ಆರ್.ಕೃಷ್ಣ ಮೈಸೂರು
ಅವಘಡ ಸಂಭವಿಸಿದಾಗ ನೆರವಿಗೆ ಧಾವಿಸುವ ಅಪತ್ಬಾಂಧವ ಜಿಲ್ಲೆಯ ಅಗ್ನಿಶಾಮಕ ದಳಕ್ಕೆ ವಾಹನಗಳ ಕೊರತೆ ಕಾಡುತ್ತಿದೆ.
ಎಲ್ಲಿಯೇ ಬೆಂಕಿ ಅವಘಡ, ಮಳೆಯಿಂದ ಉಂಟಾಗುವ ಅನಾಹುತ, ಹಳೇ ಕಟ್ಟಡಗಳ ದುರಂತ ಸೇರಿದಂತೆ ಇನ್ನು ಯಾವುದೇ ಅನಾಹುತಗಳು ಸಂಭವಿಸಿದಾಗ ಶಬ್ದ ಮೊಳಗಿಸುತ್ತಾ ಸಾಗುವ ಅಗ್ನಿಶಾಮಕ ದಳಕ್ಕೆ ಅಗತ್ಯ ವಾಹನಗಳೇ ಇಲ್ಲ. ನಗರ ಸೇರಿದಂತೆ ಜಿಲ್ಲೆಯಲ್ಲಿ ಇರುವ ಕೇವಲ 10 ವಾಹನಗಳಲ್ಲಿಯೇ ಪರಿಸ್ಥಿತಿ ನಿಭಾಯಿಸಬೇಕಾದ ಅನಿವಾರ್ಯ ಸ್ಥಿತಿ ಉಂಟಾಗಿದೆ.
ಮುಖ್ಯಮಂತ್ರಿ ಸಿದ್ದರಾಮಯ್ಯ ಸೇರಿದಂತೆ ಮೂವರು ಪ್ರಭಾವಿ ಸಚಿವರನ್ನು ಹೊಂದಿರುವ ಜಿಲ್ಲೆಯಲ್ಲಿ ಬೆಂಕಿ ಸೇರಿದಂತೆ ಬೇರೆ ಅವಘಡಗಳು ಸಂಭವಿಸಿದಾಗ ತಕ್ಷಣ ಸ್ಪಂದಿಸಲು ವಾಹನ ಕೊರತೆ ಉಂಟಾಗಿದೆ. ಜಿಲ್ಲೆಯಲ್ಲಿ ಇದ್ದ 30 ವಾಹನಗಳಲ್ಲಿ ಕೇಂದ್ರ ಸರ್ಕಾರ ಹೊರಡಿಸಿರುವ ಹೊಸ ವಾಹನ ನೀತಿಯಿಂದ 15 ವರ್ಷ ಪೂರೈಸಿರುವ 20 ವಾಹನಗಳು ಗುಜರಿ ಸೇರಿವೆ.
ಹಲವು ಇಲಾಖೆಗಳಲ್ಲಿ ಸಿಬ್ಬಂದಿ ಕೊರತೆ ಉಂಟಾಗುವುದು ಸಾಮಾನ್ಯ. ಆದರೆ ಅಗ್ನಿಶಾಮಕ ಇಲಾಖೆಗೆ ಸಿಬ್ಬಂದಿ ಕೊರತೆಗಿಂತ ಕಾರ್ಯಾಚರಣೆಗೆ ಅಗತ್ಯವಾದ ವಾಹನಗಳದ್ದೇ ದೊಡ್ಡ ಕೊರತೆ.
ಬೇಸಿಗೆ ಕಾಲದಲ್ಲಿ ಬೆಂಕಿ ನಂದಿಸುವ ಕಾರ್ಯ ಮಾಡಿದರೆ, ಮಳೆಗಾಲದಲ್ಲಿ ತಗ್ಗು ಪ್ರದೇಶಗಳಿಗೆ ನುಗ್ಗುವ ಮಳೆ ನೀರು ಹೊರ ಹಾಕಲು ಅಗ್ನಿಶಾಮಕ ಸಿಬ್ಬಂದಿಯೇ ಬೇಕು. ಸಾಮಾನ್ಯವಾಗಿ ಮಳೆಗಾಲ ಅಥವಾ ಚಳಿಗಾಲದಲ್ಲಿ ಅನಾಹುತ ಸಂಬಂಧ ನಾಲ್ಕರಿಂದ ಐದು ಕರೆಗಳು ಬರುತ್ತಿದ್ದವು. ಬೇಸಿಗೆ ಕಾಲದಲ್ಲಿ ನಿತ್ಯ ಬೆಂಕಿ ಅನಾಹುತದ 25ರಿಂದ 30 ಕರೆಗಳು ಬರುತ್ತಿವೆ. ಇದರಿಂದ ಅಗ್ನಿ ನಂದಿಸುವ ಕಾರ್ಯಾಚರಣೆಯಲ್ಲಿ ತೊಡಗಬೇಕಾಗಿರುವ ಸಿಬ್ಬಂದಿಗೆ ವಾಹನ ಸಮಸ್ಯೆ ಹೆಚ್ಚಾಗಿದ್ದು, ಒತ್ತಡದಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.
ಒಂದೇ ಬಾರಿ ಮೂರ್ನಾಲ್ಕು ಅಗ್ನಿ ಅನಾಹುತ ಸಂಬಂಧ ಕರೆ ಬಂದರೆ ಅಗ್ನಿ ಶಮನಕ್ಕೆ ತೆರಳಲು ವಾಹನಗಳೇ ಇರುವುದಿಲ್ಲ. ಒಂದು ಕಾರ್ಯಾಚರಣೆ ಮುಗಿಸಿಕೊಂಡು ಬರುವವರೆಗೂ ಕಾಯಬೇಕು. ಬೇರೆಡೆಯಿಂದ ಕರೆಸುವಷ್ಟರಲ್ಲಿ ಕಾಲಾವಕಾಶ ಹೆಚ್ಚಾಗಿರುವುದರಿಂದ ಅಗ್ನಿ ಅನಾಹುತ ತೀವ್ರತೆ ಹೆಚ್ಚಾಗಿ ಸಮಸ್ಯೆಯಾಗುತ್ತಿದೆ.
ಸೇನಾ ಪಡೆಯಲ್ಲಿ 15 ವರ್ಷ ಮೇಲ್ಪಟ್ಟ ವಾಹನಗಳ ಬಳಕೆಗೆ ಅವಕಾಶ ಇರುವಂತೆ ತುರ್ತು ಸೇವೆಗೆ ಬಳಕೆಯಾಗುತ್ತಿರುವ ಅಗ್ನಿ ಶಾಮಕ ವಾಹನಗಳ ಬಳಕೆಗೆ ಅನುಮತಿ ನೀಡುವುದು ಅಗತ್ಯವಾಗಿದೆ ಎನ್ನುವ ಮಾತುಗಳು ಇಲಾಖೆಯಲ್ಲಿ ಕೇಳಿಬರುತ್ತಿದೆ.
