ಅಧಿಕಾರಿಗಳೊಂದಿಗೆ ಸ್ಥಳ ಪರಿಶೀಲನೆ ತಾಜ್​ಬಾವಡಿ ಸ್ಮಾರಕ ಸೌಂದರೀಕರಣಕ್ಕೆ ಕ್ರಮ

ವಿಜಯಪುರ:ನಗರದಲ್ಲಿರುವ ಐತಿಹಾಸಿಕ ತಾಜ್​ ಬಾವಡಿ ಸ್ಮಾರಕಕ್ಕೆ ಜಿಲ್ಲಾಧಿಕಾರಿ ಡಾ. ಆನಂದ ಕೆ. ಅವರು ಅಧಿಕಾರಿಗಳೊಂದಿಗೆ ಮಂಗಳವಾರ ಸ್ಥಳ ಪರಿಶೀಲನೆ ನಡೆಸಿದರು.ಅಡಾಪ್ಟ್​ ಎ ಮೊನೊಮೆಂಟ್​ ಯೋಜನೆಯಡಿ ತಾಜ್​ ಬಾವಡಿ ಸ್ಮಾರಕವನ್ನು ವರ್ಲ್ಡ್​ ಮಾನ್ಯುಮೆಂಟ್​ ಫಂಡ್​ ಇಂಡಿಯಾ ಅಸ್ಸೊಸಿಯೆಷನ್ಸ್​ ಮುಂಬೈ ಸಂಸ್ಥೆಯವರು ದತ್ತು ಪಡೆದಿದ್ದು, ಈ ಸ್ಮಾರಕದಲ್ಲಿ ಸಂರಕ್ಷಣೆ ಮತ್ತು ಪ್ರವಾಸಿ ಮೂಲ ಸೌಕರ್ಯಗಳು, ಸೌಂದರೀಕರಣ ಹಾಗೂ ಸುಧಾರಿತ ಪ್ರವಾಸಿ ಸೌಕರ್ಯಗಳನ್ನು ಒದಗಿಸಿ ದೇಶಿ&ವಿದೇಶಿ ಪ್ರವಾಸಿಗರನ್ನು ಆಕರ್ಷಿಸಲು ಹಲವು ಯೋಜನೆ ರೂಪಿಸಲು ನಿರ್ಧರಿಸಿದ್ದಾರೆ ಎಂದರು.

ತಾಜ್​ ಬಾವಡಿ ಅಭಿವೃದ್ಧಿಗೆ ಹಾಗೂ ಮೂಲ ಸೌಕರ್ಯ ಒದಗಿಸಲು ಸಂಬಂಧಪಟ್ಟ ಅಧಿಕಾರಿಗಳೊಂದಿಗೆ ಚರ್ಚಿಸಿ ಕ್ರಮ ಜರುಗಿಸಲು ಡಿಸಿ ಸೂಚನೆ ನೀಡಿದರು. ಕಲುಷಿತ ನೀರು ಬಾವಡಿ ಸೇರದಂತೆ ಅಗತ್ಯ ಕ್ರಮವಹಿಸುವುದು. ಡಿಸೆಂಬರ್​ ತಿಂಗಳಿನೊಳಗೆ ನೀರನ್ನು ಸಾರ್ವಜನಿಕ ಬಳಕೆಗೆ ಉಪಯೋಗಿಸಲು ಒದಗಿಸಬೇಕು. ಬಾವಡಿಯ ಆವರಣದಲ್ಲಿರುವ ವಿದ್ಯುತ್​ ಪರಿವರ್ತಕ ಬೇರೆಡೆ ಸ್ಥಳಾಂತರಕ್ಕೆ ಸಂಬಂಧಿಸಿದ ಅಧಿಕಾರಿಗಳಿಗೆ ಸೂಚನೆ ನೀಡಿದರು.

ವಿಶ್ವ ಪ್ರವಾಸೋದ್ಯಮ ದಿನಾಚರಣೆ ಹಿನ್ನೆಲೆಯಲ್ಲಿ ಕರಪತ್ರ ಬಿಡುಗಡೆಗೊಳಿಸಲಾಯಿತು. ಪಾಲಿಕೆ ಆಯುಕ್ತ ವಿಜಯಕುಮಾರ ಮೆಕ್ಕಳಿಕಿ, ಪ್ರವಾಸೋದ್ಯಮ ಇಲಾಖೆಯ ಅಧಿಕಾರಿ ಅರವಿಂದ ಹೂಗಾರ, ವರ್ಲ್ಡ್​ ಮಾನ್ಯುಮೆಂಟ್​ ಫಂಡ್​ ಇಂಡಿಯಾ ಅಸ್ಸೊಸಿಯೆಷನ್ಸ್​ ಸಂಸ್ಥೆಯ ಅನಾಬೇಲ್​ ಲೋಪೆಜ್​, ಪದಾಧಿಕಾರಿಗಳಾದ ಬಿ. ಶರತಚಂದ್ರ ಮತ್ತಿತರರಿದ್ದರು.

ವಿಜಯಪುರ ನಗರದ ಐತಿಹಾಸಿಕ ಸ್ಮಾರಕ ತಾಜಬಾವಡಿಗೆ ಜಿಲ್ಲಾಧಿಕಾರಿ ಡಾ. ಆನಂದ ಕೆ. ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ವಿಜಯಕುಮಾರ ಮೆಕ್ಕಳಿಕಿ, ಅರವಿಂದ ಹೂಗಾರ, ಅನಾಬೇಲ್​ ಲೋಪೆಜ್​ ಮತ್ತಿತರರಿದ್ದಾರೆ.