ಪ್ರಶಾಂತ ರಿಪ್ಪನ್ಪೇಟೆ, ಬೆಂಗಳೂರು : ಸ್ಕಂದ, ಕಾರ್ತಿಕೇಯ, ಮುರುಗನ್, ಷಣ್ಮುಖ ಇತ್ಯಾದಿ ಹೆಸರುಗಳಿಂದ ಕರೆಯಲ್ಪಡುವ ಶಿವನ ಪುತ್ರ ಸುಬ್ರಹ್ಮಣ್ಯನು ಮಹಾಪರಾಕ್ರಮಿ ಮಾತ್ರವಲ್ಲ ಮಹಾಜ್ಞಾನಿಯೂ ಹೌದು. ಷಣ್ಮುಖನು ಶಿವಧರ್ಮೋತ್ತರ ಸಿದ್ಧಾಂತ ಪ್ರತಿಪಾದಿಸಿ ಕೀರ್ತಿಶೇಷನಾಗಿರುವ ಮಹಾನುಭಾವ. ಜಗದೊಡೆಯನಾದ ಮಹಾದೇವನಿಗೆ ಓಂಕಾರ ಬೋದನೆ ಮಾಡಿದ ಮಹಾಜ್ಞಾನಿ.
ತನ್ನ ಶರೀರದ ತೇಜಸ್ಸಿನಿಂದ ರಾಕ್ಷಸರೆಲ್ಲರನ್ನು ಸಂಹಾರ ಮಾಡುವ ಸಾಮರ್ಥ್ಯವನ್ನು ಹೊಂದಿದ್ದ ಸ್ಕಂದನ ಕುರಿತು ಮಹರ್ಷಿ ವ್ಯಾಸರು ಸ್ಕಂದಪುರಾಣ, ಬ್ರಹ್ಮಾಂಡ ಪುರಾಣ, ವಾಯು ಪುರಾಣ ಮತ್ತು ಮಹಾಭಾರತದ ಅನುಶಾಸನ ಪರ್ವದಲ್ಲಿ ಪ್ರಸಂಗಾನುಸಾರವಾಗಿ ವಿವರಿಸಿದ್ದಾರೆ. ಮಹಾಕವಿ ಕಾಳಿದಾಸನು ಕುಮಾರಸಂಭವ ಮಹಾಕಾವ್ಯದಲ್ಲಿ ಸ್ಕಂದನನ್ನು ವಿಶೇಷವಾಗಿ ವರ್ಣಿಸಿದ್ದಾನೆ. ಕಾರ್ತಿಕೇಯ, ಸೇನಾನಿ, ಪಳನಿಸ್ವಾಮಿ, ಶರಜನ್ಮಾ, ಷಡಾನನ, ಗುಹ, ಶಿಖಿವಾಹನ, ವೇಲಾಯುದ, ತಾರಕಾರಿ, ಕುಮಾರ, ಷಾಣ್ಮಾತುರ, ಶರವಣ, ಮುರುಗನ್ ಮುಂತಾದ ಅನೇಕ ಹೆಸರುಗಳು ಸ್ಕಂದನ ಪರಾಕ್ರಮ, ವ್ಯಕ್ತಿತ್ವ, ವಿಶೇಷತೆಯನ್ನು ವಿವರಿಸುತ್ತವೆ.
ಭಾರತ ಮಾತ್ರವಲ್ಲದೆ ಶ್ರೀಲಂಕಾ, ಮಲೇಶಿಯಾ, ಸಿಂಗಾಪುರ, ಥೈಲ್ಯಾಂಡ್, ಇಂಡೋನೇಷಿಯಾ, ದಕ್ಷಿಣ ಆಫ್ರಿಕಾ, ಕೆನಡಾ, ಯುನೈಟೆಡ್ ಸ್ಟೇಟ್ಸ್ಗಳಲ್ಲಿ ಕೂಡ ಸುಬ್ರಹ್ಮಣ್ಯಸ್ವಾಮಿ ದೇವಾಲಯಗಳಿದ್ದು ಅಲ್ಲಿಯೂ ಕೂಡ ಪಳನಿಸ್ವಾಮಿಯ ಉಪಾಸನೆ ನಡೆಯುತ್ತದೆ. ಸುಬ್ರಹ್ಮಣ್ಯನನ್ನು ಪೂಜಿಸುವುದರಿಂದ ಸಾಂಸಾರಿಕ ಸಮಸ್ಯೆಗಳಾದ ವಧು-ವರರ ವಿವಾಹ, ವೈವಾಹಿಕ ಜೀವನ, ಸಂತಾನ ಪ್ರಾಪ್ತಿ, ಭೂ ವಿವಾದ ಮತ್ತಿತರ ಸಮಸ್ಯೆಗಳಿಗೆ ಪರಿಹಾರ ದೊರೆಯುತ್ತದೆ ಎಂಬ ನಂಬಿಕೆ ಭಕ್ತರಲ್ಲಿದೆ. ಜನ್ಮ ಜಾತಕದಲ್ಲಿನ ಸರ್ಪದೋಷ, ಕುಜದೋಷಾದಿಗಳ ಪರಿಹಾರಕ್ಕೆ ಸುಬ್ರಹ್ಮಣ್ಯನ ಆರಾಧನೆ ಅಗತ್ಯ ಎಂದು ಜ್ಯೋತಿಷ್ಯ ಶಾಸ್ತ್ರದ ವಿಶ್ಲೇಷಣೆಗಳಿದ್ದು, ನಾಡಿನ ಪ್ರಸಿದ್ಧ ಕುಕ್ಕೆ ಸುಬ್ರಹ್ಮಣ್ಯ ಕ್ಷೇತ್ರದಲ್ಲಿ ವರ್ಷಪೂರ್ತಿ ಈ ಸಂಬಂಧ ವಿಶೇಷ ಪೂಜಾದಿಗಳು ನಡೆಯುತ್ತವೆ. ಕ್ರಿಕೆಟ್ ತಾರೆಯರು, ಸಿನಿಮಾರಂಗದ ನಟ-ನಟಿಯರು, ವಿವಿಧ ಕ್ಷೇತ್ರದ ಖ್ಯಾತನಾಮರು ಮೇಲಿಂದ ಮೇಲೆ ಕುಕ್ಕೆ ಸುಬ್ರಮಣ್ಯ ಕ್ಷೇತ್ರಕ್ಕೆ ಆಗಮಿಸುವುದು ಇತ್ತೀಚಿನ ದಿನಗಳಲ್ಲಿ ಸರ್ವೇ ಸಾಮಾನ್ಯವಾಗಿದೆ.
