ಕಾಂಗ್ರೆಸ್ ನಾಯಕರು ನಡವಳಿಕೆ ಬದಲಿಸಿಕೊಳ್ಳಲಿ I congress leaders

ಜಿ ರಾಮ್ ಜಿ ಯೋಜನೆ ವಿರುದ್ಧ ಖಂಡನಾ ನಿರ್ಣಯ ಕೈಗೊಳ್ಳಬೇಕೆಂಬ ಏಕೈಕ ಕಾರಣದಿಂದ ರಾಜ್ಯ ಸರ್ಕಾರ ವಿಶೇಷ ಅಧಿವೇಶನ ಕರೆಯಿತು. ಆದರೆ ಅಧಿವೇಶನದ ಉದ್ದಕ್ಕೂ ಕಾಂಗ್ರೆಸ್ ಸದಸ್ಯರು ಸದನದಲ್ಲಿ ನಡೆದುಕೊಂಡ ರೀತಿ ಜನರಲ್ಲಿ ಬೇಸರ ಮೂಡಿಸಿದೆ ಎಂದು ಸೋಮವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

ಆಡಳಿತಾರೂಢ ಸದಸ್ಯರ ಕ್ರಿಯೆಗೆ ಪ್ರತಿಪಕ್ಷ ಸದಸ್ಯರಾದ ನಾವು ಪ್ರತಿಕ್ರಿಯೆ ನೀಡಿದ್ದೆವು. ಕ್ರಿಯೆ ಮಾಡಿದವರಿಗಿಂತ ಪ್ರತಿಕ್ರಿಯಿಸಿದವರ ಮೇಲೆಯೇ ತಪ್ಪು ಹೊರೆಸುವ ಕೆಲಸವಾಯಿತು. ಜಿ ರಾಮ್ ಜಿ ಬಗ್ಗೆ ಚರ್ಚಿಸಲು ಬಿಜೆಪಿ ಸದಸ್ಯರು ಸನ್ನದ್ಧರಾಗಿ ಸದನಕ್ಕೆ ಹೋಗಿದ್ದೆವು. ಆದರೆ ಪ್ರತಿ ಹಂತದಲ್ಲೂ ಚರ್ಚೆಯನ್ನು ಬೇರೆ ಆಯಾಮಕ್ಕೆ ಕೊಂಡೊಯ್ಯುವ ಪ್ರಯತ್ನ ಸದನದಲ್ಲಿ ನಡೆಯಿತು ಎಂದರು.

ಈ ಹಿಂದೆ ಬಿಜೆಪಿ ಸರ್ಕಾರ ಇದ್ದಾಗ ಹರಿಪ್ರಸಾದ್ ಪರಿಷತ್‌ನಲ್ಲಿ ಪ್ರತಿಪಕ್ಷ ನಾಯಕರಾಗಿದ್ದರು. ಇದುವರೆಗೆ ಅವರು ಮಾತನಾಡಿದ ಅನೇಕ ಅಸಂವಿಧಾನಿಕ ಪದಗಳನ್ನು ಕಡತದಿಂದ ತೆಗೆದುಹಾಕಲಾಗಿದೆ. ಆದರೂ ಅವರ ವರ್ತನೆ ಬದಲಾಗಿಲ್ಲ. ಉದ್ಧಟತನ ಮುಂದುವರಿದಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಬಿಜೆಪಿ ಪ್ರಧಾನ ಕಾರ್ಯದರ್ಶಿಗಳಾದ ಮಾಲತೇಶ್, ಶಿವರಾಜ್, ಕಾರ್ಯದರ್ಶಿ ಸುರೇಖಾ ಮುರಳೀಧರ್, ಮಹಿಳಾ ಮೋರ್ಚಾ ಜಿಲ್ಲಾ ಪ್ರಧಾನ ಕಾರ್ಯದರ್ಶಿಗಳಾದ ವೀಣಾ ನಾಗರಾಜ್, ಸುಮಲತಾ ಭೂಪಾಳಂ, ನಗರ ಮಹಿಳಾ ಮೋರ್ಚಾ ಅಧ್ಯಕ್ಷೆ ರಶ್ಮಿ, ಜಿಲ್ಲಾ ಮಾಧ್ಯಮ ಪ್ರಮುಖ್ ಚಂದ್ರಶೇಖರ್, ಮಾಧ್ಯಮ ಸಹ ಪ್ರಮುಖ್ ಮಂಜುನಾಥ್ ಸುದ್ದಿಗೋಷ್ಠಿಯಲ್ಲಿದ್ದರು.

ರಾಜ್ಯಪಾಲ ಥಾವರಚಂದ್ ಗೆಹಲೋತ್ ಸದನದಿಂದ ಹೊರ ಹೋಗುವಾಗ ಬಿ.ಕೆ.ಹರಿಪ್ರಸಾದ್ ಹಾಗೂ ಎಸ್.ರವಿ ಅಡ್ಡಲಾಗಿ ನಿಲ್ಲಲು ಪ್ರಯತ್ನಿಸಿದ್ದರು. ಮಾರ್ಷಲ್‌ಗಳು ಇವರಿಬ್ಬರನ್ನು ತಡೆಯುವಾಗ ಹರಿಪ್ರಸಾದ್ ಕುರ್ತಾ ಸ್ವಲ್ಪ ಹರಿಯಿತು. ನನ್ನ ಕುರ್ತಾ ಹರಿದಿದ್ದು ಬಿಜೆಪಿಯವರು ಎಂದು ಹರಿಪ್ರಸಾದ್ ಸುಳ್ಳು ಹೇಳಿದರು. ರಾಜ್ಯಪಾಲರು ರಾಷ್ಟ್ರಗೀತೆಗೆ ಅವಮಾನ ಮಾಡಿದ್ದಾರೆ ಎಂದು ಹಿರಿಯ ಸಚಿವ ಎಚ್.ಕೆ.ಪಾಟೀಲ್ ಮೂಲಕ ಸುಳ್ಳು ಹೇಳಿಸಲಾಯಿತು. ನಜೀರ್ ಅಹಮದ್ ಪ್ರಧಾನಿ ವಿರುದ್ಧ ಆಕ್ಷೇಪಾರ್ಹ ಪದ ಬಳಸಿದರೂ ಸದನದಿಂದ ಅಮಾನತುಗೊಂಡಿದ್ದು ಬಿಜೆಪಿಯ ಸಿ.ಟಿ.ರವಿ. ಒಟ್ಟಾರೆ ವಿಶೇಷ ಅಧಿವೇಶನ ಅನೇಕ ಕಹಿ ಘಟನೆಗಳಿಗೆ ಸಾಕ್ಷಿಯಾಯಿತು. ಇನ್ನು ಮುಂದಾದರೂ ಕಾಂಗ್ರೆಸ್‌ನವರು ತಮ್ಮ ನಡವಳಿಕೆ ಬದಲಿಸಿಕೊಳ್ಳಲಿ ಎಂದು ಡಿ.ಎಸ್.ಅರುಣ್ ಆಗ್ರಹಿಸಿದರು.