ಜಿಲ್ಲೆ

ರಾಜ್ಯ ಜಿಎಸ್​ಡಿಪಿಗೂ ಆತಂಕ: 18.05 ಲಕ್ಷ ಕೋಟಿ ಗಿಂತ ಕೆಳಗೆ ಕುಸಿಯುವ ಸಾಧ್ಯತೆ

GSDPS
Published on: 

| ರುದ್ರಣ್ಣ ಹರ್ತಿಕೋಟೆ ಬೆಂಗಳೂರು

ಭಾರತದ ಒಟ್ಟಾರೆ ದೇಶೀಯ ಉತ್ಪನ್ನ ದರ (ಜಿಡಿಪಿ) 2020-21 ಮೊದಲ ತ್ರೖೆಮಾಸಿಕದಲ್ಲಿ -23.9%ಕ್ಕೆ ಕುಸಿದಿರುವ ಆತಂಕದ ನಡುವೆಯೇ ರಾಜ್ಯದ ಜಿಎಸ್​ಡಿಪಿ (ರಾಜ್ಯದ ಒಟ್ಟಾರೆ ಉತ್ಪನ್ನ ದರ) ಸಹ ನಿರೀಕ್ಷೆಗಿಂತ ಕಡಿಮೆಯಾಗುವುದು ಖಚಿತವಾಗಿದೆ. ಇದರಿಂದಾಗಿ ಹೆಚ್ಚಲಿರುವ ವಿತ್ತೀಯ ಕೊರತೆಯಿಂದಾಗುವ ಪರಿಣಾಮಗಳ ಭಯ ಕಾಡಲಾರಂಭಿಸಿದೆ. ಕಳೆದ 2-3 ವರ್ಷಗಳಿಂದ ಕಡಿಮೆಯಾಗುತ್ತ ಬಂದಿದ್ದ ಜಿಎಸ್​ಡಿಪಿ ಈ ಹಣಕಾಸು ವರ್ಷ ಇನ್ನೂ ಹೆಚ್ಚಿನ ಪ್ರಮಾಣದಲ್ಲಿ ಕುಸಿಯುವುದೇ ಎಂಬ ಪ್ರಶ್ನೆ ಉದ್ಭವಿಸಿದೆ. ತೆರಿಗೆ ಸಂಗ್ರಹಣೆ ಕೊರತೆ, ವೆಚ್ಚ ಹೆಚ್ಚಳ, ಕೇಂದ್ರದಿಂದ ಸಿಗದ ಜಿಎಸ್​ಟಿ ಪರಿಹಾರ ಮೊದಲಾದ ಸಮಸ್ಯೆಗಳು ಕುಸಿತಕ್ಕೆ ಕಾರಣವಾಗಿವೆ. ಕಳೆದ ವರ್ಷ ಕಾಡಿದ ಪ್ರವಾಹ, ಈ ವರ್ಷ ಕರೊನಾದಿಂದಾದ ಲಾಕ್​ಡೌನ್, ನೆರೆ ಮೊದಲಾದವುಗಳಿಂದ ಜಿಎಸ್​ಡಿಪಿ ಕುಸಿಯುವುದು ನಿಶ್ಚಿತ ಎಂದು ಹಣಕಾಸು ಇಲಾಖೆಯ ಮೂಲಗಳು ಖಚಿತಪಡಿಸಿವೆ.

ಗುರಿ ಸಾಧನೆ ಕಷ್ಟ: ರಾಜ್ಯದಲ್ಲಿ ಈ ವರ್ಷ ಜಿಎಸ್​ಡಿಪಿ 18,05,742 ಕೋಟಿ ರೂ.ಗಳಾಗಬಹುದೆಂದು ಬಜೆಟ್

ರೂಪಿಸುವ ಸಂದರ್ಭದಲ್ಲಿ ಅಂದಾಜು ಮಾಡಲಾಗಿತ್ತು. ಆದರೆ ಈ ಗುರಿ ಸಾಧಿಸುವುದು ಕಷ್ಟವಾಗಿದೆ. 2019-20ರಲ್ಲಿ ಜಿಎಸ್​ಡಿಪಿ 16.98 ಲಕ್ಷ ಕೋಟಿ ರೂ.ಗಳಿತ್ತು. ಇದರಲ್ಲಿ ಶೇ.6.3 ಹೆಚ್ಚಳ ಸಾಧಿಸುವ ನಿರೀಕ್ಷೆ ಮಾಡಲಾಗಿತ್ತು. ಆದರೆ ಸದ್ಯದ ಹಣಕಾಸು ಸ್ಥಿತಿಯಲ್ಲಿ 17 ಲಕ್ಷ ಕೋಟಿ ರೂ. ಗುರಿ ತಲುಪುವುದೇ ಕಷ್ಟವೆಂದು ಹೇಳಲಾಗುತ್ತಿದೆ. ಜಿಎಸ್​ಡಿಪಿ 2018-19ರಲ್ಲಿ ಶೇ. 7.8ರಷ್ಟು ಇದ್ದದ್ದು, 2019-20ರಲ್ಲಿ ಶೇ. 6.8ಕ್ಕೆ ಇಳಿದಿತ್ತು. ಈ ಹಣಕಾಸು ವರ್ಷದ ಕೊನೆಯ ತ್ರೖೆಮಾಸಿಕದ ವೇಳೆಗೆ ನಿರೀಕ್ಷಿತ ಪ್ರಮಾಣದ ತೆರಿಗೆ ಸಂಗ್ರಹಣೆಯಾಗದೇ ಹೋದರೆ ಶೇ.4ಕ್ಕೆ ತಲುಪಬಹುದೆಂಬ ಅಂದಾಜು ಆರ್ಥಿಕ ತಜ್ಞರಲ್ಲಿದೆ. ಆದರೆ ದಸರಾ, ದೀಪಾವಳಿ, ಕ್ರಿಸ್​ವುಸ್, ಹೊಸ ವರ್ಷಗಳಲ್ಲಿ ಉತ್ತಮ ವ್ಯಾಪಾರ ವಹಿವಾಟು ನಡೆದರೆ ತೆರಿಗೆ ಸಂಗ್ರಹಣೆಯಾಗಿ ಶೇ. 5ರ ಗಡಿ ದಾಟಬಹುದೆಂದು ಹೇಳಲಾಗುತ್ತಿದೆ.

ಕೃಷಿ ಸಾಧನೆ ನಿರೀಕ್ಷೆ: ಜಿಎಸ್​ಡಿಪಿಗೆ ಕೃಷಿ, ಕೈಗಾರಿಕೆ ಹಾಗೂ ಸೇವಾ ವಲಯದಿಂದ ಬರುವ ಕೊಡುಗೆಯನ್ನು ಲೆಕ್ಕ ಹಾಕಲಾಗುತ್ತದೆ. ಈ ವರ್ಷ ಕೃಷಿ ಕ್ಷೇತ್ರದಿಂದ ಉತ್ತಮ ಸಾಧನೆಯ ನಿರೀಕ್ಷೆ ಮಾಡಲಾಗುತ್ತಿದೆ. ಏಕೆಂದರೆ ಈ ಮುಂಗಾರು ಹಂಗಾಮಿನಲ್ಲಿ 30 ಸಾವಿರ ಎಕರೆ ಹೆಚ್ಚುವರಿ ಬಿತ್ತನೆಯಾಗಿದೆ ಎಂಬ ಅಂದಾಜಿದೆ. ಇದರಿಂದ ಕೃಷಿಯ ಕೊಡುಗೆ ಕಳೆದ ಹಣಕಾಸು ವರ್ಷದಲ್ಲಿ ಶೇ. 3.9ರಷ್ಟು ಇದ್ದದ್ದು ಈ ಸಾಲಿನಲ್ಲಿ ಹೆಚ್ಚಾಗಬಹುದು. ಆದರೆ ಕೈಗಾರಿಕೆಯಲ್ಲಿ ಶೇ. 4.8 ಹಾಗೂ ಸೇವಾ ವಲಯದಲ್ಲಿ ಶೇ. 7.9ರಷ್ಟು ಇದ್ದದ್ದು ಲಾಕ್​ಡೌನ್ ಹಾಗೂ ಮತ್ತಿತರ ಕಾರಣಗಳಿಂದ ಕಡಿಮೆಯಾಗುತ್ತದೆ ಎಂದು ಹೇಳಲಾಗುತ್ತಿದೆ.

ಕಾರಣಗಳೇನು?

  • ತೆರಿಗೆ ಸಂಗ್ರಹಣೆ ಕುಸಿತ
  • ಹೆಚ್ಚುತ್ತಿರುವ ವೆಚ್ಚ
  • ಸಿಗದ ಜಿಎಸ್​ಟಿ ಪರಿಹಾರ
  • ನೆರೆ, ಕರೊನಾ ಲಾಕ್​ಡೌನ್

ವಿತ್ತೀಯ ಕೊರತೆ ಕಾಮೋಡ ರಾಜ್ಯದಲ್ಲಿ ಈ ವರ್ಷ ವಿತ್ತೀಯ ಕೊರತೆ 46072 ಕೋಟಿ ರೂ. ಆಗಬಹುದೆಂದು ಹೇಳಲಾಗುತ್ತದೆ. ಇದು ಸಾಕಷ್ಟು ಸಮಸ್ಯೆಗಳಿಗೆ ಕಾರಣವಾಗಿದೆ. ಇದರಿಂದಾಗಿ ಆರ್ಥಿಕ ಸಮಸ್ಯೆಗಳು ಹೆಚ್ಚಾಗಲಿವೆ. ರಾಜಸ್ವ ಉಳಿತಾಯ ಇರುವುದು ಈಗಾಗಲೇ ಕಳೆದ ವರ್ಷಕ್ಕಿಂತ ಈ ವರ್ಷ ಶೇ. 49.7 ಕಡಿಮೆಯಾಗಿದೆ.

ತೆರಿಗೆ ವಸೂಲಿ ಏರುಪೇರಾಗಿದೆ. ಜನವರಿಯಿಂದ ಆರ್ಥಿಕ ಕುಸಿತವಾಗಿತ್ತು. ಆ ನಂತರ ಕರೊನಾ ಬಂತು. ಕೇಂದ್ರ ಕೊಟ್ಟಿರುವ ಪರ್ಯಾಯದ ಪ್ರಕಾರ ಸೆಸ್ ಹಾಕಿದರೆ ಗ್ರಾಹಕರಿಗೆ ಹೊರೆಯಾಗುತ್ತದೆ. ಜನರ ಆದಾಯ ಕುಸಿದು ಖರೀದಿಸುವ ಸ್ಥಿತಿ ಇಲ್ಲ. ಜನರು ಹಾಗೂ ವ್ಯಾಪಾರೋದ್ಯಮಿಗಳಿಗೆ ಹೊರೆಯಾಗದಂತೆ ಸರ್ಕಾರಗಳು ನೋಡಿಕೊಳ್ಳಬೇಕಾಗಿದೆ. | ಬಿ.ಟಿ. ಮನೋಹರ್ ಕೇಂದ್ರ ಹಾಗೂ ರಾಜ್ಯ ಸರ್ಕಾರದ ಜಿಎಸ್​ಟಿ ಸಲಹೆಗಾರ

ವಿತ್ತೀಯ ಕೊರತೆ ಪರಿಣಾಮ

  • ನಿರೀಕ್ಷಿತ ಪ್ರಮಾಣದಲ್ಲಿ ಸಾಲ ಮಾಡಲು ಸಾಧ್ಯವಾಗುವುದಿಲ್ಲ
  • ಅಭಿವೃದ್ಧಿ ಕಾರ್ಯಗಳ ಮೇಲೆ ಪರಿಣಾಮ ಬೀರುತ್ತದೆ
  • ರಾಜಸ್ವ ಕೊರತೆಯಾಗಿ ಸರ್ಕಾರ ನಡೆಸುವುದು ಸಮಸ್ಯೆಯಾಗುತ್ತದೆ
  • ಖಾಲಿ ಹುದ್ದೆಗಳ ಭರ್ತಿಗೆ ಸಾಧ್ಯವಾಗದ ಸ್ಥಿತಿ ನಿರ್ವಣವಾಗುತ್ತದೆ
  • ಬಡ್ಡಿ ಪಾವತಿಗೂ ಸಮಸ್ಯೆಯಾಗಬಹುದು

ವಿತ್ತೀಯ ಕೊರತೆ ಹೆಚ್ಚಾದರೆ ಸಾಕಷ್ಟು ಸಮಸ್ಯೆ ಸೃಷ್ಟಿಯಾಗುತ್ತವೆ. ರಾಜ್ಯಸ್ವ ಕೊರತೆ ಉಂಟಾಗಿ ಸರ್ಕಾರ ನಡೆಸುವುದು ಕಷ್ಟವಾಗುತ್ತದೆ. ಕೈಗಾರಿಕೆ, ಹೂಡಿಕೆ ಹೆಚ್ಚಾಗಬೇಕು. ಹೊಸ ರೀತಿಯ ಸಂಪನ್ಮೂಲ ಹುಡುಕಿಕೊಳ್ಳಬೇಕು. | ಮಧುಸೂದನ ರಾವ್ ಅರ್ಥಶಾಸ್ತ್ರಜ್ಞ

ತಜ್ಞರ ಸಲಹೆಗಳು

  • ಮೂಲಸೌಕರ್ಯದ ಕಡೆ ಹೆಚ್ಚಿನ ಹೂಡಿಕೆಗೆ ಆದ್ಯತೆ
  • ಹೊಸ ಸಂಪನ್ಮೂಲಗಳ ಕಡೆ ಗಮನ ಹರಿಸಬೇಕು
  • ತೆರಿಗೆಯೇತರ ಆದಾಯದ ಕಡೆ ಒತ್ತು ಕೊಡಬೇಕು
  • ಸಾಲದ ಪ್ರಮಾಣ ಹೆಚ್ಚಳ ಮಾಡಲು ಆದ್ಯತೆ
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net