ಮಧ್ಯ ಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧ ವಿರೋಧಿಸಿ ಅನೇಕ ದೊಡ್ಡ ರಾಷ್ಟ್ರಗಳಲ್ಲಿ ಪ್ರತಿಭಟನೆಗಳು ನಡೆಯುತ್ತಿವೆ. ಆದರೆ ಪ್ರಬಲ ನಾಯಕರಿಂದಲೂ ಈ ಯುದ್ಧ ನಿಲ್ಲಿಸಲು ಸಾಧ್ಯವಾಗುತ್ತಿಲ್ಲ ಎಂಬುದೇ ವಿಪರ್ಯಾಸ. ಯುದ್ಧ ವಿರೋಧಿಸುವ ಸಾಮಾನ್ಯ ಜನರ ಅನಿಸಿಕೆಗೆ ಎಲ್ಲೂ ಮನ್ನಣೆ ಸಿಗುತ್ತಿಲ್ಲ ಎಂದು ಕವಯಿತ್ರಿ ಸವಿತಾ ನಾಗಭೂಷಣ ಬೇಸರ ವ್ಯಕ್ತಪಡಿಸಿದರು. ಪ್ಯಾಲಿಸ್ತೇನ್ನಲ್ಲಿ ಸಾವಿಗೀಡಾದ ಸಾವಿರಾರು ಮಂದಿಯಲ್ಲಿ ಮಕ್ಕಳು, ಮಹಿಳೆಯರು, ರೈತರು, ಬಡ ಜನರೂ ಇದ್ದರು. ಇವೆಲ್ಲಾ ಕೇವಲ ಸರ್ಕಾರಗಳು ತೋರಿಸುವ ಅಂಕಿ ಅಂಶಗಳಷ್ಟೇ. ವಾಸ್ತವದಲ್ಲಿ ಸಾವು-ನೋವಿನ ಪ್ರಮಾಣ ಬಹಳಷ್ಟಿರುತ್ತದೆ. ಆಪರೇಷನ್ ಬ್ಲೂಸ್ಟಾರ್ ಹೆಸರಿನಲ್ಲಿ ಪಂಜಾಬ್ನಲ್ಲಿ 1980ರ ದಶಕದಲ್ಲಿ ನಮ್ಮವರೇ ನಮ್ಮವರನ್ನು ಸಾಯಿಸಿದ್ದು, ಬಳಿಕ ಜಮ್ಮು-ಕಾಶ್ಮೀರದಲ್ಲಿ ನಡೆದ ಸಾವು, ನೋವುಗಳು, ಮಣಿಪುರದಲ್ಲಿ ನಡೆದ ಹತ್ಯಾಕಾಂಡ ಎಲ್ಲವೂ ತಲ್ಲಣ ಮೂಡಿಸುವ ಸಂಗತಿಗಳೇ ಆಗಿವೆ ಎಂದರು. ಭಾರತದ ಸ್ವಾತಂತ್ರೃ ಹೋರಾಟದಲ್ಲಿ ಗಾಂಧೀಜಿ ಯುದ್ಧದ ಮಾರ್ಗ ಅನುಸರಿಸಲಿಲ್ಲ. ಒಂದು ವೇಳೆ ಅಹಿಂಸೆ ಬದಲು ಯುದ್ಧವೇ ಅವರ ಆಯ್ಕೆಯಾಗಿದ್ದರೆ ನಮ್ಮಲ್ಲೂ ಕೋಟ್ಯಂತರ ಮಂದಿ ಸಾವಿಗೀಡಾಗುತ್ತಿದ್ದರು ಎಂದು ಹೇಳಿದರು.
