ಜಿಲ್ಲೆಯಲ್ಲಿ 2023ರ ಆಗಸ್ಟ್ 28ರಿಂದ ಈ ವರ್ಷ ನವೆಂಬರ್ 20ರವರೆಗೆ ಒಟ್ಟು 3,10,560 ಇ-ಚಲನ್ ಪ್ರಕರಣಗಳನ್ನು ದಾಖಲಿಸಲಾಗಿದೆ. ಇವುಗಳ ಒಟ್ಟು ದಂಡದ ಮೊತ್ತ 22,77,61,750 ರೂ. ಈ ಪೈಕಿ 1,10,052 ಪ್ರಕರಣಗಳಲ್ಲಿ ಒಟ್ಟು 6,43,70,500 ರೂ. ವಸೂಲಾಗಿದೆ. ಇನ್ನೂ ಎರಡು ಲಕ್ಷ ಪ್ರಕರಣಗಳು ಬಾಕಿ ಇದ್ದು, ಇವುಗಳಿಂದ 16,33,91,250 ರೂ. ದಂಡ ಪಾವತಿಯಾಗಬೇಕಿದೆ ಎಂದು ಸಂಚಾರ ಠಾಣೆ ಸಿಪಿಐ ದೇವರಾಜ್ ಮಾಹಿತಿ ನೀಡಿದರು. ಈ ಹಿಂದೆಯೂ ದಂಡ ಪಾವತಿಗೆ ಶೇ.50ರ ರಿಯಾಯಿತಿ ಘೋಷಣೆ ಮಾಡಲಾಗಿತ್ತು. ಆ ಸಂದರ್ಭದಲ್ಲಿ ಕೊನೆಯ ದಿನಗಳಲ್ಲಿ ಹೆಚ್ಚಿನ ಜನರು ದಂಡ ಪಾವತಿಗೆ ಮುಂದಾಗಿದ್ದರು. ಈ ಬಾರಿ ಅದಕ್ಕೆ ಅವಕಾಶ ನೀಡದಂತೆ ಸಾರ್ವಜನಿಕರು ಆರಂಭದಲ್ಲೇ ದಂಡ ಪಾವತಿಸಿ ಸಹಕರಿಸಬೇಕು. ಇದರಿಂದ ಸಿಬ್ಬಂದಿ ಮೇಲಿನ ಒತ್ತಡವೂ ಕಡಿಮೆಯಾಗಲಿದೆ. ಕಡೇ ದಿನಗಳಿಗೆ ಕಾದು ಏನಾದರೂ ತಾಂತ್ರಿಕ ಸಮಸ್ಯೆಗಳು ಎದುರಾದರೆ ಅವಕಾಶ ಕೈತಪ್ಪುವ ಸಾಧ್ಯತೆಗಳಿರುತ್ತದೆ ಎಂದರು.
