ಕಾಫಿಯ ಮೂಲ, ಇದು ಭಾರತಕ್ಕೆ ಕಾಲಿಟ್ಟ ಬಗೆ, ಕರ್ನಾಟಕದಲ್ಲಿ ಹೇಗೆ ಇದನ್ನು ಬೆಳೆಯಲಾರಂಭಿಸಲಾಯಿತು ಮತ್ತಿತರ ವಿವರಗಳನ್ನು ನೀಡುವ ಸಾಕ್ಷ್ಯ ಚಿತ್ರವನ್ನೂ ಇಲ್ಲಿ ಪ್ರದರ್ಶನ ಮಾಡಲಾಗುತ್ತದೆ. ಕಾಫಿ ಸಂಸ್ಕರಣೆ, ಕಾಫಿ ಬೆಳೆಯುವ ಸಾಂಪ್ರದಾಯಿಕ ಪ್ರದೇಶಗಳು, ಕಾಫಿ ಬೆಳೆಯುವ ಪ್ರದೇಶಗಳಿಗೆ ಅನುಗುಣವಾಗಿ ಅವುಗಳ ಗುಣಲಕ್ಷಣಗಳು, ಗುಣಮಟ್ಟ, ಕಾಫಿ ವರ್ಗೀಕರಣ, ಕಾಫಿ ಉದ್ಯಮದಲ್ಲಿ ಬಳಸುವ ಯಂತ್ರೋಪಕರಣಗಳು ಮತ್ತಿತರ ವಿಷಯಗಳ ಬಗ್ಗೆಯೂ ಇಲ್ಲಿ ಮಾಹಿತಿ ಸಿಗುತ್ತದೆ. ಇಂಥ ಒಂದು ಪರಿಪೂರ್ಣ ಮ್ಯೂಸಿಯಂ ಕೊಡಗಿನಲ್ಲೂ ಆರಂಭವಾಗಬೇಕಿದೆ ಎನ್ನುತ್ತಾರೆ ಇಲ್ಲಿಯ ಕಾಫಿ ಬೆಳೆಗಾರು.
ಕೊಡಗಲ್ಲಿ ಕಾಫಿ ಪ್ರಮುಖ ವಾಣಿಜ್ಯ ಬೆಳೆಯಾಗಿದ್ದು, ಈಗಾಗಲೇ ಪ್ರವಾಸಿ ಜಿಲ್ಲೆಯಾಗಿಯೂ ಗುರುತಿಸಿಕೊಂಡಿರುವುದರಿಂದ ಕಾಫಿ ಮ್ಯೂಸಿಯಂ ಆದಷ್ಟು ಶೀಘ್ರ ಆರಂಭಿಸುವ ಬಗ್ಗೆ ಕಾಫಿ ಮಂಡಳಿ ಕಾರ್ಯೋನ್ಮುಖವಾಗಬೇಕಿದೆ ಎನ್ನುವ ಒತ್ತಾಯ ಕೇಳಿ ಬರುತ್ತಿದೆ. ಈ ಸಂಬಂಧ ಕಾಫಿ ಮಂಡಳಿ ೨೦೧೫ರಿಂದಲೇ ಪ್ರಕ್ರಿಯೆ ಶುರು ಮಾಡಿದೆ. ಜಾಗ ಕೋರಿ ಜಿಲ್ಲಾಡಳಿತಕ್ಕೆ ಪ್ರಸ್ತಾವನೆಯನ್ನೂ ಕಳಿಸಲಾಗಿದೆ. ನೂತನ ಜಿ.ಪಂ. ಕಚೇರಿ ಬಳಿ ೧ ಎಕರೆ ಜಾಗ ಗುರುತಿಸಲಾಗಿದ್ದರೂ ಕಂದಾಯ ಇಲಾಖೆಯಲ್ಲಿನ ಸಮಸ್ಯೆಗಳಿಂದಾಗಿ ಇನ್ನೂ ಅದು ಕಾಫಿ ಮಂಡಳಿಗೆ ಸಿಕ್ಕಿಲ್ಲ. ಸೂಕ್ತ ಸ್ಥಳ ಸಿಕ್ಕಿದರೆ ಮ್ಯೂಸಿಯಂ ಆರಂಭ ಮಾಡುವುದಕ್ಕೆ ಕಾಫಿ ಮಂಡಳಿಯೂ ಆಸಕ್ತಿ ತೋರಿಸುತ್ತಿದೆ.
