ಬೆಳೆ ಉಳಿಸಿಕೊಳ್ಳಲು ಟ್ಯಾಂಕರ್ ನೀರಿಗೆ ಮೊರೆ

ಲಕ್ಷ್ಮೇಶ್ವರ: ಒಂದೂವರೆ ತಿಂಗಳಿಂದ ತಾಲೂಕಿನಲ್ಲಿ ಮಳೆಯಾಗದೆ ಬಹುತೇಕ ಬೆಳೆಗಳು ಒಣಗಿ ಬರಗಾಲ ಆವರಿಸಿದೆ. ಜೂನ್‌ನಲ್ಲಿ ಮಳೆಯೇ ಆಗಲಿಲ್ಲ. ಜುಲೈನಲ್ಲಾದ ಮಳೆಗೆ ಬಿತ್ತನೆ ಮಾಡಿರುವ ಬೆಳೆ ಹುಲುಸಾಗಿ ಬೆಳೆದಿರುವುದನ್ನು ಕಂಡು ರೈತರು ಸಮಾಧಾನಪಟ್ಟಿದ್ದರು. ಆದರೆ ಜುಲೈ 25ರಿಂದ ಇಲ್ಲಿಯವರೆಗೂ ಮಳೆಯೇ ಆಗದೆ ಬಿಸಿಲ ತಾಪದಿಂದ ಬೆಳೆಗಳು ಒಣಗಿ ರೈತರಲ್ಲಿ ಬದುಕಲ್ಲಿ ಬರಸಿಡಿಲು ಬಡಿದಂತಾಗಿದೆ.

ತಾಲೂಕಿನಲ್ಲಿ ಒಟ್ಟು 30,242 ಹೆಕ್ಟೇರ್(ಶೇ.84) ಬಿತ್ತನೆಯಾಗಿದೆ. ಅದರಲ್ಲಿ ಗೋವಿನ ಜೋಳ 23,200 ಹೆಕ್ಟೇರ್, 1250 ಹೆಕ್ಟೇರ್ ಪ್ರದೇಶದಲ್ಲಿ ಹೆಸರು, 3620 ಹೆಕ್ಟೇರ್‌ನಲ್ಲಿ ಶೇಂಗಾ, ಉಳ್ಳಾಗಡ್ಡಿ, ಮೆಣಸಿನಕಾಯಿ, ಹತ್ತಿ ಇನ್ನಿತರ ಬೆಳೆ ಬೆಳೆಯಲಾಗಿದೆ.

ಮಳೆರಾಯನಿಗೆ ಅಂಗಲಾಚುತ್ತಿದೆ ರೈತ ಸಮುದಾಯ: ಪ್ರಮುಖ ಮಳೆಗಳು ಈ ಬಾರಿ ಕೈಕೊಟ್ಟಿದ್ದು, ಎಲ್ಲ ಬೆಳೆಗಳೂ ಒಣಗಿವೆ. ತಾಲೂಕಿನಲ್ಲಿ ಮಸಾರಿ ಜಮೀನು ಹೊಂದಿರುವ ಲಕ್ಷ್ಮೇಶ್ವರ, ಅಕ್ಕಿಗುಂದ, ಬಟ್ಟೂರ, ಸೂಗಿವಾಳ, ಸೂರಣಗಿ, ಬಾಲೇಹೊಸೂರ, ಹರದಗಟ್ಟಿ, ಆದ್ರಳ್ಳಿ, ದೊಡ್ಡೂರ, ಯಲ್ಲಾಪುರ ಸೇರಿ ಅನೇಕ ಭಾಗದ ರೈತರು ಒಣಗಿರುವ ಬೆಳೆ ಹರಗುತ್ತಿದ್ದಾರೆ. ಕೆಲವು ರೈತರು ಮಳೆ ಬರುವವರೆಗೂ ಬೆಳೆ ಉಳಿಸಿಕೊಳ್ಳಬೇಕೆಂದು ಟ್ಯಾಂಕರ್ ಮೂಲಕ, ಚರಂಡಿ, ಹಳ್ಳ, ಇತರೇ ಮೂಲಗಳಿಂದ ನೀರು ಹಾಕುತ್ತಿದ್ದಾರೆ.