ರೋಗ ಮುಕ್ತ ಸಿಗಡಿ ಕೃಷಿಗಾಗಿ ವಿಶ್ವನಾಥ ಶೆಟ್ಟಿ ನೇರವಾಗಿ ಹೊಳೆಯಿಂದ ನೀರು ಸಂಗ್ರಹಣಾ ಘಟಕದಲ್ಲಿ ಹೊಳೆ ನೀರು ಶೇಖರಿಸಿ, ಅಲ್ಲಿಂದ ಪರಿಶುದ್ಧ ನೀರು ಕೆರೆಗೆ ಹಾಯಿಸಿದರು. ಸಿಗಡಿ ಕೆರೆ ನೀರು ದಪ್ಪವಾದರೆ ಹಾಗೂ ಬಣ್ಣಗೆಟ್ಟರೆ ಅದನ್ನು ಶುದ್ಧೀಕರಿಸಿ ಮತ್ತೆ ಕೆರೆಗೆ ಹಾಯಿಸಬೇಕು. ಹಕ್ಕಿ ಹಿಕ್ಕೆ, ಏಡಿಯಿಂದ ಸಿಗಡಿಗೆ ರೋಗ ಬರುವ ಅಪಾಯವಿದ್ದು, ಇಂಟೆನ್ಯೂ ಕೇರ್, ಬಯೋಸೆಕ್ಯೂರೆಟ್ ಅಳವಡಿಸಿಕೊಳ್ಳಲಾಗಿದೆ. ರೋಗ ಮುಕ್ತ ಹಾಗೂ ಹೆಚ್ಚು ಸಿಗಡಿ ಕೃಷಿ ಹಿನ್ನೆಲೆಯಲ್ಲಿ ಹೊಸದಾಗಿ ನರ್ಸರಿ ಸಿಸ್ಟಮ್ ಆರಂಭಿಸಿದ್ದಾರೆ. ನರ್ಸರಿಯಿಂದ ಕೆರೆಗೆ ಬಂದ ಸಿಗಡಿ ಫೀಡಿಂಗ್ ಜಾಸ್ತಿ ಮಾಡುವುದರಿಂದ ಬೇಗ ಬೆಳೆಯುತ್ತದೆ. 120 ದಿನದ ನಂತರ ಸಿಗಡಿ ಹಿಡಿಯಲು ಬರಲಿದ್ದು, 30ರಿಂದ 40 ಕೌಂಟ್ ಬಂದರೆ ಮಾತ್ರ ಮಾಡಿದ ಕೆಲಸಕ್ಕೆ ಬೆಲೆ ಸಿಗುತ್ತದೆ.
