ಶ್ರೀ ವಾಗೀಶ ಪಂಡಿತಾರಾಧ್ಯ ಭಗವತ್ಪಾದರು 1908ರಲ್ಲಿ ಈಗಿನ ಹಾವೇರಿ ಜಿಲ್ಲೆಯ ರಾಣೆಬೆನ್ನೂರು ತಾಲ್ಲೂಕಿನ ಮುದೇನೂರು ಗ್ರಾಮದ ಹಿರೇಮಠದ ವೇದಮೂರ್ತಿ ಬಸಯ್ಯ ಸ್ವಾಮಿ ಮತ್ತು ರುದ್ರಮ್ಮಾಂಬೆ ಅವರ ಪುಣ್ಯಗರ್ಭದಲ್ಲಿ ಜನಿಸಿ ಚಿಕ್ಕಂದಿನಲ್ಲಿಯೇ ವೀರಶೈವಧರ್ಮ ಸಂಸ್ಕಾರಗಳನ್ನು ಮೈಗೂಡಿಸಿಕೊಂಡವರು. ಸಿದ್ಧಾಂತ ಶಿಖಾಮಣಿ, ಯೋಗಶಾಸ್ತ್ರ, ವೇದೋಪನಿಷತ್ ಹಾಗೂ ವಚನ ಸಾಹಿತ್ಯವನ್ನು ಆಳವಾಗಿ ಅಭ್ಯಸಿಸಿ ಅಗಾಧ ಪ್ರಭೆಯನ್ನು ತಮ್ಮದಾಗಿಸಿಕೊಂಡವರು. ಉಜ್ಜಯಿನಿ ಸದ್ದರ್ಮ ಪೀಠದ ಲಿಂ. ಸಿದ್ಧಲಿಂಗ ಶಿವಾಚಾರ್ಯ ಭಗವತ್ಪಾದರ ಕೃಪೆಗೆ ಪಾತ್ರರಾಗಿ ಅವರ ಮಾರ್ಗದರ್ಶನದಲ್ಲಿ ಬೆಳೆದವರು. ಕಾಶಿ ಪೀಠದಲ್ಲಿ ವೀರಶೈವ ಸಿದ್ಧಾಂತ ಮತ್ತು ಭಾರತೀಯ ಸನಾತನ ಧರ್ಮ ಸಂಸ್ಕೃತಿಯ ಹೆಚ್ಚಿನ ಅಧ್ಯಯನವನ್ನು ಕೈಗೊಂಡು ವಿದ್ಯಾನಿಧಿಯಾಗಿ ಹೊರಹೊಮ್ಮಿದರು. ಪಾಲಿ, ಪಾರ್ಸಿ, ಸಂಸ್ಕೃತ, ಬಂಗಾಳಿ, ಹಿಂದಿ, ಉರ್ದು, ಕನ್ನಡ, ತೆಲುಗು ಭಾಷೆಗಳನ್ನು ಕಲಿತು ಅವುಗಳಲ್ಲಿ ನಿರರ್ಗಳವಾಗಿ ಮಾತನಾಡುತ್ತ ಪ್ರವಚನ ನೀಡುವ ಅವರ ಪರಿ ಅದ್ವಿತೀಯವಾಗಿ ಇರುತ್ತಿತ್ತು. ತಮ್ಮ ಸರ್ವಾಂಗ ಸುಂದರ ಕಾಯ ಮತ್ತು ವ್ಯಕ್ತಿತ್ವದ ಮೂಲಕ ಎಲ್ಲ ಭಕ್ತರನ್ನು ಆಕರ್ಷಿಸುವ ಆಯಸ್ಕಾಂತೀಯ ಗುಣ ಅವರಲ್ಲಿತ್ತು, ಅಂಥ ಮಹಾಮಹಿಮರು 1940ರ ಜುಲೈ 7ರಂದು ಶ್ರೀಶೈಲ ಪೀಠದ ಅಧಿಪತ್ಯವನ್ನು ವಹಿಸಿಕೊಂಡು ಶ್ರೀಪೀಠವನ್ನು ಉತ್ತುಂಗಕ್ಕೆರಿಸಿದ ಧೀರೋದಾತ್ತರು.
