ಕುಶಾಲನಗರದಿಂದ ಸೋಮವಾರಪೇಟೆಗೆ ಹಾದು ಬಂದಿರುವ 33ಕೆ.ವಿ. ವಿದ್ಯುತ್ ಮಾರ್ಗ ಯಡವನಾಡು ಮೀಸಲು ಅರಣ್ಯ ಹಾಗೂ ಕಾಫಿ ತೋಟದೊಳಗೆ ಹಾದುಹೋಗಿರುವುದರಿಂದ, ಮಳೆಗಾಲದಲ್ಲಿ ಮರಗಳು ಬಿದ್ದರೆ, ಮಾರ್ಗ ಸರಿಪಡಿಸಲು ಕಷ್ಟಕರ. ಅರಣ್ಯ, ತೋಟದೊಳಗೆ ವಾಹನಗಳು ಸಂಚರಿಸಲು ಸಾಧ್ಯವಿಲ್ಲದ ಕಾರಣ ಸೆಸ್ಕ್ ಸಿಬ್ಬಂದಿ ಸಮಸ್ಯೆಗೆ ಸಿಲುಕಿಕೊಳ್ಳುತ್ತಾರೆ.
ಸೋಮವಾರಪೇಟೆ ಉಪವಿಭಾಗದ ಶನಿವಾರಸಂತೆ, ಕೊಡ್ಲಿಪೇಟೆ, ಅಲೂರುಸಿದ್ದಾಪುರ, ಶಾಂತಳ್ಳಿ, ಸೋಮವಾರಪೇಟೆ ವಲಯಗಳಲ್ಲಿ ವಿದ್ಯುತ್ ಮಾರ್ಗ ಕಾಫಿ ತೋಟದೊಳಗೆ ಹಾದು ಹೋಗಿರುವುದರಿಂದ ಮಳೆಗಾಲದಲ್ಲಿ ಮರ ಬಿದ್ದರೆ, ಸಮಸ್ಯೆ ಎದುರಾಗುತ್ತದೆ. ರಸ್ತೆಬದಿಗೆ ಮಾರ್ಗ ಬದಲಾಯಿಸುವಂತೆ ಅನೇಕ ವರ್ಷಗಳಿಂದ ಗ್ರಾಮಸ್ಥರು ಬೇಡಿಕೆ ಇಡುತ್ತಿದ್ದಾರೆ. ಆದರೆ ಸರ್ಕಾರ ಸ್ಪಂದಿಸಿಲ್ಲ ಎಂಬ ಆರೋಪ ಕೇಳಿಬಂದಿದೆ.
ಕಾಗಡೀಕಟ್ಟೆಯಿಂದ ಹೊನವಳ್ಳಿ, ಕೂಗೇಕೋಡಿ. ಸುಳಿಮಳ್ತೆ ಗ್ರಾಮಕ್ಕೆ ಕಾಫಿ ತೋಟದೊಳಗೆ ವಿದ್ಯುತ್ ತಂತಿಗಳನ್ನು ಹಾಕಲಾಗಿದೆ. ಸುಮಾರು ನಾಲ್ಕು ದಶಕದಿಂದ ಮಾರ್ಗ ಬದಲಾಯಿಸಿಲ್ಲ ಎಂದು ಹೊನವಳ್ಳಿ ಗ್ರಾಮದ ವೀರೇಶ್ ದೂರಿದ್ದಾರೆ.
ಸೋಮವಾರಪೇಟೆ, ದುದ್ದಗಲ್ಲು, ತಾಕೇರಿ ಗ್ರಾಮದವರೆಗಿನ ವಿದ್ಯುತ್ ಮಾರ್ಗ ಕಾಫಿ ತೋಟದೊಳಗೆ ಹಾದು ಹೋಗಿದ್ದು, ಮಳೆಗಾಲದಲ್ಲಿ ವಾರಗಟ್ಟಲೆ ವಿದ್ಯುತ್ ಸಮಸ್ಯೆ ಎದುರಿಸುವಂತಾಗಿದೆ. ತಲ್ತಾರೆಶೆಟ್ಟಳ್ಳಿ, ತಲ್ತಾರೆ, ಬಗ್ಗನಮನೆ ಮಾರ್ಗ ಕಾಫಿ ತೋಟದೊಳಗೆ ಹಾದುಹೋಗಿದೆ.
ಕನ್ನಳ್ಳಿ ಕಟ್ಟೆಯಿಂದ ಹರಗ ಮಾರ್ಗದಲ್ಲಿ ಹೊಳೆಯೊಳಗೆ ಕಂಬಗಳನ್ನು ನೆಡಲಾಗಿದೆ. ವಿದ್ಯುತ್ ತಂತಿಗಳು ಹಾದುಹೋಗಿವೆ. ಕುಮಾರಳ್ಳಿ ಬಾಚಳ್ಳಿ, ಬೀದಳ್ಳಿ, ಕೊತ್ನಳ್ಳಿ, ಮಲ್ಲಳ್ಳಿ, ತಡ್ಡಿಕೊಪ್ಪ, ನಾಡ್ನಳ್ಳಿ, ಹೆಗ್ಗಡಮನೆ ಗ್ರಾಮಗಳಲ್ಲಿ ಹಾದುಹೋಗಿರುವ ವಿದ್ಯುತ್ ಮಾರ್ಗ ಹಳೆಯದಾಗಿದ್ದು, ರಸ್ತೆಬದಿಗೆ ಮಾರ್ಗ ಬದಲಾಯಿಸಿದರೆ ಮಳೆಗಾಲದ ವಿದ್ಯುತ್ ಸಮಸ್ಯೆ ಬಗೆಹರಿಸಬಹುದು ಎಂದು ಗ್ರಾಮೀಣ ಜನರ ಆಗ್ರಹ.
ಪ್ರಸಕ್ತ ವರ್ಷ ಶಾಂತಳ್ಳಿ ಹೋಬಳಿಯಲ್ಲಿ ಅತೀ ಹೆಚ್ಚಿನ ಕಂಬಗಳಿಗೆ ಹಾನಿಯಾಗಿದೆ. ತಾಲೂಕಿನಲ್ಲಿ ಒಟ್ಟು 468 ಕಂಬಗಳಿಗೆ ಹಾನಿಯಾಗಿದೆ. ಈಗಾಗಲೇ 414 ಕಂಬಗಳನ್ನು ಸರಿಪಡಿಸಲಾಗಿದೆ.
