ಗಂಡನ ಮನೆಯಲ್ಲಿ ಮಣ್ಣು ಮಾಡಿ: ಪತಿ ಹಾಗೂ ಆತನ ಕುಟುಂಬದವರು ಸಾಕಷ್ಟು ಕಿರುಕುಳ ನೀಡಿದ್ದಾರೆ, ಸಾಯುವಂತೆ ಒತ್ತಾಯಿಸುತ್ತಿದ್ದರು. ನನ್ನ ಸಾವಿನ ನಂತರ ನನ್ನ ಶವವನ್ನು ಗಂಡನ ಮನೆಯಲ್ಲಿಯೇ ಮಣ್ಣು ಮಾಡಬೇಕು ನನಗೆ ಆದ ಅನ್ಯಾಯ ಇನ್ಯಾವ ಹುಡುಗಿಯೂ ಆಗಬಾರದು, ನನಗೆ ನ್ಯಾಯ ದೊರಕಿಸಿಕೊಡಬೇಕು ಎಂದು ಪುಷ್ಪಾ ಅಂಗಲಾಚಿರುವ ವಿಡಿಯೋ ಎಲ್ಲೆಡೆ ಹರಿದಾಡುತ್ತಿದ್ದು, ಪೊಲೀಸರು ತನಿಖೆಗೆ ಬಳಸಿಕೊಂಡಿದ್ದಾರೆ. ನನಗೆ ಊಟದಲ್ಲಿ ವಿಷ ಹಾಕಿ ಕೊಲ್ಲುವ ಪ್ರಯತ್ನ ಮಾಡಿದ್ದರು. ಆದ್ದರಿಂದ ಮನೆಯಲ್ಲಿ ಊಟ ಮಾಡುವುದನ್ನೇ ಬಿಟ್ಟಿದ್ದೆ. ನನ್ನ ಪತಿಗೆ ಇನ್ನೊಂದು ಮದುವೆ ಮಾಡುವ ಪ್ಲಾನ್ ಮಾಡಿದ್ದರು. ಸೈಟ್ ಕೊಡಿಸುವಂತೆ ನನ್ನ ತವರು ಮನೆಯವರಿಗೆ ಕೇಳುವಂತೆ ಕಿರುಕುಳ ನೀಡುತ್ತಿದ್ದರು. ನನಗೆ ಕೆಲಸ ಮಾಡಲು ಬಿಡುತ್ತಿರಲಿಲ್ಲ. ದಿನಕ್ಕೆ ಅತ್ತೆ, ಪತಿ ಹಲವು ಬಾರಿ ಕರೆ ಮಾಡಿ ತೊಂದರೆ ಕೊಡುತ್ತಿದ್ದರು ಅದೆಲ್ಲ ನನ್ನ ಕಾಲ್ ರೆಕಾರ್ಡ್ನಲ್ಲಿದೆ. ಆದರೆ ಅವರು ನನ್ನ ಮೊಬೈಲ್ ಪ್ಲಾಷ್ ಮಾಡಿಸಿ ಸಾಕ್ಷ್ಯ ನಾಶ ಮಾಡಿದ್ದಾರೆ, ಪ್ರತಿ ನಿತ್ಯ ನರಕ ಅನುಭವಿಸಿದ್ದೇನೆ. ನನ್ನ ಸಾವಿಗೆ ನ್ಯಾಯ ಕೊಡಿಸಬೇಕು ಎಂದು ವಿಡಿಯೋದಲ್ಲಿ ಗೋಗರೆದಿರುವ ಪುಷ್ಪಾ ಆ ವಿಡಿಯೋವನ್ನು ಸಂಬಂಧಿಕರಿಗೆ ಶೇರ್ ಮಾಡಿದ ನಂತರ ಪಿಕ್ಅಪ್ ಡ್ಯಾಂಗೆ ಹಾರಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
