ಶಿವಗಂಗೆ ರಸ್ತೆಯಲ್ಲಿ ಅಪಘಾತ ಭೀತಿ, ಪ್ರಯಾಣಿಕರಿಗೆ ಬೀದಿ ನಾಯಿ, ಹಂದಿ ಕಾಟ, ಮಾಂಸದ ಅಂಗಡಿಗಳಿಂದ ಸಮಸ್ಯೆ

ಬರಗೇನಹಳ್ಳಿ ಚಿಕ್ಕರಾಜು ದಾಬಸ್‌ಪೇಟೆ

ಶಿವಗಂಗೆ ರಸ್ತೆ ಅಪಘಾತ ವಲಯವಾಗಿದ್ದು, ಪ್ರಯಾಣಿಕರ ಪಾಲಿಗೆ ಮೃತ್ಯುಕೂಪವಾಗಿದೆ. ದಾಬಸ್‌ಪೇಟೆ-ಹೊನ್ನೇನಹಳ್ಳಿ ರಸ್ತೆ 2 ಕಿಮೀ ವ್ಯಾಪ್ತಿಯಲ್ಲಿ ಸಾಕಷ್ಟು ಮಾಂಸ ಮಾರಾಟ ಅಂಗಡಿಗಳು ಮತ್ತು ಮಾಂಸಾಹಾರದ ಹೋಟೆಲ್‌ಗಳಿದ್ದು, ಈ ಭಾಗದಲ್ಲಿ ಬೀದಿನಾಯಿ ಹಾವಳಿ ಹೆಚ್ಚಾಗಿದೆ ಎಂದು ಹೊನ್ನೇನಹಳ್ಳಿ ಗ್ರಾಮಸ್ಥರು ಮತ್ತು ತಾಂಡಾ ನಿವಾಸಿಗಳು ದೂರಿದ್ದಾರೆ.

ಈ ರಸ್ತೆಯಲ್ಲಿರುವ ಅಂಗಡಿಗಳು ಮತ್ತು ಹೋಟೆಲ್‌ನವರು ಮಾಂಸದ ತ್ಯಾಜ್ಯವನ್ನು ಬೀದಿ ಬದಿಯೇ ವಿಲೇ ಮಾಡುತ್ತಾರೆ. ಇದನ್ನು ತಿನ್ನಲು ನೂರಾರು ನಾಯಿಗಳು ಬರುತ್ತವೆ. ಅಲ್ಲದೆ, ಹಂದಿ ಮಾಂಸ ಮಾರಾಟಗಾರರು ನೂರಾರು ಹಂದಿಗಳನ್ನು ಸಾಕಿಕೊಂಡಿದ್ದು, ಅವನ್ನು ರಸ್ತೆಯಲ್ಲೇ ಪಾಲನೆ ಮಾಡುತ್ತಿದ್ದಾರೆ. ಇದರಿಂದಾಗಿ ಈ ಮಾರ್ಗದಲ್ಲಿ ವಾಹನ ಸಂಚಾರಕ್ಕೆ ಭಾರಿ ಅಡಚಣೆಯಾಗುತ್ತಿದೆ. ಇವು ಹಠಾತ್ತನೆ ಗಾಡಿಗಳ ಮುಂದೆ ಬರುವುದರಿಂದ ನಿತ್ಯ ಅಪಘಾತ ಸಂಭವಿಸುತ್ತಿದ್ದು, ಸಾಕಷ್ಟು ಜನರಿಗೆ ಗಂಭೀರ ಗಾಯಗಳಾಗಿವೆ.

ಈ ಹಿನ್ನೆಲೆಯಲ್ಲಿ ಹಂದಿ, ಕುರಿ ಮಾಂಸ ಮಾರಾಟದ ಅಂಗಡಿಗಳು ಮತ್ತು ಮಾಂಸದ ಹೋಟೆಲ್‌ಗಳನ್ನು ಬೇರೆಡೆಗೆ ಸ್ಥಳಾಂತರಿಸಲು ಕ್ರಮ ಕೈಗೊಳ್ಳುವಂತೆ ನೆಲಮಂಗಲ ತಾಪಂ ಕಾರ್ಯನಿರ್ವಹಣಾಧಿಕಾರಿ ಲಕ್ಷ್ಮೀನಾರಾಯಣ ಅವರಿಗೆ ಮನವಿ ಮಾಡಿಕೊಂಡಿದ್ದಾರೆ.

3 ಗ್ರಾಪಂ ವ್ಯಾಪ್ತಿಯ ರಸ್ತೆ: ದಾಬಸ್‌ಪೇಟೆಯಿಂದ ಹೊನ್ನೇನಹಳ್ಳಿವರೆಗಿನ 2 ಕಿಮೀ ಉದ್ದದ ರಸ್ತೆ ಸೋಂಪುರ, ಅಗಳಕುಪ್ಪೆ ಮತ್ತು ಹೊನ್ನೇನಹಳ್ಳಿ ಗ್ರಾಪಂ ವ್ಯಾಪ್ತಿಗೆ ಬರುತ್ತದೆ. ಈ ಹಿನ್ನೆಲೆಯಲ್ಲಿ ಈ ರಸ್ತೆಯಲ್ಲಿರುವ ನೂರಾರು ಬೀದಿ ನಾಯಿಗಳನ್ನು ಹಿಡಿಯುವ ಜತೆಗೆ ಹಂದಿ ಸಾಕಣೆಯಲ್ಲಿ ತೊಡಗಿರುವವರಿಗೆ ಸ್ವಂತ ಜಾಗದಲ್ಲಿ ಸಾಕಿಕೊಳ್ಳುವಂತೆ ಸೂಚಿಸಬೇಕು ಎಂದು ಹೊನ್ನೇನಹಳ್ಳಿ ಗ್ರಾಮಸ್ಥರು ಮತ್ತು ಹೊನ್ನೇನಹಳ್ಳಿ ತಾಂಡಾ ನಿವಾಸಿಗಳು ಮೂರೂ ಗ್ರಾಪಂ ಅಭಿವೃದ್ಧಿ ಅಧಿಕಾರಿಗಳಿಗೆ ಪ್ರತ್ಯೇಕವಾಗಿ ಮನವಿ ಸಲ್ಲಿಸಿದ್ದಾರೆ.