ಭಸ್ಮ, ಲಿಂಗಕ್ಕಿದೆ ಕೆಟ್ಟ ಮಾರ್ಗದಲ್ಲಿ ಹೋಗದಂತೆ ತಡೆಯುವ ಶಕ್ತಿ । Lingatattwa Darshana

ಅಂಬೇಡ್ಕರ್ ಭವನದಲ್ಲಿ ಲಿಂಗತತ್ತ್ವ ದರ್ಶನ ಕುರಿತು ಕಾಶಿ ಪೀಠದ ಶ್ರೀ ಡಾ. ಚಂದ್ರಶೇಖರ ಶಿವಾಚಾರ್ಯ ಭಗವತ್ಪಾದರು ಆಶೀರ್ವಚನ ನೀಡಿದರು. ಹೊನ್ನಾಳಿಯ ಹಿರೇಕಲ್ಮಠದ ಶ್ರೀ ಡಾ. ಚನ್ನಮಲ್ಲಿಕಾರ್ಜುನ ಸ್ವಾಮೀಜಿ, ಬಿಳಕಿ ಹಿರೇಮಠದ ಶ್ರೀ ರಾಚೋಟೇಶ್ವರ ಸ್ವಾಮೀಜಿ ಸಮ್ಮುಖ ವಹಿಸಿದ್ದರು.

Published on:

29 Dec 2025, 10:57 am

ಪ್ರಮುಖ ಮುಖ್ಯಾಂಶಗಳು

ಲಿಂಗದ ವಾಸ್ತವಿಕ ಸ್ವರೂಪ ಅನುಭವಿಸುವುದೇ ನಿಜವಾದ ಲಿಂಗತತ್ತ್ವ ದರ್ಶನ
ಶ್ರೀ ಶಿವಕುಮಾರ ಸ್ವಾಮೀಜಿಗಳ ನೌಕರರ ಸಂಘದ ಸಹಯೋಗದಲ್ಲಿ ಆಧ್ಯಾತ್ಮ ಪ್ರವಚನ
ಕಾಶಿ ಪೀಠದ ಶ್ರೀ ಡಾ. ಚಂದ್ರಶೇಖರ ಶಿವಾಚಾರ್ಯ ಭಗವತ್ಪಾದರು ಹೇಳಿಕೆ

ಶಿವಮೊಗ್ಗ: ಲಿಂಗತತ್ತ್ವ ದರ್ಶನ(Lingatattwa Darshana) ಗಹನವಾದ ವಿಚಾರವಾಗಿದ್ದು, ಲಿಂಗದ ವಾಸ್ತವಿಕವಾದ ಸ್ವರೂಪವನ್ನು ಅನುಭವಿಸುವುದೇ ನಿಜವಾದ ಲಿಂಗತತ್ತ್ವ ದರ್ಶನ ಎಂದು ಕಾಶಿ ಪೀಠ(Kashi peetha)ದ ಶ್ರೀ ಡಾ. ಚಂದ್ರಶೇಖರ ಶಿವಾಚಾರ್ಯ ಭಗವತ್ಪಾದರು ಹೇಳಿದರು.

ನಗರದ ಅಂಬೇಡ್ಕರ್ ಭವನದಲ್ಲಿ ಶ್ರೀ ಶಿವಕುಮಾರ ಸ್ವಾಮೀಜಿಗಳ ನೌಕರರ ಸಂಘ ಮತ್ತು ಶ್ರೀ ಬಸವೇಶ್ವರ ವೀರಶೈವ-ಲಿಂಗಾಯತ ಸಮಾಜ ಸೇವಾ ಸಂಘದ ಸಹಯೋಗ ಮತ್ತು ವಿವಿಧ ಸಂಘ ಸಂಸ್ಥೆಗಳ ಸಹಕಾರದೊಂದಿಗೆ ಲಿಂಗತತ್ತ್ವ ದರ್ಶನ ಆಧ್ಯಾತ್ಮ ಪ್ರವಚನ(Spiritual discourse)ದಲ್ಲಿ ಆಶೀವರ್ಚನ ನೀಡಿದರು.

ಇಷ್ಟಲಿಂಗ ದೇವರನ್ನು ಜತೆ ಜತೆಗೆ ಕರೆದೊಯ್ಯುವ ಏಕೈಕ ಸಮಾಜವಿದ್ದರೆ ಅದು ವೀರಶೈವ ಸಮಾಜ. ವೀರಶೈವ ಲಿಂಗಾಯತರನ್ನು ಹೊರತುಪಡಿಸಿ ಇತರೆ ವರ್ಗದವರು ಬೇರೆ ಬೇರೆ ರೂಪದಲ್ಲಿ ಲಿಂಗತತ್ತ್ವವನ್ನು ಆಚರಿಸುತ್ತಾರೆ. ಆದರೆ ವೀರಶೈವರಲ್ಲಿ ಇಷ್ಟಲಿಂಗ, ಪ್ರಾಣಲಿಂಗ ಮತ್ತು ಭಾವಲಿಂಗದ ಮೂಲಕ ಲಿಂಗತತ್ತ್ವ ಆಚರಣೆಯಲ್ಲಿದ್ದು, ದೇವಸ್ಥಾನದಲ್ಲಿ ಇರುವ ಲಿಂಗಕ್ಕೂ ದೇಹದ ಮೇಲಿರುವ ಲಿಂಗಕ್ಕೂ ವ್ಯತ್ಯಾಸವಿದೆ ಎಂದರು.

ಹಣೆ ಮೇಲೆ ಭಸ್ಮ, ಕೊರಳಲ್ಲಿ ಲಿಂಗವಿರಬೇಕು. ನಾವು ಅವ್ಯವಹಾರ ಮಾರ್ಗದಲ್ಲಿ ಹೋಗದಂತೆ ತಡೆಯುವ ಶಕ್ತಿ ಭಸ್ಮ ಮತ್ತು ಲಿಂಗಕ್ಕಿದೆ. ಅವು ಕೇವಲ ಧಾರ್ಮಿಕ ಆಚರಣೆ(Religious practice)ಯಲ್ಲ. ನಮ್ಮನ್ನು ರಕ್ಷಣೆ ಮಾಡುವ ಪ್ರಮುಖ ಅಸ್ತ್ರಗಳು. ಗುರು, ಲಿಂಗ, ಜಂಗಮರಲ್ಲಿ ಭಕ್ತಿ ಇದ್ದವರೇ ನಿಜವಾದ ಶ್ರೀಮಂತರು. ಮೂವರಲ್ಲಿ ಯಾರಿಗೂ ಭಕ್ತಿ ಇಲ್ಲವೋ ಅವರೇಲ್ಲರೂ ಧರಿದ್ರರು ಎಂದ ಶ್ರೀಗಳು, ಹಣ, ಅಂತಸ್ತು ಇರುವವರು ಶ್ರೀಮಂತರಲ್ಲ. ಲಿಂಗಧಾರಣೆ ಮಾಡಿದವರು ನಿಜವಾದ ಶ್ರೀಮಂತರು ಎಂದರು.

ಲಿಂಗವು ವೀರಶೈವರನ್ನು ಗುರುತು ಹಿಡಿಯಲು ಏಕೈಕ ಅಸ್ತ್ರವಾಗಿದೆ. ಲಿಂಗಪೂಜೆಗಿಂತ ಶ್ರೇಷ್ಠ ಮತ್ತೊಂದಿಲ್ಲ. ಲಿಂಗಪೂಜೆ ಮಾಡುವ ಭಾಗ್ಯ ಎಲ್ಲರಿಗೂ ಸಿಗಲ್ಲ. ಲಿಂಗ ಧರಿಸಿದವರು ನಿಜವಾದ ಭಾಗ್ಯಶಾಲಿಗಳು ಎಂದರು. ಬಿಳಕಿ ಹಿರೇಮಠದ ಶ್ರೀ ರಾಚೋಟೇಶ್ವರ ಸ್ವಾಮೀಜಿ ಸಮ್ಮುಖ ವಹಿಸಿದ್ದರು.

ಶಾಂತಿ, ಸುಖ ಅಂಗಡಿಯಲ್ಲಿ ಸಿಗುವ ವಸ್ತುಗಳಲ್ಲ

ಸುಖ ಮತ್ತು ಶಾಂತಿ ಅಂಗಡಿಯಲ್ಲಿ ಸಿಗುವ ವಸ್ತುಗಳಲ್ಲ. ಉತ್ತಮ ಬದುಕು ಸಾಗಿಸಿದಾಗ ಅವರೆಡೂ ಪ್ರಾಪ್ತವಾಗಲಿವೆ ಎಂದು ಹೊನ್ನಾಳಿಯ ಹಿರೇಕಲ್ಮಠದ ಶ್ರೀ ಡಾ. ಚನ್ನಮಲ್ಲಿಕಾರ್ಜುನ ಸ್ವಾಮೀಜಿ ಹೇಳಿದರು.

ಪ್ರತಿಯೊಬ್ಬ ಮನುಷ್ಯನೂ ಜೀವನದಲ್ಲಿ ಸುಖ ಮತ್ತು ಸಮಾಧಾನ ಅಥವಾ ಶಾಂತಿಯನ್ನು ಅಪೇಕ್ಷೆ ಪಡುತ್ತಾನೆ. ಸುಖವನ್ನು ಅಪೇಕ್ಷಿಸಿದ ಮೇಲೆ ಶಾಂತಿಯನ್ನೂ ಭಯಸುತ್ತಾನೆ. ಆದರೆ ಅವುಗಳನ್ನು ಪಡೆಯಲು ಉತ್ತಮ ಬದುಕು ನಮ್ಮದಾಗಿರಬೇಕು ಎಂದರು.

ಜಗತ್ತಿನಲ್ಲಿ ನೀರು, ಅನ್ನ ಮತ್ತು ಸುಭಾಷಿತ ಎಂಬುದು ರತ್ನಗಳು. ಈ ಮೂರೇ ರತ್ನಗಳು ಬದುಕು ಕಟ್ಟಿಕೊಡುತ್ತವೆ. ಲಿಂಗತತ್ತ್ವ ದರ್ಶನ ಮಾಡಿಕೊಳ್ಳಬೇಕಾದರೆ ಅಕ್ಕಮಹಾದೇವಿಯ ವಚನಗಳನ್ನು ಮೊದಲು ಅರಿಯಬೇಕು. ಜತೆಗೆ ಎಲ್ಲಿವರೆಗೆ ಗುರುವಿಗೆ ಶರಣಾಗುವುದಿಲ್ಲವೋ ಅಲ್ಲಿವರೆಗೆ ಸುಖ, ಸಂಪತ್ತು ಲಭಿಸಲ್ಲ. ಅದಕ್ಕೆ ಜ್ಞಾನ ಸಂಪಾದನೆ ಮಾಡಬೇಕು ಎಂದರು.

ಅಂಬೇಡ್ಕರ್ ಭವನ