ಫೇಸ್​ಬುಕ್​ನಲ್ಲಿ ವಿಡಿಯೋ ಹರಿಬಿಟ್ಟು ಆತ್ಮಹತ್ಯೆ

ಆನೇಕಲ್​ : "ಕೊಟ್ಟ ಸಾಲದ ಹಣವನ್ನು ವಾಪಸ್​ ಕೇಳಿದ್ದಕ್ಕೆ ಮಾರಣಾಂತಿಕ ಹಲ್ಲೆ ನಡೆಸಿದ್ದಾರೆ, ಅವರು ನೀಡಿದ ದೈಹಿಕ ಹಾಗೂ ಮಾನಸಿಕ ಹಿಂಸೆಯಿಂದ ಸಾವಿಗೆ ಶರಣಾಗುತ್ತಿದ್ದೇನೆ' ಎಂದು ಫೇಸ್​ಬುಕ್​ನಲ್ಲಿ ವಿಡಿಯೋ ಸಂದೇಶ ರವಾನಿಸಿ ಬಿಜೆಪಿ ಕಾರ್ಯಕರ್ತನೊಬ್ಬ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ.

ಆನೇಕಲ್​ ಠಾಣಾ ವ್ಯಾಪ್ತಿಯಲ್ಲಿ ಶುಕ್ರವಾರ ಈ ಪ್ರಕರಣ ಬೆಳಕಿಗೆ ಬಂದಿದ್ದು, ಪಟ್ಟಣದ ಪ್ರವಿಣ್​ ಗೌಡ(35) ಆತ್ಮಹತ್ಯೆಗೆ ಶರಣಾದವರು. ಪ್ರಕರಣ ಸಂಬಂಧ ಸಮಂದೂರಿನ ಕಿರಣ್​ ಗೌಡ, ಆನೇಕಲ್​ನ ಶ್ರೀನಿವಾಸ್​ಬಾಬು, ಹರೀಶ್​, ಭಾಸ್ಕರ್​, ನಾರಾಯಣಪ್ಪ, ದೊಡ್ಡಹಗಡೆ ಮಧುಗೌಡ, ಭಾಗ್ಯಾ, ಮುನಿರಾಜು ಗೌಡ ಹಾಗೂ ಸರವಣ ಎಂಬುವವರ ವಿರುದ್ಧ ದೂರು ದಾಖಲಾಗಿದೆ.

ಸ್ನೇಹಿತೆಗೆ ಸಾಲ ಕೊಟ್ಟಿದ್ದ!: ವಿಡಿಯೋದಲ್ಲಿ ಉಲ್ಲೇಖಿಸಿರುವ ಸ್ನೇಹಿತೆ ಶ್ವೇತಾ ಹಾಗೂ ಆನೇಕಲ್​ ಪಟ್ಟಣ ಪುರಸಭೆ ಸದಸ್ಯೆ ಭಾಗ್ಯಲ್ಮ, ಆಕೆ ಪತಿ ಶ್ರೀನಿವಾಸ್​ಬಾಬು ಸೇರಿ ಹಲವರ ಹೆಸರನ್ನು ಹೇಳಿರುವ ಪ್ರವಿಣ್​ಗೌಡ, ಸಾಲದ ಹಣ ವಾಪಸ್​ ಕೇಳಿದ್ದಕ್ಕೆ ಸಾಕಷ್ಟು ಕಿರುಕುಳ ನೀಡಿದರು, ಸಾಲದ ಹಣ ವಾಪಸ್​ ಕೊಡಿಸುವಂತೆ ಆನೇಕಲ್​ ಮಂಡಲ ಅಧ್ಯ ಮುನಿರಾಜುಗೌಡನ ಬಳಿ ಸಹಾಯ ಕೋರಿದಾಗ ಮುನಿರಾಜುಗೌಡ ಮಾತುಕತೆಗೆ ಮನೆಗೆ ಕರೆಸಿಕೊಂಡಿದ್ದ, ಅದಾದ ಬಳಿಕ ವಿಲ್ಲಾವೊಂದರಲ್ಲಿ ಮಾತುಕತೆ ನಡೆಸುವ ವೇಳೆ ಪುರಸಭೆ ಸದಸ್ಯೆ ಭಾಗ್ಯಲ್ಮ ಅವರ ಪತಿ ಶ್ರೀನಿವಾಸ್​ಬಾಬು 20ಕ್ಕೂ ಹೆಚ್ಚು ಗೂಂಡಾಗಳೊಂದಿಗೆ ಬಂದು ಮಾರಣಾಂತಿಕ ಹಲ್ಲೆ ನಡೆಸಿದರು, ಒತ್ತಾಯ ಪೂರ್ವಕವಾಗಿ ನನ್ನ ಬಳಿ ಹೇಳಿಕೆಯೊಂದನ್ನು ವಿಡಿಯೋ ಮಾಡಿಕೊಂಡರು ಎಂದು ವಿಡಿಯೋದಲ್ಲಿ ಆರೋಪಿಸಿದ್ದಾರೆ ಎನ್ನಲಾಗಿದೆ. ಕಿರಣ್​ ಗೌಡ ಹೆಸರನ್ನು ವಿಡಿಯೋದಲ್ಲಿ ಪದೇಪದೆ ಉಲ್ಲೇಖಿಸಿರುವ ಪ್ರವಿಣ್​ ಗೌಡ, ಕಿರಣ್​ ಗೌಡ 30ಕ್ಕೂ ಹೆಚ್ಚು ಮಹಿಳೆಯರ ಮೇಲೆ ದೌರ್ಜನ್ಯ ಎಸಗಿ, ಅದೆಲ್ಲವನ್ನೂ ನನ್ನ ಮೇಲೆ ಹಾಕಿದ್ದಾನೆ. ಹಾಗಾಗಿ ಆತನ ವಿರುದ್ಧ ಕ್ರಮ ಜರುಗಿಸಬೇಕು ಎಂದೂ ವಿಡಿಯೋದಲ್ಲಿ ಒತ್ತಾಯಿಸಿದ್ದಾನೆ.

ನ್ಯಾಯಕ್ಕಾಗಿ ಒತ್ತಾಯ : ಪ್ರಕರಣದ ಹಿನ್ನೆಲೆಯಲ್ಲಿ ಆನೇಕಲ್​ ಠಾಣೆ ಮುಂದೆ ನೂರಾರು ಮಂದಿ ಜಮಾಯಿಸಿದ್ದರು. ಸಾವಿಗೆ ನ್ಯಾಯಕೊಡಿಸಬೇಕು. ಅಪರಾಧಿಗಳನ್ನು ಬಂಧಿಸಬೇಕು ಎಂದು ಕುಟುಂಬದವರು ಒತ್ತಾಯಿಸಿದರು. ಪ್ರಾಮಾಣಿಕ ತನಿಖೆ ನಡೆಸುವುದಾಗಿ ಪೊಲೀಸರು ಜನರನ್ನು ಸಮಾಧಾನಗೊಳಿಸಿದರು.