ದಸರಾ ಹೆಸರಿನಲ್ಲಿ ನಡೆಯುವ ಪ್ರವಾಸೋದ್ಯಮದಿಂದ ಮೈಸೂರಿನಲ್ಲಿಯೇ ಸಾವಿರಾರು ಕುಟುಂಬಗಳ ಜೀವನ ನಡೆಯುತ್ತಿದೆ. ಕಡ್ಲೆಕಾಯಿ, ಸೌತೆಕಾಯಿ ಮಾರುವವರಿಂದ ಹಿಡಿದು ಟಾಂಗಾ, ರಿಕ್ಷಾ, ಟ್ಯಾಕ್ಸಿ ಓಡಿಸುವವರು, ಹೋಟೆಲ್ ಮಾಲೀಕರು, ಪ್ರವಾಸಿ ಮಾರ್ಗದರ್ಶಿಗಳು... ಹೀಗೆ ವಿವಿಧ ವೃತ್ತಿನಿರತ ಕುಟುಂಬಗಳು ಇದನ್ನೇ ನಂಬಿಕೊಂಡು ಬದುಕುತ್ತಿವೆ. ಕೆಳ ಹಂತದಿಂದ ಹಿಡಿದು ಮೇಲ್ವರ್ಗದವರೆಗೆ ಒಂದಕ್ಕೊಂದು ಸಂಬಂಧವಿರುವ ಈ ‘ಆರ್ಥಿಕ ಸರಪಳಿ’ ಸರಳ ದಸರೆಯಿಂದ ಸಡಿಲವಾಗಿ ಪ್ರತಿಯೊಬ್ಬರೂ ನೇರವಾಗಿ ಮತ್ತು ಪರೋಕ್ಷವಾಗಿ ನಷ್ಟ ಅನುಭವಿಸಬೇಕಾಗುತ್ತದೆ. ಜತೆಗೆ ರೈತರಿಗೆ ಮತ್ತು ಗ್ರಾಮಾಂತರ ಪ್ರದೇಶದವರಿಗೆ ದಸರಾ ಆದಾಯದ ಮೂಲ. ದಸರಾ ವೇಳೆ ಮೈಸೂರಿನ ಮಾರುಕಟ್ಟೆಯಲ್ಲಿ ಭರ್ಜರಿ ವ್ಯಾಪಾರ ನಡೆದರೆ, ಹಳ್ಳಿಗರ ಹೊಟ್ಟೆಯೂ ತುಂಬಲಿದೆ. ತರಕಾರಿ, ಹಣ್ಣು, ಹೂ ಸೇರಿ ಪ್ರತಿಯೊಂದು ಕೃಷಿ ಉತ್ಪನ್ನಗಳಿಗೆ ಹೆಚ್ಚಿನ ಬೇಡಿಕೆ ಬರಲಿದ್ದು, ನಿರೀಕ್ಷೆ ಮೀರಿ ಆದಾಯ ತರಲಿದೆ.
