ಮೈದುಂಬಿದೆ ಅಂಬೋಲಿ ಜಲಪಾತ

ಜಲಪಾತ ವೀಕ್ಷಣೆಗೆ ಕರೊನಾ ಭೀತಿ | ಪ್ರವಾಸ ಪ್ರಿಯರಿಗೆ ಈ ಬಾರಿ ನಿರಾಸೆ

ಬೆಳಗಾವಿ: ಮಳೆಗಾಲದಲ್ಲಿ ಪ್ರವಾಸಿಗಳನ್ನು ತನ್ನತ್ತ ಸೆಳೆದುಕೊಳ್ಳುವ ರಮಣೀಯ ತಾಣ, ಸಮುದ್ರ ಮಟ್ಟದಿಂದ 690 ಮೀಟರ್ ಎತ್ತರದಲ್ಲಿ ಪರ್ವತ ಶ್ರೇಣಿಗಳ ಮಧ್ಯೆ ಧುಮ್ಮಿಕ್ಕುವ ಅಂಬೋಲಿ ಜಲಪಾತ ಮಾನ್ಸೂನ್‌ನಿಂದ ಈ ಬಾರಿ ಮತ್ತೆ ಮೈದುಂಬಿದೆ. ಆದರೆ, ಕ್ಷೀರದಂತೆ ಹರಿಯುತ್ತಿರುವ ಜಲಪಾತದ ಸೊಬಗು ನೋಡುವ ಅವಕಾಶ ಪ್ರವಾಸಿಗರಿಗಿಲ್ಲ. ಕಾರಣ, ಕರೊನಾ….

ಬೆಳಗಾವಿಯಿಂದ 60 ಕಿ.ಮೀ. ದೂರದಲ್ಲಿರುವ ಅಂಬೋಲಿ ಜಲಪಾತ ದೇಶ-ವಿದೇಶದ ಪ್ರವಾಸಿಗರ ನೆಚ್ಚಿನ ತಾಣವಾಗಿದೆ. ಆದರೆ, ಗಡಿ ಪಕ್ಕದಲ್ಲೇ ಇರುವ ಮಹಾರಾಷ್ಟ್ರ ರಾಜ್ಯದಲ್ಲಿ ಕರೊನಾ ಸೋಂಕಿತರ ಸಂಖ್ಯೆ ದಿನೇ ದಿನೆ ಹೆಚ್ಚಾಗುತ್ತಿದ್ದು, ಕರ್ನಾಟಕ-ಮಹಾರಾಷ್ಟ್ರ ಸಂಪರ್ಕಿಸುವ ಗಡಿ ರಸ್ತೆಯನ್ನು ಬಂದ್ ಮಾಡಲಾಗಿದೆ. ಹೀಗಾಗಿ ಅಂಬೋಲಿ ಜಲಪಾತದ ಸೌಂದರ್ಯ ಸವಿಯಲು ಹೋಗಬಯಸುವ ಪ್ರಕೃತಿ ಪ್ರಿಯರಿಗೆ ತೊಡಕಾಗಿದೆ.

ಜಲಲ ಧಾರೆ: ಪಶ್ಚಿಮ ಘಟ್ಟಗಳಲ್ಲಿ ಉತ್ತಮ ಮಳೆಯಾಗುತ್ತಿದ್ದು, ಸಾವಂತವಾಡಿ ತಾಲೂಕಿನ ಅಂಬೋಲಿ ಸುತ್ತಮುತ್ತಲಿನ ಪ್ರದೇಶದಲ್ಲಿ ಈವರೆಗೆ 850ಕ್ಕೂ ಹೆಚ್ಚು ಮಿಲಿ ಮೀಟರ್ ಮಳೆ ದಾಖಲಾಗಿದೆ. ಇದರಿಂದ ಅಂಬೋಲಿ ಜಲಪಾತ ಮೈದುಂಬಿ ಧುಮ್ಮಿಕ್ಕುತ್ತಿದೆ. ಹಸಿರಿನ ಮಧ್ಯೆ ಗೋಚರಿಸುತ್ತಿರುವ ಜಲಲ ಧಾರೆಯ ಸೊಬಗನ್ನು ಸ್ಥಳೀಯರು ವಿಡಿಯೋ ಮಾಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.

ಜಲಪಾತ ಬಳಿ ಹಲವಾರು ಪ್ರವಾಸಿ ತಾಣ

ಅಂಬೋಲಿ ಜಲಪಾತ ಹಾಗೂ ಘಾಟ್ ವೀಕ್ಷಿಸಲು ಕಳೆದ ವರ್ಷ ಬೆಳಗಾವಿ ಸಾರಿಗೆ ಸಂಸ್ಥೆಯಿಂದ ವಿಶೇಷ ಸಾರಿಗೆ ವ್ಯವಸ್ಥೆ ಕಲ್ಪಿಸಲಾಗಿತ್ತು. ಹೀಗಾಗಿ ಅಂಬೋಲಿ ಜತೆಗೆ ಹಸಿರು ವನಸಿರಿ, ಮೈಮನ ತಣಿಸುವ ಕವಳಾಶೇತ್, ಬಾಬಾ ಾಲ್ಸ್, ಹಿರಣ್ಯಕೇಶಿ ದೇವಸ್ಥಾನ, ತಿಲ್ಲಾರಿ ಫಾಲ್ಸ್, ಸ್ವಪ್ನವೇಲ್ ಪಾಯಿಂಟ್ ಹಾಗೂ ಇನ್ನಿತರ ರಮಣೀಯ ಪ್ರದೇಶ ನೋಡಬಹುದಾಗಿದೆ. ಪ್ರತಿವರ್ಷ ಮಳೆಗಾಲದಲ್ಲಿ ಇಲ್ಲಿ ಜನದಟ್ಟಣೆ ಇರುತ್ತದೆ. ಕಾಲೇಜ್ ಯುವಕ-ಯುವತಿಯರು, ಕುಟುಂಬ ಸಮೇತ ಆಗಮಿಸುವವರು, ಚಿಣ್ಣರು-ಹಿರಿಕಿರಿಯರು ಸೇರಿ ದಿನವೂ ಸಾವಿರಾರು ಜನರು ಸೇರುತ್ತಿದ್ದರು. ಆದರೆ, ಕರೊನಾ ವೈರಸ್ ಭಯದಿಂದ ಪ್ರವಾಸಿಗರು ಇತ್ತ ಸುಳಿಯುತ್ತಿಲ್ಲ.

| ಧರ್ಮರಾಜ ಪಾಟೀಲ