ಇಲ್ಲಿನ ವಿವಿಯು 2010ರಲ್ಲಿ ಸ್ಥಾಪನೆಯಾಗಿ ಮೊದಲು ವಾಣಿಜ್ಯಶಾಸ್ತ್ರದಿಂದ ಪ್ರಾರಂಭವಾಗಿ ಸದ್ಯ 29 ವಿಭಾಗಗಳನ್ನು ಹೊಂದಿದೆ. ಕೆಲ ವರ್ಷಗಳ ಹಿಂದಯೇ ಆರಂಭವಾದ ಹಲವು ವಿವಿಧ ವಿಭಾಗಗಳಿಗೆ ಕೆಲ ವರ್ಷಗಳಲ್ಲಿಯೇ ಕಾಯಂ ಪ್ರಾಧ್ಯಾಪಕರನ್ನು ನೇಮಕಾತಿ ಮಾಡಿಕೊಂಡಿರುವ ವಿವಿಯು ಕನ್ನಡ ವಿಭಾಗಕ್ಕೆ ಕಾಯಂ ಪ್ರಾಧ್ಯಾಪಕರ ನೇಮಿಸಿಕೊಳ್ಳಲು ಮೀನಾಮೇಷ ತೋರುತ್ತಿದೆ. ಇನ್ನೂ ವಿವಿಯಲ್ಲಿಯೇ ಕಳೆದ ಹದಿನಾಲ್ಕು ವರ್ಷಗಳಿಂದ ಬೇರೆ ವಿಭಾಗದ ಕಾಯಂ ಉಪನ್ಯಾಸಕರಿಗೆ ವಿಭಾಗದ ಹೊಣೆ ವಹಿಸಿ ಅತಿಥಿ ಉಪನ್ಯಾಸಕರನ್ನು ನೇಮಿಸಿಕೊಂಡು ವಿದ್ಯಾರ್ಥಿಗಳಿಗೆ ಭೋದನೆ ಮಾಡಲಾಗುತ್ತಿದೆ. ಈ ಕನ್ನಡ ವಿಭಾಗಕ್ಕೆ ಪ್ರತಿ ವರ್ಷ 40 ವಿದ್ಯಾರ್ಥಿಗಳಿಗೆ ಸ್ನಾತಕೋತ್ತರ ಪದವಿ ದಾಖಲಾತಿಗೆ ಅವಕಾಶವಿದೆ. ಆದರೆ, ಈವರೆಗೂ ಒಂದು ವರ್ಷವೂ ಕೂಡ ಪೂರ್ಣ ಪ್ರಮಾಣದಲ್ಲಿ ದಾಖಲಾತಿ ಪೂರ್ಣಗೊಂಡಿಲ್ಲ. ಈ ವರ್ಷ ಕೂಡ 22 ವಿದ್ಯಾರ್ಥಿಗಳು ದಾಖಲಾತಿ ಪಡೆದಿದೆ ಎಂಬ ಮಾಹಿತಿಯಿದೆ. ವರ್ಷದಿಂದ ವರ್ಷಕ್ಕೆ ಕನ್ನಡ ವಿಭಾಗಕ್ಕೆ ಗಣನೀಯವಾಗಿ ದಾಖಲಾತಿಯಲ್ಲಿ ಕುಸಿತ ಕಂಡರೂ ಕಾಯಂ ಪ್ರಾಧ್ಯಾಪಕರ ನೇಮಕಾತಿಯಲ್ಲಿ ಆಸಕ್ತಿ ತೋರುತ್ತಿಲ್ಲ. ಸದ್ಯ ವಿವಿಯಲ್ಲಿ ಮೂರು ಕನ್ನಡ ಪ್ರಾಧ್ಯಾಪಕರ ಹುದ್ದೆಗಳಿವೆ, ಈಗಾಗಲೇ ಕೆಲ ತಿಂಗಳ ಹಿಂದೆ ಸಂದರ್ಶನ ಕೂಡ ನಡೆಸಲಾಗಿತ್ತು. ಕಳೆದ ಲೋಕಸಭಾ ಉಪಚುನಾವಣೆ ಹಿನ್ನಲೆ ಮುಂದೂಡಲಾಯಿತು ಎಂಬುದಾಗಿ ವಿವಿ ಪ್ರಾಧ್ಯಾಪಕರೊಬ್ಬರು ತಿಳಿಸಿದರು.
