ಡಿ. 2ರಿಂದಲೇ ಶಿರಸಿ- ಕುಮಟಾ ರಸ್ತೆಯಲ್ಲಿ ವಾಹನ ಸಂಚಾರ ನಿಷೇಧಿಸಲಾಗಿದೆ. ರಸ್ತೆ ಸಂಚಾರ ನಿಷೇಧಿಸಿದ ಮಾರನೇ ದಿನದಿಂದಲೇ ಬೆಣ್ಣೆಹೊಳೆ ಸೇತುವೆಯನ್ನು ಕೆಡವಲು ನಿರ್ಧರಿಸಲಾಗಿತ್ತು. ಆದರೆ, ಎಡಬಿಡದೆ ಸುರಿದ ಮಳೆಯಿಂದಾಗಿ ಆರ್ಎನ್ಎಸ್ ಕಂಪನಿ ಈ ಸೇತುವೆ ಕೆಡವಲು ವಿಳಂಬ ಮಾಡಿದೆ. ಸ್ಥಳೀಯರ ಮತ್ತು ಕೆಲಸಗಾರರ ವಾಹನ ದಾಟಿಸುವ ಸಲುವಾಗಿ ಸೇತುವೆ ಪಕ್ಕದಲ್ಲಿ ಕಚ್ಚಾ ರಸ್ತೆ ನಿರ್ಮಾಣ ಮಾಡಿಕೊಳ್ಳಬೇಕಿತ್ತಾದರೂ ನೀರಿನ ಹರಿವು ಜಾಸ್ತಿ ಇದ್ದ ಕಾರಣ ಮತ್ತು ಒಂದೊಮ್ಮೆ ಪ್ರವಾಹ ಬಂದಲ್ಲಿ ಈ ಕಚ್ಚಾ ರಸ್ತೆಯೇ ಕೊಚ್ಚಿಹೋಗುವ ಸಾಧ್ಯತೆ ಇತ್ತು. ಮಳೆ ನಿಂತ ಮೇಲೆ, ಡಿ. 10ರ ಬಳಿಕ ಸೇತುವೆಯ ತೆರವು ಕಾರ್ಯವನ್ನು ಕಂಪನಿ ಆರಂಭಿಸಿದೆ. ಪ್ರತಿ ದಿನವೂ ಮೂರು ಜೆಸಿಬಿ, ನಾಲ್ಕಾರು ಟ್ರ್ಯಾಕ್ಟರ್ಗಳು, 15ಕ್ಕೂ ಅಧಿಕ ಕೆಲಸಗಾರರು, ಕಾಂಕ್ರೀಟ್ ಒಡೆಯುವ ಯಂತ್ರಗಳನ್ನು ಒಳಗೊಂಡು ಸತತ 12 ದಿನಗಳ ಕಾಮಗಾರಿಯ ಬಳಿಕ ಬೆಣ್ಣೆ ಹೊಳೆ ಸೇತುವೆ ಕೆಡವುವ ಕಾರ್ಯ ಈಗ ಬಹುತೇಕ ಪೂರ್ಣಗೊಂಡಿದೆ.
