ಹೊಸದಾಗಿ ಪರಿಚಯಿಸಲಾಗುತ್ತಿರುವ ನಾಗರಿಕ ಸ್ಪಂದನೆಯಲ್ಲಿ ಬಿಡಿಎಗೆ ಸೇರಿದ ವಿವಿಧ ಬಡಾವಣೆಗಳ ಸೈಟ್ ಹಂಚಿಕೆ ಪ್ರಕರಣಗಳನ್ನು ಪರಿಗಣಿಸಲಾಗುತ್ತದೆ ಎಂಬುದು ಖಾತ್ರಿಪಡಿಸಿಲ್ಲ. ಹಲವು ವರ್ಷಗಳಿಂದ ಅರ್ಹತೆ ಇದ್ದರೂ, ನಿವೇಶನ ಹಂಚಿಕೆಯಾಗದ ಪ್ರಕರಣಗಳು ಸಾಕಷ್ಟಿವೆ. ಅದರಲ್ಲೂ ಅರ್ಕಾವತಿ ಲೇಔಟ್, ಕೆಂಪೇಗೌಡ ಲೇಔಟ್ ಸಹಿತ ಇನ್ನಿತರ ಬಡಾವಣೆಗಳಲ್ಲಿ ಅರ್ಜಿದಾರರು ಎಲ್ಲ ಶುಲ್ಕ ಹಾಗೂ ದಾಖಲಾತಿ ನೀಡಿದ್ದರೂ, ನೋಂದಣಿ ಮಾಡಿಕೊಟ್ಟಿಲ್ಲ. ಇನ್ನೂ ಕೆಲವಕ್ಕೆ ದಾಖಲೆಪತ್ರಗಳನ್ನು ವಿತರಿಸಿಲ್ಲ. ಇಂತಹ ನೂರಾರು ಪ್ರಕರಣಗಳಲ್ಲಿ ತಾಂತ್ರಿಕ ನೆಪವೊಡ್ಡಿ ಜನರಿಗೆ ಸೌಲಭ್ಯ ಒದಗಿಸಲು ಪ್ರಾಧಿಕಾರ ಮೀನಮೇಷ ಎಣಿಸುತ್ತಿದೆ. ಹಾಗಾಗಿ ಆಯುಕ್ತರು ಆರಂಭಿಸಲಿರುವ ಹೊಸ ವ್ಯವಸ್ಥೆಯಿಂದ ನಮಗೆ ನ್ಯಾಯ ಸಿಗುವುದೇ ಎಂಬ ಅನುಮಾನವನ್ನು ಸೈಟ್ ಹಂಚಿಕೆದಾರರು ವ್ಯಕ್ತಪಡಿಸಿದ್ದಾರೆ.
