ಜೂನ್ಬಂತೆಂದರೆ ಎಲ್ಲೆಡೆ ವನಮಹೋತ್ಸವ ಅಬ್ಬರ ಶುರುವಾಗುತ್ತದೆ. ಶಾಲೆ, ಕಾಲೇಜುಗಳು, ಸಾರ್ವಜನಿಕ ಸ್ಥಳ, ಸಂಘ- ಸಂಸ್ಥೆಗಳಲ್ಲೂ ವನಮಹೋತ್ಸವ ಆರಂಭವಾಗುತ್ತದೆ. ಕಾರ್ಯಕ್ರಮ ಪ್ರಯುಕ್ತ ಕೆಲವು ಗಿಡಗಳನ್ನು ನೆಡುವುದು, ಅತಿಥಿಗಳು, ಸಾರ್ವಜನಿಕರಿಗೆ ಗಿಡಗಳನ್ನು ವಿತರಿಸುವುದು ಸಾಮಾನ್ಯ. ಅರಣ್ಯ ಇಲಾಖೆ ಚಿಲ್ಲರೆ ಹಣದಲ್ಲಿ ಗಿಡಗಳನ್ನು ನೀಡುತ್ತಿದ್ದ ಕಾರಣ ಅದರ ಮಹತ್ವ ಸಾರ್ವಜನಿಕರಿಗೆ ಗೊತ್ತಾಗುತ್ತಿರಲಿಲ್ಲ. ಚಿಲ್ಲರೆ ಹಣಕ್ಕೆ ಗಿಡಗಳು ಸಿಗುತ್ತಿದ್ದುದರಿಂದ ಖರೀದಿಸಿ ವಿತರಿಸುವವರು, ಕಾರ್ಯಕ್ರಮದ ಪ್ರಾಯೋಜಕತ್ವ ವಹಿಸುವವರ ಕೊರತೆಯೂ ಇರಲಿಲ್ಲ. ನೂರಾರು ಗಿಡಗಳನ್ನು ಖರೀದಿಸಿ ಪುಕ್ಕಟ್ಟೆಯಾಗಿ ವಿತರಿಸಿ ಉದಾರತೆ ಮೆರೆಯುತ್ತಿದ್ದರು. ಆದರೆ ಇನ್ನು ಮುಂದಕ್ಕೆ ಅಂಥ ಉದಾರಿಗಳನ್ನು ಕಾಣಲು ಸಾಧ್ಯವಾಗದು. ಯಾಕೆಂದರೆ ಗಿಡಗಳ ದರದಲ್ಲಿ ದಿಢೀರ್ ಏರಿಕೆಯಾಗಿದೆ. ಇದುವರೆಗೆ ಅರಣ್ಯ ಇಲಾಖೆಯಿಂದ ಒಂದು ರೂಪಾಯಿಗೆ ನೀಡಲಾಗುತ್ತಿದ್ದ ಗಿಡದ ಈಗಿನ ದರ ಏಳು ರೂಪಾಯಿ ಆಗಿದೆ. ಇನ್ನು ಮೂರು ರೂಪಾಯಿಗೆ ನೀಡಲಾಗುತ್ತಿದ್ದ ಗಿಡದ ದರ ಏಕಾಏಕಿ 20 ರೂಪಾಯಿ ಏರಿಸಲಾಗಿದ್ದು ಪ್ರಸ್ತುತ ದರ 23 ರೂ. ಆಗಿದೆ. ಗಿಡದ ದರ ದುಬಾರಿ ಆಗಿರುವುದರಿಂದ ಗಿಡ ಹಂಚುವವರು, ವನಮಹೋತ್ಸವ ಆಚರಿಸಿ ಗಿಡ ನೆಡುವವರ ಸಂಖ್ಯೆ ಕ್ಷೀಣಿಸುವ ನಿರೀಕ್ಷೆ ಇದೆ.
