ವೀರ ಸಾವರ್ಕರ್, ನೇತಾಜಿ ಸುಭಾಷ್ಚಂದ್ರ ಬೋಸರ ಅನೇಕ ವಿಚಾರಗಳನ್ನು ಸಂವಿಧಾನಕ್ಕೆ ಸೇರಿಸುವ ಪರೋಕ್ಷ ಪ್ರಯತ್ನವನ್ನು ಅಂಬೇಡ್ಕರ್ ಮಾಡಿದ್ದರು. ದೇಶ ವಿಭಜನೆ ಬಳಿಕ ಪಾಕಿಸ್ತಾನದ ಅಧ್ಯಕ್ಷ ಮಹಮದ್ ಅಲಿ ಜಿನ್ನಾ ಭಾರತದ ಕುರಿತು ಲಘುವಾಗಿ ಮಾತನಾಡಿದ್ದಕ್ಕೆ ಅಂಬೇಡ್ಕರ್ ಕಟುವಾದ ಶಬ್ದಗಳಲ್ಲಿ ಆಕ್ಷೇಪ ವ್ಯಕ್ತಪಡಿಸಿದ್ದರು. ಅವರು ಅಖಂಡ ಭಾರತವನ್ನು ಬಯಸಿದ್ದರು. ಒಮ್ಮೆ ವಿಭಜನೆಯಾದ ಭಾರತ ಮತ್ತೆಂದೂ ಹೋಳಾಗಬಾರದು ಎಂಬ ಎಚ್ಚರದಿಂದ ಸಂವಿಧಾನ ರೂಪಿಸಿದ್ದರು ಎಂದು ಡಾ. ಸುಧಾಕರ ಹೊಸಳ್ಳಿ ತಿಳಿಸಿದರು. ಕಾಲದಿಂದ ಕಾಲಕ್ಕೆ ಹಿಂದೂ ಧರ್ಮಕ್ಕೆ ತನ್ನನ್ನು ಪರಿಶೋಧಿಸಿಕೊಳ್ಳುವ, ಅಗತ್ಯ ಮಾರ್ಪಾಡು ಮಾಡಿಕೊಳ್ಳುವ, ಅಗತ್ಯವಿರುವುದನ್ನು ಸ್ವೀಕರಿಸುವ ಶಕ್ತಿಯಿದೆ. ಈ ಸಂಗತಿಯನ್ನು ಅಂಬೇಡ್ಕರ್ ಕೂಡ ಒಪ್ಪಿಕೊಂಡಿದ್ದರು ಎಂದರು.
