ಅಕ್ರಮವಾಗಿ ಗ್ಯಾಸ್​ ಸಂಗ್ರಹಿಸಿದರೆ ಕ್ರಮ

ಸಾಗರ: ಎಸ್ಮಾ ಜಾರಿಯಾಗಿದ್ದು ಅಕ್ರಮವಾಗಿ ಗ್ಯಾಸ್​ ಸಂಗ್ರಹಿಸಿ ಹೆಚ್ಚಿನ ಬೆಲೆಗೆ ಮಾರಾಟ ಮಾಡಿದರೆ ಅಂಥವರ ವಿರುದ್ಧ ಕಠಿಣ ಕ್ರಮ ಜರುಗಿಸಲಾಗುವುದು ಎಂದು ಶಾಸಕ ಗೋಪಾಲಕೃಷ್ಣ ಬೇಳೂರು ಹೇಳಿದರು.

ಪ್ರವಾಸಿ ಮಂದಿರದ ಸಭಾಂಗಣದಲ್ಲಿ ಶನಿವಾರ ಅಡುಗೆ ಅನಿಲ ಸಮರ್ಪಕ ಪೂರೈಕೆ, ಕಾರ್ಗಲ್​ ಭಾಗದಲ್ಲಿ ವ್ಯಾಪಿಸಿರುವ ವಾಂತಿಭೇದಿ ಹಾಗೂ ಕೆಎ್​ಡಿ ಕುರಿತು ಕರೆಯಲಾಗಿದ್ದ ಸಭೆಯಲ್ಲಿ ಮಾತನಾಡಿದರು.

ಸಾಗರದಲ್ಲಿ ಅಡುಗೆ ಅನಿಲಕ್ಕೆ ಯಾವುದೇ ಕೊರತೆ ಇಲ್ಲ. ಸಾರ್ವಜನಿಕರು ಅನಗತ್ಯ ಗಾಬರಿಯಾಗಿ ಮುಂಗಡ ಬುಕ್ಕಿಂಗ್​ ಮಾಡಬೇಡಿ. ಹೋಟೆಲ್​ ಮತ್ತು ಕಲ್ಯಾಣ ಮಂಟಪಗಳಲ್ಲಿ ವಾಣಿಜ್ಯ ಬಳಕೆ ಅಡುಗೆ ಅನಿಲದ ಕೊರತೆ ಬಗ್ಗೆ ಸಣ್ಣಪುಟ್ಟ ಚರ್ಚೆ ನಡೆಯುತ್ತಿದೆ. ಕಲ್ಯಾಣ ಮಂಟಪಗಳಲ್ಲಿ ಮದುವೆ ಹೆಚ್ಚು ಬುಕ್​ ಆಗಿರುವುದರಿಂದ ಅಲ್ಲಿ ಯಾವುದೇ ರೀತಿ ಸಮಸ್ಯೆ ಆಗದಂತೆ ಅಧಿಕಾರಿಗಳಿಗೆ ಸೂಚನೆ ನೀಡಲಾಗಿದೆ. ತುರ್ತು ಇರುವ ಕಡೆಗಳಲ್ಲಿ ಹೋಟೆಲ್​ಗಳಿಗೂ ವಾಣಿಜ್ಯ ಸಿಲಿಂಡರ್​ ಪೂರೈಕೆ ಮಾಡಲಾಗುತ್ತದೆ ಎಂದರು.

ಕಾರ್ಗಲ್​ ಭಾಗದಲ್ಲಿ ಕೆಲವು ವಾಂತಿಭೇದಿ ಪ್ರಕರಣ ದಾಖಲಾಗಿದೆ. ಅದು ಕಾಲರಾ ಎಂಬ ಚರ್ಚೆ ಇತ್ತು. ಆದರೆ ವರದಿಯಲ್ಲಿ ಕಾಲರಾ ಅಲ್ಲ ಎನ್ನುವ ಮಾಹಿತಿ ಬಂದಿದೆ. ಇತ್ತೀಚೆಗೆ ನಡೆದ ಜಾತ್ರೆಯಲ್ಲಿ ಐಸ್​ಕ್ರೀಂ, ಪಾನಿಪುರಿ, ಇನ್ನಿತರ ಸೇವನೆಯಿಂದ ಸೋಂಕು ಹರಡಿರಬಹುದು ಎನ್ನಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ಎಲ್ಲಿ ಜಾತ್ರೆ ನಡೆದರೂ ಸೂಕ್ತ ಮುಂಜಾಗ್ರತೆ ವಹಿಸಲು ಅಧಿಕಾರಿಗಳಿಗೆ ಸೂಚಿಸಲಾಗಿದೆ. ಬೇಸಿಗೆ ಪ್ರಾರಂಭವಾಗಿರುವುದರಿಂದ ಕೆಎ್​ಡಿ ಕುರಿತು ಅಗತ್ಯ ಮುಂಜಾಗ್ರತೆ ವಹಿಸಲು ಶಾಸಕರು ಸೂಚಿಸಿದರು.

ಉಪವಿಭಾಗಾಧಿಕಾರಿ ವೀರೇಶ್​ಕುಮಾರ್​, ಡಾ. ಶ್ರೀನಿವಾಸ್​, ಡಾ. ಕಿರಣ್​, ಡಾ. ನಾಗರಾಜ್​, ಡಾ. ಹರ್ಷವರ್ಧನ್​, ಟಿ.ಪಿ.ರಮೇಶ್​, ಅನಿಲ್​, ಶ್ರೀನಿವಾಸ್​ ಮುಂತಾದವರಿದ್ದರು.

ಹೋಟೆಲ್​ಗಳಲ್ಲಿ ಮನೆಗೆ ಬಳಸುವ ಅಡುಗೆ ಅನಿಲ ಉಪಯೋಗಿಸಿದರೆ ಕ್ರಮ ಜರುಗಿಸಲಾಗುತ್ತದೆ. ಅಡುಗೆ ಅನಿಲ ಕೊಡುವ ಸಂದರ್ಭದಲ್ಲಿ ಕಡ್ಡಾಯವಾಗಿ ಸಿರಿಯಲ್​ ನಂಬರ್​ಗಳನ್ನು ದಾಖಲಿಸಬೇಕು. ಯಾರೂ ಕೃತಕ ಅಭಾವ ಸೃಷ್ಟಿಸುವ ಪ್ರಯತ್ನ ಮಾಡಬೇಡಿ.

ರಶ್ಮಿ ಹಾಲೇಶ್​, ತಹಸೀಲ್ದಾರ್​