ಉಡುಪಿಯಲ್ಲಿ ಶ್ರೀರಾಮ ನಾಮ ಜಪ ಅಭಿಯಾನ ಆರಂಭ

ಶ್ರೀಲಕ್ಷೀ-ವೆಂಕಟೇಶ ದೇವಸ್ಥಾನದಲ್ಲಿ ಆಯೋಜನೆ -- 2025ರ ವರೆಗೆ ಕಾರ್ಯಕ್ರಮ

ವಿಜಯವಾಣಿ ಸುದ್ದಿಜಾಲ ಉಡುಪಿ:
ಉಡುಪಿಯ ಶ್ರೀಲಕ್ಷೀ-ವೆಂಕಟೇಶ ದೇವಸ್ಥಾನದಲ್ಲಿ ಜಿಎಸ್​ಬಿ ಸಮಾಜದ ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠದ 550ನೇ ವರ್ಷದ ಆಚರಣೆ ಮತ್ತು ಮಠಾಧಿಪತಿ ವಿದ್ಯಾಧೀಶ ತೀರ್ಥ ಶ್ರೀಪಾದ ಒಡೆಯರ್​ ಅವರಿಂದ ಉಪದೇಶಿಸಲ್ಪಟ್ಟ ಶ್ರೀರಾಮ ನಾಮ ಜಪ ಅಭಿಯಾನ ಅಕ್ಷಯ ತೃತೀಯಾ ದಿನದಿಂದ ಆರಂಭಗೊಂಡಿದೆ.

ಶ್ರೀದೇವರ ಸನ್ನಿಧಿಯಲ್ಲಿ ಸಾಮೂಹಿಕ ಪ್ರಾರ್ಥನೆ, ಶ್ರೀರಾಮ ದೇವರ ಭಾವಚಿತ್ರದ ಮೆರವಣಿಗೆ ಮೂಲಕ ಶ್ರೀ ಸಚ್ಚಿದಾನಂದ ಸಭಾಗ್ರಹದಲ್ಲಿ ಶ್ರೀರಾಮ ನಾಮ ಜಪ ಪ್ರಾರಂಭಗೊಂಡಿದ್ದು, 2025ರ ಅಕ್ಟೋಬರ್​ 18ರ ವರೆಗೆ ಅಭಿಯಾನ ನಡೆಯಲಿದೆ.

ಅಭಿಯಾನದ ಪ್ರಥಮ ದಿನದ ಮೊದಲನೆಯ ಪಾಳಿಗೆ ನೂರಕ್ಕೂ ಅಧಿಕ ಸಂಖ್ಯೆಯಲ್ಲಿ ಜಪಕರು ಪಾಲ್ಗೊಂಡಿದ್ದರು. ಶ್ರೀರಾಮ ನಾಮಜಪ ಅಭಿಯಾನಕ್ಕೆ ಉಡುಪಿಯ ಶ್ರೀಲಕ್ಷೀ-ವೆಂಕಟೇಶ ದೇವಸ್ಥಾನವನ್ನು ಜಪ ಕೇಂದ್ರವನ್ನಾಗಿಸಿ, 'ಶ್ರೀ ರಘುನಾಯಕ:' ಎಂದು ನಾಮಕರಿಸಿ ಶ್ರೀಗಳು ವಿಶೇಷ ಅನುಗ್ರಹ ಸಂದೇಶ ನೀಡಿದ್ದಾರೆ.

ಶ್ರೀರಾಮ ನಾಮ ಜಪ ಅಭಿಯಾನಕ್ಕೆ ದೇವಳದ ಆಡಳಿತ ಮೊಕ್ತೇಸರ ಪಿ.ವಿ. ಶೆಣೈ, ಅರ್ಚಕರಾದ ದಯಾಘನ್​ ಭಟ್​, ದೀಪಕ್​ ಭಟ್​ ಸಹಕರಿಸಿದರು. ಆಡಳಿತ ಮಂಡಳಿಯ ಸದಸ್ಯರು, ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠದ ಜಪ ಕಮಿಟಿಯ ಸದಸ್ಯರು, ಯುವಕ ಮಂಡಳಿ ಸದಸ್ಯರು, ಮಹಿಳಾ ಮಂಡಳಿಯ ಸದಸ್ಯೆಯರು ಮತ್ತು ನೂರಾರು ಭಕ್ತರು ಅಭಿಯಾನದಲ್ಲಿ ಪಾಲ್ಗೊಂಡಿದ್ದರು.

ಪಾಲ್ಗೊಳ್ಳಲು ಸಮಾಜದ ಜನರಿಗೆ ಅವಕಾಶ

ಮೇ 18ರ ವರೆಗೆ ಪ್ರತಿದಿನ ಸಂಜೆ 4ರಿಂದ 5:30ರ ವರೆಗೆ, ಮೇ 19ರಿಂದ ಪ್ರತಿದಿನ ಸಂಜೆ 5:45 ರಿಂದ 7ರ ವರೆಗೆ, ಪ್ರತಿ ಭಾನುವಾರ ವಿಶೇಷ ಪಾಳಿ ಬೆಳಗ್ಗೆ 9:30ರಿಂದ 11ರ ವರೆಗೆ ಉಡುಪಿಯ ಶ್ರೀಲಕ್ಷೀ-ವೆಂಕಟೇಶ ದೇವಳದಲ್ಲಿ ಜಪ ಆಯೋಜಿಸಲಾಗಿದೆ. ಈ ಅಭಿಯಾನಕ್ಕೆ ಉಡುಪಿಯವರಷ್ಟೇ ಅಲ್ಲದೆ, ಸಮೀಪದ ಊರುಗಳ ಸಮಾಜದ ಜನರಿಗೂ ಸಹ ಪಾಲ್ಗೊಳ್ಳಲು ಅವಕಾಶವಿದೆ ಎಂದು ಶ್ರೀರಾಮ ನಾಮ ಜಪ ಕಮಿಟಿ ತಿಳಿಸಿದೆ.