ಕ್ರೈಸ್ತರು ಸರ್ಕಾರಿ ಹುದ್ದೆ ಸೇರುವತ್ತ ಗಮನ ಹರಿಸಲಿ...

ಡಾ. ಜೆರಾಲ್ಡ್​ ಐಸಾಕ್​ ಲೋಬೊ ಆಶಯ

ಯುಪಿಎಸ್​ಸಿ ಸಾಧಕ ಶ್ರೇಯಾಂಶ್​ಗೆ ಸನ್ಮಾನ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಕ್ರೈಸ್ತ ಸಮುದಾಯದ ಮಕ್ಕಳು ಹೆಚ್ಚು ಸರ್ಕಾರಿ ಹುದ್ದೆ ಸೇರುವತ್ತ ಗಮನ ಹರಿಸಿದಾಗ ಸಮುದಾಯದೊಂದಿಗೆ ಜಿಲ್ಲೆಗೂ ಗೌರವ ತಂದು ಕೊಟ್ಟಂತಾಗುತ್ತದೆ ಎಂದು ಉಡುಪಿ ಧರ್ಮಪ್ರಾಂತ್ಯದ ಅಧ್ಯಕ್ಷ ವಂ. ಡಾ. ಜೆರಾಲ್ಡ್​ ಐಸಾಕ್​ ಲೋಬೊ ಆಶಯ ವ್ಯಕ್ತಪಡಿಸಿದರು.

ಉಡುಪಿಯಲ್ಲಿರುವ ತಮ್ಮ ನಿವಾಸದ ಕಚೇರಿಯಲ್ಲಿ ಜೂ.27ರಂದು ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಯುಪಿಎಸ್​ಸಿ ಪರೀಕ್ಷೆಯಲ್ಲಿ 372ನೇ ರ್ಯಾಂಕ್​ ಗಳಿಸಿ ಸಾಧನೆ ಮಾಡಿರುವ ಶ್ರೇಯಾಂಶ್​ ಗೋಮ್ಸ್​ ಅವರನ್ನು ಧರ್ಮಪ್ರಾಂತ್ಯದ ಪರವಾಗಿ ಗೌರವಿಸಿ ಮಾತನಾಡಿದರು.

ನಿರಂತರ ಪರಿಶ್ರಮ ಅಗತ್ಯ

ಉಡುಪಿ ಧರ್ಮಪ್ರಾಂತ್ಯದ ಸಾರ್ವಜನಿಕ ಸಂಪರ್ಕಾಧಿಕಾರಿ ವಂ.ಡೆನಿಸ್​ ಡೆಸಾ ಮಾತನಾಡಿ, ಅನೇಕರಿಗೆ ಯುಪಿಎಸ್ಸಿಯಂತಹ ಉನ್ನತ ಪರೀಕ್ಷೆ ಬರೆದು ಸರ್ಕಾರಿ ಸೇವೆಯಲ್ಲಿ ತೊಡಗುವ ಕನಸು ಇರುತ್ತದೆ. ಅದರೆ, ಅದರಲ್ಲಿ ಉತ್ತೀರ್ಣರಾಗುವುದು ಸುಲಭವಲ್ಲ. ಕಠಿಣ ಮತ್ತು ನಿರಂತರ ಪರಿಶ್ರಮ ಅಗತ್ಯ. ಕಷ್ಟಗಳನ್ನೆಲ್ಲ ಎದುರಿಸಿ ಉಡುಪಿ ಚರ್ಚ್​ನ ಶ್ರೇಯಾಂಶ್​ ಸಾಧನೆ ಮಾಡಿರುವುದು ಸಂತೋಷದ ಸಂಗತಿಯಾಗಿದೆ ಎಂದರು.

ಶ್ರೇಯಾಂಶ್​ ತಂದೆ ಎಸ್​.ಜೆ. ಗೋಮ್ಸ್​, ತಾಯಿ ಮೇಬಲ್​ ಶಾಂತಿ, ಧರ್ಮಪ್ರಾಂತ್ಯದ ಉಜ್ವಾಡ್​ ಪತ್ರಿಕೆಯ ಸಂಪಾದಕ ವಂ.ಆಲ್ವಿನ್​ ಸ್ವಿಕ್ವೇರಾ, ಮಾಧ್ಯಮ ಸಂಯೋಜಕ ಮೈಕಲ್​ ರೊಡ್ರಿಗಸ್​ ಇದ್ದರು.

ತಂದೆ ಕೊಂಕಣ ರೈಲ್ವೆ ಅಧಿಕಾರಿ

ಶ್ರೇಯಾಂಶ್ ಗೋಮ್ಸ್​ ​ ಅವರ ತಂದೆ ಎಸ್​.ಜೆ. ಗೋಮ್ಸ್​ ಮೂಲತಃ ಉತ್ತರ ಕನ್ನಡ ಜಿಲ್ಲೆಯ ಭಟ್ಕಳ ತಾಲೂಕಿನ ತೆರ್ನಮಕ್ಕಿ ಗ್ರಾಮದವರು. ಪ್ರಸ್ತುತ ಉಡುಪಿಯ ಇಂದ್ರಾಳಿ ರೈಲ್ವೆ ನಿಲ್ದಾಣದಲ್ಲಿ ಸ್ಟೇಶನ್​ ಮಾಸ್ಟರ್​ ಆಗಿದ್ದು, ತಾಯಿ ಮೇಬಲ್​ ಶಾಂತಿ ಗೃಹಿಣಿಯಾಗಿದ್ದಾರೆ. ಬೆಂಗಳೂರಿನ ಆರ್​.ವಿ. ಕಾಲೇಜಿನಲ್ಲಿ ಇಂಜಿನಿಯರಿಂಗ್​ ಮುಗಿಸಿರುವ ಶ್ರೇಯಾಂಶ್​, ಯುಪಿಎಸ್​ಸಿ ಪರೀಕ್ಷೆಯಲ್ಲಿ ಸಾಧನೆ ಮಾಡಿದ್ದಾರೆ. ಅವರ ಕಿರಿಯ ಸಹೋದರ ಶ್ರೇಯಾತಿ ಗೋಮ್ಸ್​ ಮಣಿಪಾಲದಲ್ಲಿ ಇಂಜಿನಿಯರಿಂಗ್​ ಓದುತ್ತಿದ್ದಾನೆ.