.22ರಿಂದ ಅ.7ರ ವರೆಗೆ ಸಮೀಕ್ಷೆ ಪೂರ್ಣಗೊಳಿಸಲು ಗಣತಿದಾರಿಗೆ ಗಡುವು ನೀಡಲಾಗಿದೆ. ಪ್ರತಿ ಗಣತಿದಾರರಿಗೆ 150 ಮನೆಯಲ್ಲಿ ಸಮೀಕ್ಷೆ ನಡೆಸುವಂತೆ ಸೂಚಿಸಲಾಗಿದೆ. ಆದರೆ, ಸರ್ಕಾರ ನೀಡಿರುವ ಮೊಬೈಲ್​ ಆ್ಯಪ್​ ಕೈಕೊಟ್ಟಿದೆ. ಹೀಗಾಗಿ ಸಮೀಕ್ಷೆ ಸರಿಯಾಗಿ ನಡೆದಿಲ್ಲ. ಈವರೆಗೆ ಕೇವಲ ಶೇ.5ರಷ್ಟು ಮಾತ್ರ ಸಮೀಕ್ಷೆ ಆಗಿರಬಹುದು ಎಂದು ಉಡುಪಿ ಜಿಲ್ಲಾ ಪ್ರಾಥಮಿಕ ಶಾಲಾ ಶಿಕ್ಷಕರ ಸಂಘ ಮಾಹಿತಿ ನೀಡಿದೆ.

700ಕ್ಕೂ ಅಧಿಕ ಗಣತಿದಾರರ ಕೊರತೆ

ರಾಜ್ಯ, ಜಿಲ್ಲೆಯಲ್ಲಿ ಸಹಾಯವಾಣಿ ಸ್ಥಾಪನೆ

ಸಮೀಕ್ಷೆಗೆ ಸಂಬಂಧಿಸಿದಂತೆ ಸಾರ್ವಜನಿಕರಿಗೆ ಮಾಹಿತಿ ನೀಡಲು ರಾಜ್ಯ ಹಾಗೂ ಜಿಲ್ಲಾ ಮಟ್ಟದಲ್ಲಿ ಸಹಾಯವಾಣಿ ಪ್ರಾರಂಭಿಸಲಾಗಿದೆ. ರಾಜ್ಯ-8050770004, ಉಡುಪಿ ಜಿಲ್ಲಾ ದೂ.ಸಂ.- 0820-2574881. ತಾಲೂಕು ಮಟ್ಟದಲ್ಲಿ ಉಡುಪಿ, ಬ್ರಹ್ಮಾವರ ಹಾಗೂ ಕಾಪು ತಾಲೂಕಿಗೆ ಉಡುಪಿಯ ತಾಪಂ ಆವರಣದಲ್ಲಿರುವ ತಾಲೂಕು ಹಿಂದುಳಿದ ವರ್ಗಗಳ ಕಲ್ಯಾಣಾಧಿಕಾರಿಗಳ ಕಚೇರಿ ದೂ.ಸಂ.- 0820-2520739, ಕುಂದಾಪುರ ಹಾಗೂ ಬೈಂದೂರು ತಾಲೂಕಿಗೆ ಕುಂದಾಪುರ ಟೌನ್​ ಬಿಸಿಎಂ ಮೆಟ್ರಿಕ್​ ಪೂರ್ವ ಬಾಲಕರ ವಿದ್ಯಾರ್ಥಿ ನಿಲಯದ ತಾಲೂಕು ಹಿಂದುಳಿದ ವರ್ಗಗಳ ಕಲ್ಯಾಣಾಧಿಕಾರಿಗಳ ಕಚೇರಿ ಮೊ.ಸಂ.- 9972294198, ಕಾರ್ಕಳ ಹಾಗೂ ಹೆಬ್ರಿ ತಾಲೂಕಿಗೆ ಕಾರ್ಕಳದ ಕೆಇಬಿ ಸಮೀಪದ ಡಿ.ದೇವರಾಜ ಅರಸು ಭವನ ದೂ.ಸಂ.- 0825-8298610 ಸಂಪರ್ಕಿಸಬಹುದಾಗಿದೆ.