ಆಹೋರಾತ್ರಿ ಜಾಗರಣೆ: ದಕ್ಷಿಣ ಕಾಶಿ ಶಿವಗಂಗೆಯಲ್ಲಿ ನೆಲೆಸಿರುವ ಶ್ರೀ ಗಂಗಾಧರೇಶ್ವರ ಸ್ವಾಮಿಗೆ ಶಿವರಾತ್ರಿಯ ಹಬ್ಬದಂದು ಸಾವಿರಾರು ಸಂಖ್ಯೆಯ ಭಕ್ತರು ಆಗಮಿಸುತ್ತಾರೆ, ಎಂದಿನಂತೆ ಈ ಬಾರಿಯೂ ಉಪವಾಸ ಮತ್ತು ಜಾಗರಣೆಯ ಮೂಲಕ ಶಿವನಿಗೆ ಪೂಜೆ ಸಲ್ಲಿಸಿ ಇಷ್ಟಾರ್ಥಗಳನ್ನು ನೆರವೇರಿಸುವಂತೆ ಪ್ರಾರ್ಥನೆ ಸಲ್ಲಿಸುತ್ತಿದ್ದ ದೃಶ್ಯ ಕಂಡುಬಂತು. ಶಿವರಾತ್ರಿ ವಿಶೇಷವಾಗಿ ದೇವಾಲಯವು ಮುಂಜಾನೆ 5 ಗಂಟೆಯಿಂದ ಆರಂಭಗೊಂಡು 24 ಗಂಟೆಯವರೆಗೂ ನಿರಂತರವಾಗಿ ದೇವರ ದರ್ಶನಕ್ಕೆ ಅವಕಾಶ ಮಾಡಿಕೊಡಲಾಗಿತ್ತು, ಶಿವನಿಗೆ ಬಿಲ್ವಪತ್ರೆ. ತುಂಬೆ ಮತ್ತು ಜಾಜಿ ಪುಷ್ಪದಿಂದ ವಿಶೇಷ ಅಲಂಕಾರ ನೆರವೇರಿಸಲಾಗಿತ್ತು. ಪ್ರತಿ ಗಂಟೆಗೊಮ್ಮೆ ರುದ್ರಾಭಿಷೇಕ, ತುಪ್ಪದ ಸೇವೆ, ಬೆಣ್ಣೆ ಅಲಂಕಾರ, ಪಂಚಾಮೃತ ಅಭಿಷೇಕ ಮತ್ತು ದೇವಾಲಯದಲ್ಲಿ ದೀಪಾಲಂಕಾರದ ಪೂಜೆ ಗಮನ ಸೆಳೆಯಿತು.
