ಇನ್ಸುಲಿನ್, ಮಾತ್ರೆಗಾಗಿ ಕಲ್ಲೂರು ನೇತೃತ್ವದಲ್ಲಿ ಪ್ರತಿಭಟನೆ| mcgann insulin

ಇನ್ಸುಲಿನ್ ಹಾಗೂ ಮಾತ್ರೆಗಳ ಉಚಿತ ವಿತರಣೆ ನಿಲ್ಲಿಸಿರುವುದು ಜನವಿರೋಧಿ ನಿರ್ಧಾರವಾಗಿದ್ದು, ಮೆಗ್ಗಾನ್‌ಗೆ ನಮ್ಮ ಜಿಲ್ಲೆ ಮಾತ್ರವಲ್ಲದೆ ದಾವಣಗೆರೆ, ಚಿಕ್ಕಮಗಳೂರು, ಉತ್ತರಕನ್ನಡ, ಚಿತ್ರದುರ್ಗ ಜಿಲ್ಲೆಗಳಿಂದ ರಕ್ತದೊತ್ತಡ ಹಾಗೂ ಮಧುಮೇಹ ಪೀಡಿತರು ಬರುತ್ತಾರೆ. ಅವರೆಲ್ಲರಿಗೂ ಈಗ ತೊಂದೆಯಾಗಿದೆ ಎಂದು ಪ್ರತಿಭಟನಾಕಾರರು ಕಳವಳ ವ್ಯಕ್ತಪಡಿಸಿದರು.

ಸರ್ಕಾರದಿಂದ ಸರಬರಾಜಾಗುತ್ತಿದ್ದ ಇನ್ಸುಲಿನ್ ಹಾಗೂ ಬಿಪಿ ಮಾತ್ರೆಗಳು ಪರಿಣಾಮಕಾರಿಯಾಗಿಲ್ಲ ಎಂದು ಸುಳ್ಳು ಹೇಳಿ, ಮೆಡಿಕಲ್ ಸ್ಟೋರ್ಸ್‌ಗಳಿಂದ ಇವುಗಳನ್ನು ತರುವಂತೆ ರೋಗಿಗಳಿಗೆ ವೈದ್ಯರು ತಿಳಿಸುತ್ತಿದ್ದಾರೆ. ಇದರಿಂದ ಬಡ ರೋಗಿಗಳ ಜೇಬಿಗೂ ಹೊರೆಯಾಗುತ್ತಿದೆ ಎಂದು ತಿಳಿಸಿದರು.

ಇದರ ಜತೆಗೆ ತಿಂಗಳಿಗೊಮ್ಮೆ 10 ರೂ. ಪಾವತಿಸಿ ಹೊಸದಾಗಿ ಹೊರರೋಗಿಗಳ ಚೀಟಿ ಮಾಡಿಸಬೇಕೆಂಬ ಜನವಿರೋಧಿ ನೀತಿಯನ್ನು ಕೂಡ ಮೆಗ್ಗಾನ್ ಆಡಳಿತ ಮಂಡಳಿ ಜಾರಿಗೆ ತಂದಿದೆ. ಇದನ್ನು ಕೈ ಬಿಡಬೇಕು. ಹಿರಿಯ ನಾಗರಿಕರಿಗೆ ಪ್ರತ್ಯೇಕ ಒಪಿಡಿ ಕೌಂಟರ್ ತೆರೆಯಬೇಕು. ಹಿರಿಯ ನಾಗರಿಕರಿಗೆ ಮತ್ತು ಮಹಿಳೆಯರಿಗೆ ಆದ್ಯತೆ ನೀಡಿ ಮೊದಲು ಚಿಕಿತ್ಸೆ ನೀಡಬೇಕು ಎಂದು ಆಗ್ರಹಿಸಿದರು.

ರೋಗಿಗಳನ್ನು ಗಾಲಿ ಕುರ್ಚಿಯಲ್ಲಿ ಕೊಂಡೊಯ್ಯಲು ಡಿ ಗ್ರೂಪ್ ನೌಕರರು ಲಂಚ ಪಡೆಯುತ್ತಿರುವ ದೂರುಗಳಿವೆ. ಇದನ್ನು ತಪ್ಪಿಸಬೇಕು. ಔಷಧ, ಮುಲಾಮು ಮತ್ತು ಸಿರಾಪ್ ನೀಡುವ ಔಷಧ ಕೌಂಟರ್‌ಗಳಲ್ಲಿ ಹಿರಿಯರಿಗೆ ಮತ್ತು ಮಹಿಳೆಯರಿಗೆ ಪ್ರತ್ಯೇಕ ಸರದಿ ಮಾಡಿಸಬೇಕು ಎಂದು ಒತ್ತಾಯಿಸಿದರು.

ತುರ್ತು ಚಿಕಿತ್ಸಾ ಘಟಕ ಮತ್ತು ಒಪಿಡಿಗಳಿಗೆ ತಜ್ಞ ವೈದ್ಯರ ನೇಮಕ ಮಾಡಬೇಕು. ಕಡ್ಡಾಯವಾಗಿ ಅವರು ಬೆಳಗ್ಗೆಯಿಂದ ಸಂಜೆಯವರೆಗೆ ಕರ್ತವ್ಯ ನಿರ್ವಹಿಸುವಂತೆ ನೋಡಿಕೊಳ್ಳಬೇಕು ಎಂದು ಪ್ರತಿಭಟನಾಕಾರರು ಆಗ್ರಹಿಸಿದರು.

ಟ್ರಸ್ಟ್‌ನ ಪ್ರಮುಖರಾದ ಕಲ್ಲೂರು ಮೇಘರಾಜ್, ಹೊಳೆಮಡಲು ವೆಂಕಟೇಶ್, ಎಚ್.ಎಂ.ಸಂಗಯ್ಯ, ಎಸ್.ಬಿ. ಅಶೋಕ್‌ಕುಮಾರ್, ಜನಮೇಜಿರಾವ್, ವೇದಾಂತ್‌ಗೌಡ, ಮಂಜುನಾಥ್, ಶಂಕ್ರನಾಯ್ಕ ಮುಂತಾದವರಿದ್ದರು.