ಐದನೇ ತರಗತಿವರೆಗೆ ಕನ್ನಡ ಕಲಿಕೆ ಕಡ್ಡಾಯ. ತದನಂತರ ನಿಮ್ಮ ಬೌದ್ಧಿಕ ಸಾಮರ್ಥ್ಯದ ಮೇಲೆ ಎಷ್ಟು ಭಾಷೆಗಳನ್ನಾದರೂ ಕಲಿಯಿರಿ. ಅದಕ್ಕೆ ನಮ್ಮ ವಿರೋಧವಿಲ್ಲ ಎಂಬ ಸಂದೇಶ ಸಾರುವ ಮೂಲಕ 86ನೇ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷ ಡಾ.ದೊಡ್ಡರಂಗೇಗೌಡ ಕನ್ನಡಿಗರಿಗೆ ಕನ್ನಡಾಭಿಮಾನದ ಪಾಠ ಮಾಡಿದರು. ಪ್ರಾಥಮಿಕ ಶಾಲೆಗಳಲ್ಲಿ ಕನ್ನಡಕ್ಕೆ ಆದ್ಯತೆ ನೀಡುವ ಕರ್ತವ್ಯ ನಮ್ಮೆಲ್ಲರದ್ದಾಗಿದೆ. ಕಾಸರಗೋಡಿನ ಕನ್ನಡ ಶಾಲೆಗಳಲ್ಲಿ ಮಲಯಾಳಿ ಶಿಕ್ಷಕರ ನೇಮಕ ಮಾಡುತ್ತಿರುವುದು ಖಂಡನೀಯ. ಇಂಗ್ಲಿಷ್ ಭಾಷೆಯ ವ್ಯಾಮೋಹ ತೊರೆದು ಭಾಷಾಪ್ರೇಮ ಬೆಳೆಸಬೇಕು. ಇಂಜಿನಿಯರಿಂಗ್ ಮತ್ತು ವೈದ್ಯಕೀಯ ಶಿಕ್ಷಣದಲ್ಲಿ ಕನ್ನಡದ ಅಸ್ಮಿತೆ ಉಳಿಸಿ ಬೆಳೆಸುವಂತೆಯೂ ಸರ್ಕಾರಕ್ಕೆ ಸಲಹೆ ನೀಡಿದ್ದಾರೆ. ಕನ್ನಡವೇ ಮೊದಲು, ಉಳಿದಿದ್ದೆಲ್ಲ ಆಮೇಲೆ, ಇದು ಕನ್ನಡದ ಸೈದ್ಧಾಂತಿಕ ಕರ್ತವ್ಯ. ಎಡ, ಬಲ, ಮಧ್ಯಮಗಳೇನೆ ಇರಲಿ, ಕನ್ನಡ ಎಂಬುದು ಅನ್ನದ ಹಕ್ಕಿನ ಭಾಷೆ. ಮಹತ್ವಾಕಾಂಕ್ಷೆಯ ಭಾಷೆ, ಉದ್ಯೋಗಶೀಲತೆಯ ಭಾಷೆ, ಕ್ರಿಯಾಶೀಲ ಭಾಷೆ ನಮ್ಮ ಕನ್ನಡ ಎನ್ನುವುದನ್ನು ಯಾರೂ ಮರೆಯಬಾರದು ಎಂದು ದೊಡ್ಡರಂಗೇಗೌಡರು ಕಿವಿಮಾತು ಹೇಳಿದರು.
