ತುಮಕೂರು ಜಿಲ್ಲೆಗೆ 7 ಟಿಎಂಸಿ ಹೇಮೆ ಖೋತಾ!

ತುಮಕೂರು: ಹಾಸನ ಹಾಗೂ ಮಂಡ್ಯ ಜಿಲ್ಲೆಯ ಪ್ರಭಾವಿ ರಾಜಕಾರಣಿಗಳ ಕ್ಯಾತೆಯಿಂದ ಈ ವರ್ಷ ತುಮಕೂರು ಜಿಲ್ಲೆಗೆ 7 ಟಿಎಂಸಿ ‘ಹೇಮೆ’ನೀರು ಖೋತಾ ಆಗಲಿದೆ.

ಕಾವೇರಿ ನೀರು ನಿರ್ವಹಣಾ ಪ್ರಾಧಿಕಾರದ ನಿಯಮದಂತೆ ಮೇ 30ರವರೆಗೆ ಹೇಮಾವತಿ ಜಲಾಶಯದಿಂದ ಜಿಲ್ಲೆಯ ಪಾಲಿನ ಈ ವರ್ಷದ ನೀರು ಪಡೆಯಬಹುದಾಗಿದ್ದು, ಇದಕ್ಕೆ ಹಾಸನದ ಜನಪ್ರತಿನಿಧಿಗಳು ತಡೆಯೊಡ್ಡಿದ್ದಾರೆ. ಮೇ 1ರಂದು ಕುಡಿಯುವ ನೀರಿನ ಯೋಜನೆಗಳ ಕೆರೆ-ಕಟ್ಟೆಗಳಿಗೆ ಜಿಲ್ಲೆಯ ಪಾಲಿನ 7 ಟಿಎಂಸಿ ನೀರನ್ನು ಹೇಮಾವತಿ ಜಲಾಶಯದಿಂದ ಹರಿಸಲು ಹಾಸನ ಜಿಲ್ಲಾ ಉಸ್ತುವಾರಿ ಸಚಿವರೂ ಆಗಿರುವ ಜಿಲ್ಲಾ ಉಸ್ತುವಾರಿ ಸಚಿವ ಜೆ.ಸಿ.ಮಾಧುಸ್ವಾಮಿ ಆದೇಶ ಹೊರಡಿಸಿದ್ದರು. ಈ ಆದೇಶಕ್ಕೆ ಹಾಸನ ಹಾಗೂ ಮಂಡ್ಯ ಜಿಲ್ಲೆಯ ಜೆಡಿಎಸ್ ಶಾಸಕರು ತಕರಾರು ತೆಗೆದ ಹಿನ್ನೆಲೆಯಲ್ಲಿ ಸಿಎಂ ಯಡಿಯೂರಪ್ಪ ಅವರು ‘ಹೇಮೆ’ ನೀರು ಹರಿಸದಂತೆ ಸೂಚನೆ ನೀಡಿರುವುದು ಹಾಸನ, ತುಮಕೂರು ಜಿಲ್ಲೆಯ ನಡುವಿನ ಜಲಜಗಳ ತಾರಕಕ್ಕೇರಲು ಕಾರಣವಾಗಿದೆ.

ಜಲಸಂಕಷ್ಟ: ಜಿಲ್ಲಾ ಕೇಂದ್ರ ತುಮಕೂರು ಸೇರಿ 8 ತಾಲೂಕು ಕೇಂದ್ರಗಳಿಗೆ ಹಾಗೂ ಮಾರ್ಗಮಧ್ಯದ ಹಳ್ಳಿಗಳಿಗೆ ಕುಡಿಯುವ ನೀರಿನ ಉದ್ದೇಶಕ್ಕಾಗಿ ನೀರು ಹರಿಸುವುದಕ್ಕೆ ತಡೆಯೊಡ್ಡಿರುವುದರಿಂದ ಮುಂದಿನ ದಿನಗಳಲ್ಲಿ ನೀರಿನ ಗಂಭೀರ ಸಮಸ್ಯೆ ತಲೆದೋರಲಿದೆ. ಹೇಮೆ ಯೋಜನೆಯಲ್ಲಿ ಜಿಲ್ಲೆಗೆ 25.3 ಟಿಎಂಸಿ ನೀರು ಮಂಜೂರಾಗಿದ್ದು, ಕಳೆದ ಆಗಸ್ಟ್‌ನಿಂದ ಈ ವರ್ಷ ಜನವರಿ 22 ರವರೆಗೆ 2 ಹಂತಗಳಲ್ಲಿ ನೀರು ಹರಿಸಲಾಗಿದೆ. ಇದುವರೆಗೆ 17 ರಿಂದ 18 ಟಿಎಂಸಿ ನೀರು ಮಾತ್ರ ಜಿಲ್ಲೆಗೆ ಹರಿದಿದ್ದು, ಉಳಿದ 7 ಟಿಂಎಂಸಿ ನೀರನ್ನು ಬೇಸಿಗೆ ಸಂದರ್ಭದಲ್ಲಿ ಬಳಸಿಕೊಳ್ಳಲು ನಿರ್ಧರಿಸಲಾಗಿತ್ತು. ಈಗ ಕುಡಿಯುವ ನೀರಿಗೆ ಜಿಲ್ಲೆಯ ಪಾಲಿನ ಹೇಮೆ ನೀರು ಪಡೆದುಕೊಳ್ಳಲು ಮುಂದಾದಾಗ ಹಾಸನ, ಮಂಡ್ಯದ ಜೆಡಿಎಸ್ ಶಾಸಕರು ಖ್ಯಾತೆ ತೆಗೆದಿದ್ದಾರೆ. ಆದರೆ, ಕಾವೇರಿ ನೀರು ನಿರ್ವಹಣಾ ಪ್ರಾಧಿಕಾರದ ನಿಯಮದ ಪ್ರಕಾರ ಮೇ 30ರೊಳಗೆ ಈ ವರ್ಷದ ಹೇಮೆ ನೀರು ಹರಿಸಲು ಅವಕಾಶವಿದೆ. ಜಲಜಗಳ ತೆಗೆದಿರುವ ರಾಜಕಾರಣಿಗಳ ಒತ್ತಡಕ್ಕೆ ಮಣಿಯದೆ ರಾಜ್ಯ ಸರ್ಕಾರವು ತುಮಕೂರು ಜಿಲ್ಲೆಗೆ ಕುಡಿವ ನೀರಿಗಾಗಿ ಹೇಮೆ ಹರಿಸಬೇಕಿದೆ.

ಪ್ರಾಧಿಕಾರದ ನಿಯಮ ಅಡ್ಡಿ : ಹೇಮಾವತಿ ಅಣೆಕಟ್ಟೆಯಲ್ಲಿ ಬಳಕೆಗೆ ಯೋಗ್ಯವಾದ 11 ಟಿಎಂಸಿ ನೀರು ಲಭ್ಯವಿದೆ. ಹಾಸನ ಹಾಗೂ ಮಂಡ್ಯ ಜಿಲ್ಲೆಗಳಿಗೆ ನಿಗದಿಯಾಗಿರುವ ಹೇಮೆ ನೀರು ಬಳಸಿಕೊಂಡಿರುವುದರಿಂದ ಮತ್ತೊಮ್ಮೆ ಆ ಭಾಗಕ್ಕೆ ನೀರು ಬಿಡಲು ಕಾವೇರಿ ನೀರು ನಿರ್ವಹಣಾ ಪ್ರಾಧಿಕಾರದ ಅಧಿಕಾರಿಗಳು ಅಡ್ಡಿಯಾಗಿದ್ದಾರೆ. ಹಾಗಾಗಿ, ತುಮಕೂರು ಜಿಲ್ಲೆಗೆ ಮಾತ್ರವೇ ನೀರು ಬಿಡಲು ಸಚಿವ ಮಾಧುಸ್ವಾಮಿ ಸೂಚಿಸಿದ್ದರು. ಸಚಿವರು ತುಮಕೂರಿನವರಾಗಿರುವುದರಿಂದ ಆ ಭಾಗದ ರಾಜಕಾರಣಿಗಳು ತಗಾದೆ ತೆಗೆದಿದ್ದಾರೆ.

ಒತ್ತಡಕ್ಕೆ ಮಣಿದ ಸಿಎಂ!: ಹಾಸನ, ಮಂಡ್ಯದ ಪ್ರಭಾವಿ ರಾಜಕಾರಣಿಗಳ ಒತ್ತಡಕ್ಕೆ ಮಣಿದ ಸಿಎಂ ಯಡಿಯೂರಪ್ಪ ಅವರು ಕುಡಿಯುವ ಸಲುವಾಗಿ ಜಿಲ್ಲೆಗೆ ಹೇಮೆ ನೀರು ಹರಿಸುವ ಆದೇಶಕ್ಕೆ ತಡೆ ನೀಡಿದ್ದಾರೆ. ಜಿಲ್ಲೆಗೆ ನಿಗದಿಯಾಗಿರುವ 25.3 ಟಿಎಂಸಿ ನೀರಿನ ಪೈಕಿ ಈವರೆಗೆ 18 ಟಿಎಂಸಿ ನೀರು ಹರಿದಿದೆ. ಹಾಗಾಗಿ, ಉಳಿದ 7 ಟಿಎಂಸಿ ನೀರು ಹರಿಸಿ ಕುಡಿಯುವ ನೀರಿನ ಸಂಕಷ್ಟ ಬಗೆಹರಿಸಬೇಕಿದೆ.

ಹೇಮೆ ತಮಿಳುನಾಡು ಪಾಲು: ಹೇಮೆ ನೀರು ಹಂಚಿಕೆ ವಿಚಾರದಲ್ಲಿ ಹಾಸನ ಹಾಗೂ ತುಮಕೂರು ಜಿಲ್ಲೆ ನಡುವಿನ ಜಗಳದಿಂದ ಅಣೆಕಟ್ಟೆಯಲ್ಲಿ ಉಳಿಯುವ ನೀರು ತಮಿಳುನಾಡು ಪಾಲಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ. ಅಂತರ ಜಿಲ್ಲಾ ನೀರಿನ ವಿವಾದದಿಂದ ಹೇಮೆ ನೀರು ಮೂರನೆಯವರ ಪಾಲಾಗಲಿದೆ.