ಎಸ್ಸೆಸ್ಸೆಲ್ಸಿ ಮಕ್ಕಳಿಗೆ ಮಿಸ್ಡ್‌ಕಾಲ್ ಅಲರ್ಟ್, ಪ್ರಥಮ ಸ್ಥಾನಕ್ಕೆ ಗ್ರಾಮಾಂತರ ಜಿಲ್ಲೆ ಕಸರತ್ತು ಶಿಕ್ಷಣ ಇಲಾಖೆಯಲ್ಲಿ ಸಮರೋತ್ಸಾಹ

ಶಿವರಾಜ ಎಂ. ಬೆಂಗಳೂರು

ಹೇ ಟೀಚರ್‌ಗೆ ಮಿಸ್ಡ್‌ಕಾಲ್ ಕೊಡ್ರಪ್ಪ. ಆಗಲೆ ಬೆಳಗ್ಗೆ 5 ಗಂಟೆ ಆಗಿದೆ. ಎದ್ದೇಳಿ ಓದ್ಕೋಳಿ... ಈ ವರ್ಷ ಕಷ್ಟ ಪಟ್ಟು ಓದಿ, ಜೀವನದಲ್ಲಿ ಇದು ಟರ್ನಿಂಗ್ ಪಾಯಿಂಟ್... ಇದು ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿಗಳ ಮನೆಗಳಲ್ಲಿ ಬೆಳ್ಳಂಬೆಳಗ್ಗೆ ಕೇಳಿಬರುತ್ತಿರುವ ಮೊಬೈಲ್ ಅಲರ್ ್ಟ..!

ಹೌದು. ಕಳೆದ ಸಾಲಿನ ಎಸ್ಸೆಸ್ಸೆಲ್ಸಿ ಲಿತಾಂಶದಲ್ಲಿ ರಾಜ್ಯಕ್ಕೆ ಮೂರನೇ ಸ್ಥಾನ ಪಡೆದು ಬೀಗಿದ್ದ ಬೆಂಗಳೂರು ಗ್ರಾಮಾಂತರ ಜಿಲ್ಲೆ, ಈ ಬಾರಿ ಶತಾಯಗತಾಯ ಪ್ರಥಮ ಸ್ಥಾನ ದಕ್ಕಿಸಿಕೊಳ್ಳಲೇಬೇಕು ಎಂಬ ಸಮರೋತ್ಸಾಹದಲ್ಲಿದೆ. ಇದಕ್ಕಾಗಿ ಅನೇಕ ಯೋಜನೆಗಳ ಮೂಲಕ ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿಗಳನ್ನು ಹುರಿದುಂಬಿಸುತ್ತಿರುವ ಸಾರ್ವಜನಿಕ ಶಿಕ್ಷಣ ಇಲಾಖೆ ಮಿಸ್ಡ್‌ಕಾಲ್ ಅಭಿಯಾನ ಆರಂಭಿಸಿದೆ. ಆಯಾ ಶಾಲಾ ವ್ಯಾಪ್ತಿಯ ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿಗಳು ಪ್ರತಿ ದಿನ ಮುಂಜಾನೆ 5 ಗಂಟೆಗೆ ಆಯಾ ಶಿಕ್ಷಕರ ಮೊಬೈಲ್‌ಗೆ ಮಿಸ್ಡ್‌ಕಾಲ್ ಕೊಡುತ್ತಿದ್ದಾರೆ. ನಾವು ಎದ್ದೀದೀವಿ, ಅಭ್ಯಾಸ ಆರಂಭಿಸಿದ್ದೇವೆ ಎಂಬ ಸಂದೇಶ ರವಾನಿಸುತ್ತಿದ್ದಾರೆ. ಮುಂಜಾನೆ ಬೇಗ ಎದ್ದು ಅಭ್ಯಾಸದಲ್ಲಿ ತೊಡಗುವ ಅಭ್ಯಾಸ ಮೂಡಿಸಲು ಹಾಗೂ ಅದರ ನಿರಂತರತೆಯನ್ನು ಕಾಯ್ದುಕೊಳ್ಳಲು ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿಗಳ ಜವಾಬ್ದಾರಿಯನ್ನು ಆಯಾ ಶಿಕ್ಷಕರ ಹೆಗಲಿಗೆ ಹೊರಿಸಲಾಗಿದೆ. ಇದೇ ‘ಮಿಸ್ಡ್‌ಕಾಲ್ ಅಲರ್ಟ್’

ಶಿಕ್ಷಣ ಇಲಾಖೆ ಕಸರತ್ತು: ಎಸ್ಸೆಸ್ಸೆಲ್ಸಿ ಪರೀಕ್ಷೆ ಪ್ರತಿ ವಿದ್ಯಾರ್ಥಿ ಜೀವನದ ಟರ್ನಿಂಗ್ ಪಾಯಿಂಟ್. ಭವಿಷ್ಯ ಸುಭದ್ರವಾಗಿರಬೇಕಾದರೆ ಎಸ್ಸೆಸ್ಸೆಲ್ಸಿ ಪರೀಕ್ಷೆಯನ್ನು ದಿಟ್ಟವಾಗಿ ಎದುರಿಸಲೇಬೇಕು. ಈ ಹಿನ್ನೆಲೆಯಲ್ಲಿ ಜಿಲ್ಲೆಯ ಎಲ್ಲ ತಾಲೂಕುಗಳಲ್ಲೂ ಖುದ್ದು ಶಿಕ್ಷಕರು ಜಿದ್ದಿಗೆ ಬಿದ್ದವರಂತೆ ವಿದ್ಯಾರ್ಥಿಗಳನ್ನು ಓದಿನೆಡೆಗೆ ಹುರಿದುಂಬಿಸುವ ಕಾರ್ಯದಲ್ಲಿ ತೊಡಗಿದ್ದಾರೆ. ಇದರ ಪರಿಣಾಮವೇ ಮಿಸ್ಡ್‌ಕಾಲ್ ಅಲರ್ಟ್ ರೂಪಿತಗೊಂಡಿದೆ.

ವಿಶೇಷ ತರಗತಿ: ಶಾಲೆ ಆರಂಭಕ್ಕೂ ಮೊದಲು 1 ಗಂಟೆ, ಶಾಲೆ ಮುಗಿದ ಬಳಿಕ ಸಂಜೆ ವೇಳೆ 1 ಗಂಟೆ ವಿಶೇಷ ತರಗತಿ ಆರಂಭಿಸಲಾಗಿದೆ. ಪ್ರತಿ ದಿನ ವಿದ್ಯಾರ್ಥಿಗಳಿಗೆ ಹೆಚ್ಚಿನ ಪಾಠಪ್ರವಚನ, ಗ್ರೂಪ್ ಸ್ಟಡಿ, ವಿಷಯ ವಿನಿಮಯ ಮತ್ತಿತರ ಚಟುವಟಿಕೆಗಳನ್ನು ಆರಂಭಿಸಲಾಗಿದೆ. ಪ್ರತಿ ತಿಂಗಳು ಜಿಲ್ಲೆ ಎಲ್ಲ ಶಾಲೆಯ ಮುಖ್ಯಶಿಕ್ಷಕರ ವಿಶೇಷ ಸಭೆ ಕರೆದು ಎಸ್ಸೆಸ್ಸೆಲ್ಸಿಯಲ್ಲಿ ಗುಣಾತ್ಮಕ ಲಿತಾಂಶ ಪಡೆಯುವುದರ ಬಗ್ಗೆ ಸಲಹೆ ಸೂಚನೆಗಳ ವಿಷಯ ವಿನಿಮಯ ನಡೆಯುತ್ತಿದೆ.