ಶುಭಮಂಗಳ ಸಮುದಾಯ ಭವನದಲ್ಲಿ ಎರಡು ಮಹಡಿಗಳಲ್ಲಿ ವಿಸ್ಮಯ ಲೋಕವೇ ತೆರೆದುಕೊಂಡಿವೆ. ದೇಶದ ವಿವಿಧೆಡೆಯಿಂದ ಆಗಮಿಸಿರುವ 50 ಮಂದಿ ನಾಣ್ಯ, ನೋಟು ಹಾಗೂ ಅಂಚೆಚೀಟಿಗಳ ಸಂಗ್ರಾಹಕರು ತಮ್ಮಲ್ಲಿರುವ ಅಪರೂಪ ಸಂಗ್ರಹವನ್ನು ಅನಾವರಣಗೊಳಿಸಿದ್ದಾರೆ. ಇಲ್ಲಿ ಒಂದು ಸುತ್ತು ಬಂದರೆ ಇಡೀ ವಿಶ್ವವೇ ತೆರೆದುಕೊಂಡ ಅನುಭವವಾಗುತ್ತದೆ. ದಕ್ಷಿಣ ಕೊರಿಯಾ, ಒಮನ್, ಹಂಗೇರಿ, ಇರಾನ್, ಇಟಲಿ, ಫಿಲಿಪೈನ್ಸ್, ಹಾಂಗ್ಕಾಂಗ್, ಈಜಿಪ್ಟ್ ಮುಂತಾದ 100ಕ್ಕೂ ಹೆಚ್ಚು ದೇಶಗಳ ವಿವಿಧ ಕಾಲಘಟ್ಟದ ನಾಣ್ಯಗಳು ಇಲ್ಲಿವೆ. ಕನ್ನಡದ ಜ್ಞಾನಪೀಠ ಪುರಸ್ಕೃತ ಸಾಹಿತಿಗಳ ಜನ್ಮ ದಿನಾಂಕ, ತಿಂಗಳು, ವರ್ಷಕ್ಕೆ ಅನುಗುಣವಾದ ಸರಣಿ ಸಂಖ್ಯೆಯುಳ್ಳ ನೋಟುಗಳ ಜತೆಗೆ ಸಾಹಿತಿಗಳ ಪರಿಚಯ, ಶಿಥಿಲಾವಸ್ಥೆ ತಲುಪಿದ ಭಾರತದ ನೋಟುಗಳಿಗೆ ಆಕರ್ಷಕ ಸಾಲುಗಳು, ಭಾರತದ ವಿವಿಧ ರಾಜರಿಂದ ಆರಂಭವಾಗಿ ಇತ್ತೀಚಿನವರೆಗೆ ಮುದ್ರಿತವಾದ ನೋಟುಗಳು, ಸಿದ್ಧಪಡಿಸಿದ ನಾಣ್ಯಗಳನ್ನು ಕಾಣಬಹುದಾಗಿದೆ. ತರೀಕೆರೆಯ ನಾಗಾರ್ಜುನ ಎಂಬುವರು 10, 5 ಹಾಗೂ ಒಂದು ರೂ. ಮುಖ ಬೆಲೆ ನೋಟುಗಳನ್ನು ಸರಣಿ ಸಂಖ್ಯೆಯಲ್ಲಿ ವಿಶೇಷ ರೀತಿಯಲ್ಲಿ ಜೋಡಿಸಿರುವುದು ಗಮನಸೆಳೆಯುತ್ತದೆ.
