ಡಿ.9ಕ್ಕೆ ಸಬ್​ ಜೈಲ್​ ವಾಸ್ತುಶಿಲ್ಪದ ದಾಖಲಾತಿ

ಉಡುಪಿ: ನಗರದ ಹೃದಯ ಭಾಗದಲ್ಲಿರುವ ಐತಿಹಾಸಿಕ ಸ್ಮಾರಕ ಸಬ್​ ಜೈಲ್​ ವಾಸ್ತುಶಿಲ್ಪದ ದಾಖಲಾತಿ ಪ್ರದರ್ಶನ ಡಿ.9ರಂದು ಸಾಯಂಕಾಲ 5 ಗಂಟೆಗೆ ಸಿಟಿ ಬಸ್​ ಸ್ಟಾಡ್​ ಬಳಿಯಿರುವ ಚಿತ್ರಕಲಾ ಮಂದಿರ ಕಲಾಶಾಲೆಯ ಜಂಗಮ ಮಠದ ವಿಭೂತಿ ಆರ್ಟ್​ ಗ್ಯಾಲರಿಯಲ್ಲಿ ನಡೆಯಲಿದೆ.

ಉಡುಪಿಯ ಪಾರಂಪರಿಕ ಕಟ್ಟಡಗಳ ಪೈಕಿ ಒಂದೆನಿಸಿರುವ ಈ ಸಬ್​ ಜೈಲು 1906ರಲ್ಲಿ ಕಟ್ಟಲಾಗಿದ್ದು, 2009ರ ತನಕ ಈ ಕಟ್ಟಡದಲ್ಲಿ ಸರ್ಕಾರಿ ಕಚೇರಿಗಳು ಕಾರ್ಯನಿರ್ವಹಿಸುತ್ತಿದ್ದವು. ಆದರೆ ಇತ್ತೀಚೆಗೆ ಈ ಕಟ್ಟಡವನ್ನು ಕೆಡವಿ ಹೊಸ ನಗರಸಭೆ ಕಟ್ಟಡ ನಿರ್ಮಾಣಕ್ಕೆ ಯೋಜನೆ ರೂಪಿಸಲಾಗಿದ್ದು, ಕಟ್ಟಡದ ಐತಿಹಾಸಿಕ ಅಸ್ತಿತ್ವವನ್ನು ದಾಖಲಿಸುವುದು ಕಾರ್ಯಕ್ರಮದ ಉದ್ದೇಶವಾಗಿದೆ. ಇದರ ಜೊತೆಗೇ ಬ್ರಿಟಿಷ್​ ಆಡಳಿತ ಕಾಲದಲ್ಲಿಯೇ ನಿಮಾರ್ಣಗೊಂಡು ಇಂದಿಗೆ ಪರ್ಯಾಯ ಬಳಕೆಯಲ್ಲಿರುವ ಭಾರತದ ಮೂರು ಪ್ರಮುಖ ಜೈಲುಗಳಾದ ಅಂಡಮಾನ್​ ಸೆಲ್ಯುಲಾರ್​ ಜೈಲ್​, ಕಲ್ಕತ್ತಾದ ಅಲಿಫೋರ್​ ಜೈಲ್​ ಹಾಗೂ ಬೆಂಗಳೂರಿನ ಜೈಲುಗಳನ್ನು ಯಾವ ರೀತಿಯಲ್ಲಿ ಸಂರಕ್ಷಣೆಯನ್ನು ಮಾಡಿಕೊಳ್ಳುತ್ತ ಮರು ಬಳಕೆ ಮಾಡಲಾಗುತ್ತಿದೆ ಎಂಬುದರ ಚಿತ್ರಣವನ್ನು ಪ್ರದರ್ಶಿಸಲಾಗುತ್ತಿದೆ.

ನಗರಸಭೆ ಪೌರಾಯುಕ್ತ ರಾಯಪ್ಪ, ಚಿತ್ರಕಲಾ ಮಂದಿರ ಕಲಾಶಾಲೆಯ ನಿರ್ದೇಶಕ ಡಾ. ಯು.ಸಿ ನಿರಂಜನ್​ ಮುಖ್ಯ ಅತಿಥಿಗಳಾಗಿ ಭಾಗವಹಿಸಲಿದ್ದಾರೆ. ಇಂಟ್ಯಾಕ್​ ಮಂಗಳೂರು ವಿಭಾಗದ ಕನ್ವೀನಿಯರ್​ ಆರ್ಕಿಟೆಕ್ಟ್​ ಸುಭಾಷ್​ಚಂದ್ರ ಬಸು ಹಾಗೂ ಸದಸ್ಯರಾದ ಕಲಾವಿದ ಡಾ. ಜನಾರ್ದನ ಹಾವಂಜೆ ಮತ್ತು ಆರ್ಕಿಟೆಕ್ಟ್​ ಶರ್ವಾಣಿ ಭಟ್​ ಉಪಸ್ಥಿತರಿರುತ್ತಾರೆ. ಛಾಯಾಚಿತ್ರಗಳು, ವಾಸ್ತು ವೈಶಿಷ್ಟ್ತ್ರ್ಯತೆ ಪ್ರದರ್ಶನ ಡಿ.11ರವರೆಗೆ ಸಾಯಂಕಾಲ 3ರಿಂದ 7ರ ತನಕ ನಡೆಯಲಿದೆ.