ಕನ್ನಡದ ನಂ.1 ದಿನಪತ್ರಿಕೆ ವಿಜಯವಾಣಿ ಹೇಗೆ ತಯಾರಾಗುತ್ತದೆ ಎಂಬ ಪ್ರಶ್ನೆಗೆ ಉತ್ತರ ಕಂಡುಕೊಳ್ಳಲು ವಿದ್ಯಾರ್ಥಿಗಳು ಉತ್ಸಾಹದಿಂದ ಕಚೇರಿಗೆ ಆಗಮಿಸಿದ್ದರು. ಅವರು ಮೊದಲು ಸಂಪಾದಕೀಯ ವಿಭಾಗಕ್ಕೆ ಭೇಟಿ ನೀಡಿ, ಸುದ್ದಿಗಳು ಹೇಗೆ ಸಂಗ್ರಹವಾಗುತ್ತವೆ, ಅವುಗಳನ್ನು ಹೇಗೆ ಪರಿಶೀಲಿಸಿ, ಸಂಪಾದಿಸಲಾಗುತ್ತದೆ ಮತ್ತು ಪತ್ರಿಕೆಯಲ್ಲಿ ಪ್ರಕಟಿಸಲು ಸಿದ್ಧಪಡಿಸಲಾಗುತ್ತದೆ ಎಂಬುದನ್ನು ತಿಳಿದುಕೊಂಡರು. ಪತ್ರಿಕೆಯ ವಿಶ್ವಾಸಾರ್ಹತೆ ಕಾಪಾಡುವ ಜವಾಬ್ದಾರಿ, ಸುಳ್ಳು ಸುದ್ದಿಗಳ ಸವಾಲುಗಳು ಮತ್ತು ಪತ್ರಿಕೆಯ ಮೇಲೆ ಜಾಹೀರಾತುಗಳ ಪಾತ್ರದ ಬಗ್ಗೆಯೂ ಪತ್ರಿಕಾ ಕಚೇರಿಯ ಸಿಬ್ಬಂದಿ ವಿದ್ಯಾರ್ಥಿಗಳಿಗೆ ವಿವರವಾದ ಮಾಹಿತಿ ನೀಡಿದರು. ಸುದ್ದಿಯನ್ನು ಸಂಗ್ರಹಿಸುವ ವಿಧಾನ, ಛಾಯಾಚಿತ್ರಗಳ ಗುಣಮಟ್ಟ, ಅವುಗಳನ್ನು ಸಂಪಾದಿಸುವುದು ಮತ್ತು ಪುಟ ವಿನ್ಯಾಸ ಮಾಡುವುದು ಹೇಗೆ ಎಂಬುದರ ಕುರಿತು ಪ್ರಾಯೋಗಿಕವಾಗಿ ವಿವರಿಸಲಾಯಿತು.
