ಗುಡ್ಡಗಾಡು ಪ್ರದೇಶವಾದ ಕಾರಣ ಕೊಡಗಿನಲ್ಲಿ ಲೈನ್ಮ್ಯಾನ್ಗಳಿಗೆ ಸವಾಲು ಜಾಸ್ತಿ. ಬಹುತೇಕ ವಿದ್ಯುತ್ ಲೈನ್ಗಳು ಅರಣ್ಯ ಪ್ರದೇಶ, ಕಾಫಿ ತೋಟಗಳ ಮಧ್ಯೆ ಹಾದು ಹೋಗಿದ್ದು, ವಿದ್ಯುತ್ ತಂತಿಗಳ ಮೇಲೆ ಮರ ಬಿದ್ದು, ವಿದ್ಯುತ್ ಕಂಬಗಳು ಮುರಿದು ಬೀಳುವುದು, ವಿದ್ಯುತ್ ಪೂರೈಕೆ ಸ್ಥಗಿತ ಆಗುವುದು ಮಳೆಗಾಲದಲ್ಲಿ ಇಲ್ಲಿ ಆಗಾಗ್ಗೆ ಸಂಭವಿಸುತ್ತಲೇ ಇರುತ್ತದೆ. ಇಂಥ ಸಂದರ್ಭದಲ್ಲಿ ಭಾರಿ ಮಳೆ, ಗಾಳಿ ಲೆಕ್ಕಿಸದೇ ಲೈನ್ಮ್ಯಾನ್ಗಳು ತೋಟದ ಒಳಭಾಗಕ್ಕೆ ತೆರಳಿ ದುರಸ್ತಿ ಕೆಲಸ ಮಾಡುತ್ತಾರೆ. ತೋಟದಲ್ಲಿ ವಾಹನಗಳು ತೆರಳದ ಜಾಗಕ್ಕೆ ತೂಕದ ವಿದ್ಯುತ್ ಕಂಬಗಳನ್ನು ಹೊತ್ತುಕೊಂಡೇ ಹೋಗಬೇಕಾಗುತ್ತದೆ.
ಮಳೆಗಾಲದಲ್ಲಿ ಲೈನ್ಮ್ಯಾನ್ಗಳ ಕೆಲಸ ಒಂದು ರೀತಿಯ ಸಾಹಸದಿಂದ ಕೂಡಿದ್ದರೆ, ಮಳೆಗಾಲ ಶುರುವಾಗುವುದಕ್ಕೂ ಮುಂಚೆ ಮತ್ತೊಂದು ರೀತಿಯಲ್ಲಿ ಶ್ರಮದ ಕೆಲಸ ಇರುತ್ತದೆ. ವಿದ್ಯುತ್ ಲೈನ್ ಹಾದು ಹೋಗಿರುವ ಅರಣ್ಯ ಅಥವಾ ಕಾಫಿ ತೋಟದೊಳಗೆ ತೆರಳಿ ವಿದ್ಯುತ್ ಮಾರ್ಗದ ಅಕ್ಕಪಕ್ಕದಲ್ಲಿರುವ ಮರದ ರೆಂಬೆ, ಕೊಂಬೆಗಳನ್ನು ಮುನ್ನೆಚ್ಚರಿಕೆ ಕ್ರಮವಾಗಿ ಕಡಿಯಬೇಕಾಗುತ್ತದೆ. ಅಪಾಯಕಾರಿ ಸ್ಥಿತಿಯಲ್ಲಿ ಇರುವ ಮರಗಳನ್ನು ತೆರವು ಮಾಡುವ ಜವಾಬ್ದಾರಿಯೂ ಇವರ ಮೇಲೆ ಇರುತ್ತದೆ. ಮುರಿದ ವಿದ್ಯುತ್ ಕಂಬ, ಹಳೆಯ ತಂತಿಗಳನ್ನೂ ಬದಲಿಸುವ ಕೆಲಸ ಇರುತ್ತದೆ. ಹೀಗೆ ವರ್ಷ ಪೂರ್ತಿ ಕೊಡಗಿನ ಲೈನ್ಮ್ಯಾನ್ಗಳು ಒಂದಿಲ್ಲೊಂದು ಕೆಲಸ ಮಾಡುತ್ತಲೇ ಇರಬೇಕಾಗುತ್ತದೆ.
