ಕೆಲ ಮಾಧ್ಯಮಗಳು ಸಾಕುನಾಯಿಗಳಾಗುತ್ತಿವೆ; ಎಚ್​.ಎಸ್​. ದೊರೆಸ್ವಾಮಿ ಆತಂಕ

ಬೆಂಗಳೂರು: ಇತ್ತೀಚಿನ ದಿನಗಳಲ್ಲಿ ಕೆಲ ಮಾಧ್ಯಮಗಳು ಕಾವಲು ನಾಯಿಗಳ ಹಾಗೆ ಕೆಲಸ ಮಾಡದೆ ಸಾಕುನಾಯಿಗಳಂತೆ ವರ್ತಿಸುತ್ತಿರುವುದು ಆತಂಕದ ವಿಷಯ ಎಂದು ಸ್ವಾತಂತ್ರ್ಯ ಹೋರಾಟಗಾರ ಎಚ್.ಎಸ್. ದೊರೆಸ್ವಾಮಿ ಹೇಳಿದ್ದಾರೆ.

ಕರ್ನಾಟಕ ಪತ್ರಕರ್ತರ ಸಹಕಾರ ಸಂಘದ ಶುಕ್ರವಾರ ಏರ್ಪಡಿಸಿದ್ದ ‘ಸಂಘದ 70ನೇ ವರ್ಷದ ಸಮಾರಂಭ’ ಮತ್ತು ಮಾಧ್ಯಮ ಟ್ವೆಂಟಿ20 ಸ್ಮರಣಸಂಚಿಕೆ ಬಿಡುಗಡೆ ಸಮಾರಂಭದಲ್ಲಿ ಮಾತನಾಡಿದರು. ದೊಡ್ಡ ಮಟ್ಟದ ಪತ್ರಿಕೆಗಳು ಪತ್ರಕರ್ತರಿಗೆ ಅಂಕುಶ ಹಾಕಬಾರದು. ಅದರಿಂದ ವಸ್ತುನಿಷ್ಠ ವರದಿ ಹೊರಬರಲು ಸಾಧ್ಯವಾಗುತ್ತದೆ ಎಂದರು.

ಇತ್ತೀಚಿನ ದಿನಗಳಲ್ಲಿ ಸುದ್ದಿ ರೂಪದ ಜಾಹೀರಾತುಗಳು ಹೆಚ್ಚುತ್ತಿವೆ. ಅದರಿಂದ ಜನರು ಹೆಚ್ಚು ಪ್ರಭಾವಿತರಾಗುತ್ತಿದ್ದಾರೆ. ಅದನ್ನು ಕಡಿಮೆ ಮಾಡಬೇಕು. ಹಾಗೆಯೇ, ಸಣ್ಣಪತ್ರಿಕೆಗಳು ಪ್ರಜಾಪ್ರಭುತ್ವ ಉಳಿಸುವ ಕೆಲಸ ಮಾಡುತ್ತಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದರು.

ಪರಿಪೂರ್ಣ ಅಧ್ಯಯನ ಮುಖ್ಯ: ಆದಿಚುಂಚನಗಿರಿ ಮಠದ ಶ್ರೀ ಡಾ. ನಿರ್ಮಲಾನಂದನಾಥ ಸ್ವಾಮೀಜಿ ಮಾತನಾಡಿ, ಅರೆಬೆಂದ ಮಾಹಿತಿಯಿಂದ ಉಪದೇಶ ಮತ್ತು ಬರವಣಿಗೆ ಸರಿಯಲ್ಲ. ಸರಿಯಾಗಿ ಅಧ್ಯಯನ ಮಾಡಿ, ಪೂರ್ಣಪ್ರಮಾಣದ ಮಾಹಿತಿ ಪಡೆದು ವರದಿ ಮಾಡಿದರೆ ಪತ್ರಕರ್ತರು ಕೂಡ ಸಾಹಿತಿಗಳಾಗಿ ರೂಪುಗೊಳ್ಳುತ್ತಾರೆ ಎಂದರು. ಪತ್ರಕರ್ತನಾದವನು ಪ್ರತಿ ವಿಷಯವನ್ನು ಆಳವಾಗಿ ತಿಳಿದುಕೊಳ್ಳಬೇಕು. ಬರೆ ಯುವವರಿಗೆ ಸಂಸ್ಕಾರ, ಸಂಸ್ಕೃತಿಯ ಬಗ್ಗೆ ಅರಿವಿರ ಬೇಕು. ಹಾಗೆಯೇ, ಆತ್ಮವಿಮರ್ಶೆ ಮೂಲಕ ಎತ್ತರಕ್ಕೆ ಬೆಳೆಯಬೇಕು ಎಂದು ಸಲಹೆ ನೀಡಿದರು.

ಉಪಮುಖ್ಯಮಂತ್ರಿ ಡಾ. ಸಿ.ಎನ್. ಅಶ್ವತ್ಥನಾರಾಯಣ, ಸಂಘದ ಅಧ್ಯಕ್ಷ ಎಂ.ಎಸ್. ರಾಜೇಂದ್ರಕುಮಾರ್, ಹಿರಿಯ ಪತ್ರಕರ್ತ ಚ.ಹ. ರಘುನಾಥ ಮತ್ತಿತರರಿದ್ದರು.