ವಿಶ್ವದಲ್ಲಿ ಅತಿ ಹೆಚ್ಚು ಭತ್ತ ಬೆಳೆಯುವ ಪ್ರದೇಶ ಭಾರತದಲ್ಲಿದೆ. ಆದರೆ 1996-97ರಿಂದ 2018-19ರವರೆಗೂ ಭತ್ತ ಬೆಳೆಯುವ ಪ್ರದೇಶ 43 ದಶಲಕ್ಷ ಹೆಕ್ಟೇರ್ ಆಸುಪಾಸಿನಲ್ಲೇ ಇದೆ. ಹಾಗಾಗಿ ಭತ್ತದ ಉತ್ಪಾದನೆ ಹೆಚ್ಚಿಸಲು, ವಿಸ್ತರಣಾ ಕಾರ್ಯ ಕೈಗೊಳ್ಳುವ ಸಾಧ್ಯತೆ ಕಡಿಮೆ. ಇತರ ದೇಶಗಳ ಹೋಲಿಕೆಯಲ್ಲಿ ಭಾರತದಲ್ಲಿ ಭತ್ತದ ಇಳುವರಿಯೂ ತೀರಾ ಕಡಿಮೆ. 2015ರ ಅಂಕಿ ಅಂಶದಂತೆ ಚೀನಾದಲ್ಲಿ ಪ್ರತಿ ಹೆಕ್ಟೇರ್ಗೆ 6,710 ಕೆ.ಜಿ. ಭತ್ತ ಬೆಳೆಯಲಾಗುತ್ತಿತ್ತು. ಇಂಡೋನೇಷ್ಯಾದಲ್ಲಿ 5,152 ಕೆ.ಜಿ., ಬಾಂಗ್ಲಾದೇಶದಲ್ಲಿ 4,376 ಕೆ.ಜಿ., ವಿಯೆಟ್ನಾಮ್ಲ್ಲಿ 5,573 ಕೆ.ಜಿ. ಇಳುವರಿ ಇತ್ತು. ಭಾರತದಲ್ಲಿ ಇದರ ಪ್ರಮಾಣ ಕೇವಲ 2,390 ಕೆ.ಜಿ. ಇತ್ತು. ಜಾಗತಿಕ ಸರಾಸರಿ 4,417 ಕೆ.ಜಿ ಪ್ರತಿ ಹೆಕ್ಟೇರ್ ಪ್ರಮಾಣದಿಂದಲೂ ಸಾಕಷ್ಟು ಹಿಂದಿತ್ತು. ಈಗ ಸುಮಾರು 2,400 ಕೆ.ಜಿ. ಪ್ರತಿ ಹೆಕ್ಟೇರ್ಗೆ ಏರಿಕೆಯಾಗಿದೆಯಾದರೂ ಜಾಗತಿಕ ಪ್ರಮಾಣಕ್ಕಿಂತ ಸಾಕಷ್ಟು ಹಿಂದೆಯೇ ಉಳಿದಿದೆ.
