ಪೆನ್ನು, ಪುಸ್ತಕ ಹಿಡಿವ ಕೈಯಲ್ಲಿ ನೇಜಿ: ಮಳೆ ಲೆಕ್ಕಿಸದೆ ಗದ್ದೆಯಲ್ಲಿ ಕೃಷಿ ಪಾಠ ಕಲಿತ ವಿದ್ಯಾರ್ಥಿಗಳು

ಸಂದೀಪ್ ಸಾಲ್ಯಾನ್ ಬಂಟ್ವಾಳ

ಐದು ಎಕರೆ ವಿಸ್ತೀರ್ಣದಲ್ಲಿ ಹರಡಿ ಕೊಂಡಿರುವ ವಿಶಾಲವಾದ ಗದ್ದೆ ಪ್ರದೇಶ... ಗದ್ದೆಯ ತುಂಬ ಕಾಲೇಜು ವಿದ್ಯಾರ್ಥಿಗಳ ಕಲರವ... ತರಗತಿ ಕೋಣೆಯಲ್ಲಿ ಪೆನ್ನು, ಪುಸ್ತಕ, ಓದು ಎಂದು ಪಠ್ಯ ಚಟುವಟಿಕೆಯಲ್ಲಿ ತೊಡಗಿಸಿಕೊಳ್ಳುತ್ತಿದ್ದ ವಿದ್ಯಾರ್ಥಿಗಳು ಭಾನುವಾರ ಕೈಯಲ್ಲಿ ನೇಜಿ ಹಿಡಿದು, ಗದ್ದೆಯಲ್ಲಿ ನಾಟಿ ಮಾಡಿ ಕೃಷಿ ಪಾಠ ಕಲಿತರು. ಸುರಿಯುವ ಮಳೆಯನ್ನೂ ಲೆಕ್ಕಿಸದೆ ಕೆಸರುಗದ್ದೆಯಲ್ಲಿ ಕೃಷಿ ಕಾಯಕದಲ್ಲಿ ತೊಡಗಿಸಿಕೊಂಡು ಅಕ್ಷರಶಃ ಮಣ್ಣಿನ ಮಕ್ಕಳೆನಿಸಿಕೊಂಡರು!.

ನರಿಕೊಂಬು ಗ್ರಾಮದ ಶಂಭೂರಿನ ಬರ್ಕೆ ಎಂಬಲ್ಲಿ ಹಲವಾರು ವರ್ಷಗಳಿಂದ ಹಡಿಲು ಬಿದ್ದ ಗದ್ದೆಯಲ್ಲಿ ಕಳೆದ 4 ವರ್ಷಗಳಿಂದ ಶಂಭೂರಿನಲ್ಲಿರುವ ದಕ್ಷಿಣದ ಶಿರ್ಡಿ ಸಾಯಿ ಮಂದಿರದ ವತಿಯಿಂದ ಭತ್ತದ ಬೇಸಾಯ ಮಾಡಿಕೊಂಡು ಬರಲಾಗುತ್ತಿದೆ. ಬೇರೆ ಸಂಘ ಸಂಸ್ಥೆಗಳು, ವಿದ್ಯಾರ್ಥಿಗಳು ಅವರ ಈ ಕೃಷಿ ಕಾರ್ಯಕ್ಕೆ ಸಹಕಾರ ನೀಡುತ್ತಿದ್ದರು. ಈ ಬಾರಿ ಬಿ.ಸಿ.ರೋಡಿನ ಗೂಡಿನ ಬಳಿಯಲ್ಲಿರುವ ಬಿ.ಮೂಡ ಸರ್ಕಾರಿ ಪದವಿ ಪೂರ್ವ ಕಾಲೇಜಿನ ರಾಷ್ಟ್ರೀಯ ಸೇವಾ ಯೋಜನೆಯ ವಿದ್ಯಾರ್ಥಿಗಳು ಸಾಥ್ ನೀಡಿದ್ದಾರೆ. ನೂರಕ್ಕೂ ಅಧಿಕ ವಿದ್ಯಾರ್ಥಿಗಳು ಗದ್ದೆಗಿಳಿದು ನೇಜಿ ಕಿತ್ತು, ನಾಟಿ ಮಾಡಿ ಕೆಸರು ಗದ್ದೆಯಲ್ಲಿ ಸಾಗುವಳಿ ಮಾಡಿ ಸಂಭ್ರಮಿಸಿದರು. ಸ್ಥಳೀಯ ಕೃಷಿಕ ಮಹಿಳೆಯರು, ಸಾಯಿ ಮಂದಿರದ ಮುಖ್ಯಸ್ಥ ಸಾಯಿ ಸೂರಜ್ ವಿದ್ಯಾರ್ಥಿಗಳಿಗೆ ನೇಜಿ ನಾಟಿ ಮಾಡಲು ಮಾರ್ಗದರ್ಶನ ಮಾಡಿದರು. ಹಿರಿಯರ ಸೂಚನೆಯನ್ನು ಪಾಲಿಸಿಕೊಂಡು ಮೇಟಿ ವಿದ್ಯೆಗಿಂತ ನಾಟಿ ವಿದ್ಯೆಯೇ ಮೇಲು ಎನ್ನುವುದನ್ನು ಬಯಲು ವಿದ್ಯಾಲಯದಲ್ಲಿ ಅನುಭವದ ಮೂಲಕ ಅರಿತುಕೊಂಡರು.

ಮಾದರಿಯಾದ ಉಪನ್ಯಾಸಕರು

ಬಿ.ಮೂಡ ಕಾಲೇಜಿನ ವಿದ್ಯಾರ್ಥಿಗಳೊಂದಿಗೆ ಉಪನ್ಯಾಸಕರು ನೇಜಿ ನಾಟಿ ಮಾಡಿ ಗಮನ ಸೆಳೆದರು. ತರಗತಿ ಕೋಣೆಯೊಳಗೆ ಸಿಗದ ಪಾಠವನ್ನು ಗದ್ದೆಯಲ್ಲಿ ಪಡೆದುಕೊಂಡರು. ಕಾಲೇಜಿನ ಪ್ರಾಂಶುಪಾಲ ಯೂಸುಫ್ ವಿಟ್ಲ, ಹಿರಿಯ ಉಪನ್ಯಾಸಕ ದಾಮೋದರ್ ಇ., ರಾಷ್ಟ್ರೀಯ ಸೇವಾ ಯೋಜನೆಯ ಯೋಜನಾಧಿಕಾರಿ ಬಾಲಕೃಷ್ಣ ನಾಯ್ಕ ಬೆಳ್ಳಾರೆ, ಉಪನ್ಯಾಸಕರಾದ ಅಬ್ದುಲ್ ರಝಾಕ್, ದಿವ್ಯ, ರಾಧ, ಶಮಿತ, ಹರ್ಷಿತಾ ಹಾಗೂ ಶಿಕ್ಷಕಿ ಗೀತಾ, ಸ್ಥಳೀಯ ಮಹಿಳೆಯರು, ಯುವಕರು ವಿದ್ಯಾರ್ಥಿಗಳೊಂದಿಗೆ ಸಾಗುವಳಿ ಚಟುವಟಿಕೆಯಲ್ಲಿ ತೊಡಗಿಸಿಕೊಂಡರು.

ಬೇಸಾಯದ ಅಕ್ಕಿ ಭಕ್ತರಿಗೆ!

ಕಳೆದ 4 ವರ್ಷಗಳಿಂದ ಶಿರ್ಡಿ ಸಾಯಿ ಮಂದಿರದ ಮೂಲಕ ಈ ಗದ್ದೆಯಲ್ಲಿ ಭತ್ತದ ಸಾಗುವಳಿ ಮಾಡಿ ಬಂದ ಅಕ್ಕಿಯನ್ನು ರಾಮನವಮಿಯ ದಿನ ಕ್ಷೇತ್ರಕ್ಕೆ ಭೇಟಿ ನೀಡುವ ಎಲ್ಲ ಭಕ್ತರಿಗೆ ತಲಾ 1 ಕೆಜಿಯಂತೆ ಪ್ರಸಾದ ರೂಪದಲ್ಲಿ ಹಂಚಲಾಗುತ್ತದೆ. ಅಗತ್ಯವಿರುವ ಬಡವರಿಗೂ ಅಕ್ಕಿಯನ್ನು ಹಂಚಿ ಉಳಿಕೆಯಾದ ಅಕ್ಕಿಯನ್ನು ಸಾಯಿಮಂದಿರದಲ್ಲಿ ಪ್ರತಿ ಗುರುವಾರ ಮಧ್ಯಾಹ್ನ ಹಾಗೂ ರಾತ್ರಿಯ ಅನ್ನಪ್ರಸಾದಕ್ಕೆ ಬಳಸಿಕೊಳ್ಳುವುದಾಗಿ ಶಿರ್ಡಿ ಸಾಯಿ ಮಂದಿರದ ಮುಖ್ಯಸ್ಥರಾದ ಸಾಯಿ ಸೂರಜ್ ತಿಳಿಸಿದರು.

https://www.vijayavani.net/students-welfare-council-inauguration

https://www.vijayavani.net/notice-not-to-go-into-sea-water