ಸಮಾಜಕ್ಕೆ ಅಗತ್ಯತೆಯಿದೆ ವೈದಿಕ ಪರಂಪರೆ...

ಉಡುಪಿಯ ರಥಬೀದಿಯಲ್ಲಿರುವ ಪುತ್ತಿಗೆ ಮಠದಲ್ಲಿ ಜೂನ್​ 27ರಂದು ಸಂಜೆ ಸಂಧ್ಯಾ ವಿದ್ಯಾಪೀಠ ಉದ್ಘಾಟಿಸಿ ಆಶೀರ್ವಚನ ನೀಡಿದ ಶ್ರೀಗಳು, 1984ರಲ್ಲಿ ಸಂಧ್ಯಾ ಪೀಠ ಸ್ಥಾಪಿಸಲಾಗಿತ್ತು. ವೈದಿಕ ಪರಂಪರೆಯ ಏಳಿಗೆಗಾಗಿ ಶ್ರೀ ಪುತ್ತಿಗೆ ಸಂಧ್ಯಾ ವಿದ್ಯಾಪಿಠವನ್ನು ಪುನಹ ಆರಂಭಿಸಲು ಸಂತಸವೆನಿಸುತ್ತಿದೆ ಎಂದರು.

ನಮ್ಮ ವಿದ್ಯಾ ಗುರುಗಳಾದ ವಿದ್ಯಾಮಾನ್ಯ ತೀರ್ಥರು ಸಮಾಜದಲ್ಲಿ ಪುರೋಹಿತರನ್ನು ಹಾಗೂ ವಿದ್ವಾಂಸರನ್ನು ನಿರ್ಮಿಸುವ ಮುಖ್ಯ ಕೆಲಸ ಮಾಡಬೇಕೆಂದು ಸೂಚಿಸಿದ್ದರು. ಅದರಂತೆ 40 ವರ್ಷದ ಹಿಂದೆ ಕಾಪುವಿನ ಹಯಗ್ರೀವ ಆಚಾರ್ಯರ ನೇತೃತ್ವದಲ್ಲಿ ಇದೇ ಮಠದಲ್ಲಿ ಪೌರೋಹಿತ್ಯ ಶಿಕ್ಷಣ ಕೇಂದ್ರ ಆರಂಭಿಸಲಾಗಿತ್ತು. ಏಳೆಂಟು ವರ್ಷ ಸಂಧ್ಯಾ ಕಾಲದಲ್ಲಿ ಚೆನ್ನಾಗಿ ನಡೆಯಿತು. ನಮ್ಮ 2ನೇ ಪರ್ಯಾಯ ಮುಗಿಯುವಾಗ ಅನೇಕ ಮಕ್ಕಳೂ ಸೇರಿಕೊಂಡಿದ್ದರು. ಪೇಟೆಯ ವಾತಾವರಣದಲ್ಲಿ ಶಿಕ್ಷಣ ಕೊಡುವುದು ಸೂಕ್ತವಲ್ಲವೆಂದು ಈ ಶಾಖೆಯನ್ನು ಪುತ್ತಿಗೆಗೆ ವರ್ಗಾಯಿಸಿ, ಅಲ್ಲಿಯೇ ವಿದ್ಯಾಪೀಠ ನಡೆಸಿದೆವು. ಅಲ್ಲಿಗೆ ಪೂರ್ಣಾವಧಿಯ ವಿದ್ಯಾರ್ಥಿಗಳಷ್ಟೇ ಆಗಮಿಸಿದರು. ಅಲ್ಪಾವಧಿಯ ವಿದ್ವಾಂಸರು ಅಥವಾ ಪುರೋಹಿತರು ಆಗಮಿಸಲಿಲ್ಲ. 40 ವರ್ಷದ ಬಳಿಕ ಪರಿಸ್ಥಿತಿ ಅವಲೋಕಿಸಿದಾಗ ವಿಪ್ರರಿಗೆ ಅಲ್ಪಾವಧಿಯ ಶಿಕ್ಷಣದ ಅಗತ್ಯತೆಯೂ ಇತ್ತು. ಹೀಗಾಗಿ ಮತ್ತೆ ಪುತ್ತಿಗೆ ಮಠದಲ್ಲಿ ಸಂಧ್ಯಾ ವಿದ್ಯಾಪೀಠ ಆರಂಭಿಸಿದ್ದೇವೆ ಎಂದು ಸುಗುಣೇಂದ್ರಶ್ರೀ ತಿಳಿಸಿದರು.

ವಿದ್ವಾಂಸರಾದ ಶತಾವಧಾನಿ ಡಾ. ರಾಮನಾಥ ಆಚಾರ್ಯ, ಉದಯ ಆಚಾರ್ಯ ಸರಳತ್ತಾಯ, ವಿಠ್ಠಲ ಆಚಾರ್ಯ, ವಿದ್ಯಾಪೀಠದ ಸಂಚಾಲಕ ಸುಧೀಂದ್ರ ಹೆಜಮಾಡಿ, ಪ್ರಾಂಶುಪಾಲ ಮಹೇಂದ್ರ ಸೋಮಯಾಜಿ, ಹೈದರಾಬಾದ್​ನ ಉದ್ಯಮಿ ಚಂದ್ರಶೇಖರ ದಂಪತಿ, ಶ್ರೀಮಠದ ದಿವಾನ ನಾಗರಾಜ ಆಚಾರ್ಯ, ಮಠದ ವಿದೇಶ ಕಾರ್ಯದರ್ಶಿ ಪ್ರಸನ್ನ ಆಚಾರ್ಯ, ಶ್ರೀಗಳ ಆಪ್ತ ಕಾರ್ಯದರ್ಶಿ ರತೀಶ ತಂತ್ರಿ, ಸಾಂಸ್ಕೃತಿಕ ಕಾರ್ಯಕ್ರಮಗಳ ಸಂಚಾಲಕ ರಮೇಶ ಭಟ್​, ಸುಗುಣಮಾಲಾ ಪತ್ರಿಕೆಯ ಸಂಪಾದಕ ಮಹಿತೋಶ ಆಚಾರ್ಯ ಇತರರಿದ್ದರು. ಶ್ರೀಮಠದ ವಿದ್ವಾಂಸ ಡಾ. ಬಿ.ಗೋಪಾಲ ಆಚಾರ್ಯ ಕಾರ್ಯಕ್ರಮ ನಿರ್ವಹಿಸಿದರು.