ಮೇ 2ರಿಂದ ಗ್ರಾಪಂ ಮಟ್ಟದಲ್ಲಿ ಬೇಸಿಗೆ ಶಿಬಿರ: ಜಿಪಂ ಸಿಇಒ ಕೆ.ಆರ್.ನಂದಿನಿ ಮಾಹಿತಿ

ಮಂಡ್ಯ: ಬೇಸಿಗೆ ಹಿನ್ನೆಲೆಯಲ್ಲಿ ಮಕ್ಕಳಿಗೆ ವಿಶೇಷ ಚಟುವಟಿಕೆ ಮೂಲಕ ಮನರಂಜನೀಯವಾಗಿ ಕಳೆಯುವ ನಿಟ್ಟಿನಲ್ಲಿ

ಜಿಲ್ಲಾ ಪಂಚಾಯಿತಿ ವತಿಯಿಂದ ಗ್ರಾಮ ಪಂಚಾಯಿತಿ ಮಟ್ಟದಲ್ಲಿ ಶಿಬಿರ ಆಯೋಜಿಸಲಾಗಿದೆ.

ಶಾಲಾ ಶಿಕ್ಷಣ ಇಲಾಖೆ ಸಹಯೋಗದೊಂದಿಗೆ ಮೇ 2 ರಿಂದ 26 ರವರೆಗೆ 3 ರಿಂದ 8ನೇ ತರಗತಿ ಮಕ್ಕಳಿಗೆ ಜಿಲ್ಲೆಯ ಎಲ್ಲ ಗ್ರಾಮ ಪಂಚಾಯತಿ ಮಟ್ಟದಲ್ಲಿ 21 ದಿನಗಳ ಬೇಸಿಗೆ ಶಿಬಿರವನ್ನು‌ ಅರಿವು‌ ಕೇಂದ್ರಗಳಲ್ಲಿ ಆಯೋಜಿಸಲಾಗಿದೆ.

ಗ್ರಾಮೀಣ ಪ್ರದೇಶದಲ್ಲಿರುವ ಮಕ್ಕಳು ತಮ್ಮ ಬೇಸಿಗೆ ರಜೆಯನ್ನು ಮನರಂಜನೀಯವಾಗಿ ಹಾಗೂ ಪರಿಣಾಮಕಾರಿಯಾಗಿ ಬಳಸಿಕೊಳ್ಳಲು ಶಿಬಿರ ಆಯೋಜಿಸಲಾಗಿದೆ. ಇಲ್ಲಿ ಓದುವ, ಬರೆಯುವ, ಅಂಕಿ ಸಂಖ್ಯೆ ವಿಜ್ಞಾನ ವಿಷಯಗಳು, ನಾಯಕತ್ವ ಮತ್ತು ಸಂವಹನ ಕೌಶಲ ಅಭಿವೃದ್ಧಿಪಡಿಸುವ ಉದ್ದೇಶವನ್ನು ಹೊಂದಲಾಗಿದೆ. ಪರಿಸರ ಕಾಳಜಿ, ಸಾಮಾಜಿಕ ಕಾಳಜಿ ಬೆಳೆಸುವುದು ಮತ್ತು ಸ್ಥಳೀಯ ಸಂಸ್ಕೃತಿ, ಜೀವನ ಶೈಲಿ, ಇತಿಹಾಸ ಅಂಶಗಳನ್ನು ತಿಳಿಯುವಂತೆ ಮಾಡುವುದು ಹಾಗೂ ಮಕ್ಕಳಲ್ಲಿರುವ ಸೃಜನಾತ್ಮಕ ಸಾಮರ್ಥ್ಯವನ್ನು ಅಭಿವೃದ್ಧಿಪಡಿಸುವುದು  ಬೇಸಿಗೆ ಶಿಬಿರದ ಆಶಯವಾಗಿರುತ್ತದೆ.

2ರಂದು  ಸ್ಥಳೀಯ ನಾಯಕರಿಂದ ಉದ್ಘಾಟನಾ ಕಾರ್ಯಕ್ರಮ ನೆರವೇರಿಸಿ, ಆಯ್ಕೆಯಾದ ಮಕ್ಕಳಿಗೆ ಶಿಬಿರದ ನಿಯಮವನ್ನು ತಿಳಿಸಿ ಕೊಡುವುದು ಹಾಗೂ ಮಕ್ಕಳ ಪರಸ್ಪರ ಪರಿಚಯ ಮಾಡಿಕೊಳ್ಳುವುದು, ಆಣೆ ಕಲ್ಲು, ಹುಲಿ ಕುರಿ ಆಟ ಆಡಿಸುವುದು. ನಂತರದ ದಿನದಲ್ಲಿ ಮಕ್ಕಳ ಕುಟುಂಬಗಳ ಪರಿಚಯ ಹಾಗೂ "ನನ್ನ ಕನಸಿನ ಊರು" ವಿಷಯದ ಕುರಿತು ಪ್ರತಿಯೊಬ್ಬರು ಮಾತನಾಡಲು ಅವಕಾಶ ಕಲ್ಪಿಸಲಾಗುವುದು. ಮಕ್ಕಳಿಗೆ ಯೋಗಭ್ಯಾಸ ಮಾಡಿಸುವುದು, ಮೂರರಿಂದ ಐದನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿರುವ ಮಕ್ಕಳಿಗೆ ಬಣ್ಣಗಳ ಪರಿಚಯದ ಆಟವಾಡಿಸುವುದು. 6 ರಿಂದ 8 ನೇ ತರಗತಿ ಮಕ್ಕಳಿಗೆ ಪದಗಳ ಸರಣಿ ಬೆಳೆಸುವ ಆಟವಾಡಿಸುವುದು, ಮೂರರಿಂದ ಐದನೇ ತರಗತಿ ಹಾಗೂ ಆರರಿಂದ ಎಂಟನೇ ತರಗತಿಯ ಮಕ್ಕಳನ್ನು ವಿವಿಧ ಗುಂಪುಗಳಾಗಿ ರಚಿಸಿ ಕಬಡ್ಡಿ ಆಟ ಆಡಿಸಲಾಗುವುದು. ದಿನಪತ್ರಿಕೆಗಳಲ್ಲಿ ಬರುವ ಚಿತ್ರಗಳನ್ನು ಕೊಠಡಿಯಲ್ಲಿ ಹಾಕುವುದು,  ಮಕ್ಕಳು ತಮಗಿಷ್ಟದ ಚಿತ್ರವನ್ನು ಆಯ್ದು ಅದಕ್ಕೆ ತಮ್ಮದೇ ಆದ ಕಥೆಯನ್ನು ಕಟ್ಟಿ ಹೇಳಲು ಸಮಯಾವಕಾಶ ನೀಡುವುದು, ನಂತರ ಕಣ್ ಕಟ್ಟಿ ಮಡಿಕೆ ಹೊಡೆಯುವ ಆಟೋಟವಿರಲಿದೆ.

ಇದಲ್ಲದೆ ಭಾಷಾ ಆಟಗಳಾದ ಪದಕಟ್ಟು,  ಪದ ಅಂತ್ಯಾಕ್ಷರಿ ಗಳನ್ನು ಆಡಿಸಲಾಗುವುದು, ನಂತರ ಲಗೋರಿ ಆಟ, ಹುಲಿ ಹಸು ಆಟ, ಗ್ರಾಮ ಪಂಚಾಯಿತಿ ಮತ್ತು ಶಾಲಾ ಗ್ರಂಥಾಲಯದಲ್ಲಿರುವ ಪುಸ್ತಕಗಳನ್ನು ಬಳಸಿಕೊಂಡು ಗಟ್ಟಿ ಧ್ವನಿಯಲ್ಲಿ ಸ್ವರಭಾರದೊಂದಿಗೆ ಮಕ್ಕಳು ಪುಸ್ತಕ ಓದುವ ಹವ್ಯಾಸ ನಡೆಸಲಾಗುವುದು. ನಂತರ ಟ್ರಷರ್ ಹಂಟ್ ( ನಿಧಿ ಶೋಧ) ಆಟ, ವಿವಿಧ ಕ್ಷೇತ್ರಗಳಲ್ಲಿ ಸಾಧನೆಗೈದ ವ್ಯಕ್ತಿಗಳ ಚಿತ್ರವನ್ನು ಪ್ರದರ್ಶನ ಮಾಡಿ ಅವರ ವ್ಯಕ್ತಿ ಪರೀಕ್ಷೆಯೊಂದಿಗೆ ಪ್ರಯಾಣಾತ್ಮಕ ಚರ್ಚೆ, ಮಕ್ಕಳಿಗೆ ಗುಡ್ ಟಚ್ ಮತ್ತು ಬ್ಯಾಡ್ ಟಚ್ ಬಗ್ಗೆ ವಿಡಿಯೋ ಪ್ರದರ್ಶನ ಏರ್ಪಡಿಸಿ ಅರಿವು ಮೂಡಿಸುವುದು.

ಹಳೆ ದಿನಪತ್ರಿಕೆಗಳನ್ನು ಬಳಸಿ ವಿವಿಧ ಆಕೃತಿಗಳ ರಚನೆ ಮತ್ತು ವಿವಿಧ ವಸ್ತುಗಳನ್ನು ರಚಿಸುವುದು, ಆತ್ಮರಕ್ಷಣೆ ಕೌಶಲ  ವೃದ್ಧಿಸಿಕೊಳುವ ಕುರಿತು ಮಾಹಿತಿ ನೀಡಲಾಗುವುದು. ಗಣಿತಕ್ಕೆ ಸಂಬಂಧಿಸಿದ ಚಟುವಟಿಕೆಗಳನ್ನು ಮಾಡಿಸಲಾಗುವುದು, ನಂತರ ಸಂಖ್ಯಾ ಚಪ್ಪಾಳೆ ಆಟ, ವಿಜ್ಞಾನದೊಂದಿಗೆ ಮೋಜು ಸರಳ ಪ್ರಯೋಗ ಕಾರ್ಯಕ್ರಮದಡಿ ಸ್ಥಳೀಯವಾಗಿ ಲಭ್ಯ ಇರುವ ವಸ್ತುಗಳನ್ನು ಬಳಸಿಕೊಂಡು ತೇಲುವ ಮುಳುಗುವ ಕರಗುವ ಕರಗಲಾಗದ ವಸ್ತುಗಳನ್ನು ತಿಳಿಸುವ ಪ್ರಯೋಗ ಮಾಡುವುದು, ಗ್ರಾಮ ಪಂಚಾಯಿತಿ ವತಿಯಿಂದ ಎಲ್ಲಾ ಸದಸ್ಯರು ಅಧಿಕಾರಿಗಳು ಸೇರಿ ಮಕ್ಕಳ ಗ್ರಾಮ ಸಭೆ ನಡೆಸುವುದು, ಸ್ಥಳೀಯವಾಗಿ ಭೇಟಿ ನೀಡಲು ಸೂಕ್ತ ಇರುವ ಜಾಗಗಳಾದ ಅಂಚೆ ಕಚೇರಿ, ಗ್ರಾಮ ಪಂಚಾಯಿತಿ, ಹಾಲಿನ ಡೈರಿ, ಬ್ಯಾಂಕ್ ಇತ್ಯಾದಿಗಳ ಕಚೇರಿಗೆ ಕ್ಷೇತ್ರ ಭೇಟಿ,

ಹಾಡು ನೃತ್ಯ ಅಭಿನಯ ಗೀತೆಗಳನ್ನು ಆಡಿಸುವುದು, ಗೀತೆಗಳು ನೃತ್ಯ, ಬಾಲ್ಯ ವಿವಾಹ, ಮಕ್ಕಳ ಹಕ್ಕುಗಳ ಕುರಿತು ಅರಿವು ಮೂಡಿಸುವುದು. ಪ್ರಾಥಮಿಕ ಆರೋಗ್ಯ ಕೇಂದ್ರದಿಂದ ವೈದ್ಯರನ್ನು ಆಹ್ವಾನಿಸಿ ಮಕ್ಕಳಿಗೆ ಆರೋಗ್ಯ ಮತ್ತು ಶುಚಿತ್ವದ ಕುರಿತು ಮಾಹಿತಿ ನೀಡುವುದು. ಸಮಾರೋಪ ಸಮಾರಂಭ ಮಕ್ಕಳಿಂದಲೇ ಕಾರ್ಯಕ್ರಮ ನಿರ್ವಹಣೆ ಮಾಡಿಸಲಾಗುವುದು.