ಗಾಂಧೀಜಿ ಆತ್ಮಕಥೆಗೆ 100 ವರ್ಷ ಕಾರ್ಯಕ್ರಮ I gandhiji biography

ಶಿವಮೊಗ್ಗ: ಇಡೀ ಜಗತ್ತು (world) ಜಗಳಗಂಟಿಯಂತೆ ವರ್ತಿಸುತ್ತಿರುವ ಈ ಸಂದರ್ಭದಲ್ಲಿ ಗಾಂಧೀಜಿ (gandhiji) ಯವರ ಅಹಿಂಸಾವಾದ ಮತ್ತೆ ಮತ್ತೆ ಪ್ರಸ್ತುತವಾಗುತ್ತಿದೆ ಎಂದು ರಂಗಕರ್ಮಿ ಪ್ರಸನ್ನ (prasanna) ಅಭಿಪ್ರಾಯಪಟ್ಟರು.

ಕುವೆಂಪು ವಿವಿ, ಸಹ್ಯಾದ್ರಿ ಕಲಾ ಕಾಲೇಜು, ಲೋಹಿಯಾ ಜನ್ಮ ಶತಾಬ್ಧಿ ಪ್ರತಿಷ್ಠಾನ, ಕರ್ನಾಟಕ ಗಾಂಧಿ ಸ್ಮಾರಕ ನಿಧಿ ಸಂಯುಕ್ತಾಶ್ರಯದಲ್ಲಿ ಸೋಮವಾರ ಸಹ್ಯಾದ್ರಿ ಕಾಲೇಜಿನಲ್ಲಿ ಆಯೋಜಿಸಿದ್ದ ಗಾಂಧೀಜಿ ಆತ್ಮಕಥೆಗೆ 100 ವರ್ಷ ಕಾರ್ಯಕ್ರಮವನ್ನು ಚರಕ ತಿರುಗಿಸುವುದರ ಮೂಲಕ ಉದ್ಘಾಟಿಸಿ ಮಾತನಾಡಿದರು.

ಗಾಂಧೀಜಿ ಹುಟ್ಟುತ್ತಲೇ ಮಹಾತ್ಮರಾಗಿರಲಿಲ್ಲ. ಬೆಳೆಯುತ್ತಾ ಹೋದಂತೆ ತಾವು ಮಾಡುತ್ತಿದ್ದ ತಪ್ಪುಗಳನ್ನು ತಿದ್ದಿಕೊಳ್ಳುತ್ತಾ, ಇಡೀ ವಿಶ್ವವೇ ತಮ್ಮನ್ನು ಹಿಂಬಾಲಿಸುವಂತೆ ಮಾಡಿದರು. ಅವರ ಆತ್ಮಕಥೆಗೆ 100 ವರ್ಷವಾಗಿರಬಹುದು. ಆದರೆ ಅದು ಯಾವಾಗಲೂ ಪ್ರಸ್ತುತವಾಗಿರುತ್ತದೆ. ಬದುಕನ್ನು ಹೇಗೆ ಎದುರಿಸಬೇಕು? ಎಂಬ ಅಂಶ ಈ ಪುಸ್ತಕ ಕಲಿಸುತ್ತದೆ. ಮಕ್ಕಳು ಇದನ್ನು ಓದಲೇಬೇಕು. ಇದು ಜಗತ್ತಿನ ಹಲವು ಭಾಷೆಗಳಿಗೆ ತರ್ಜುಮೆಯಾಗಿದೆ. ಆಕರ್ಷಕವೂ ಆಗಿದ್ದು ಕೌತುಕ ಮೂಡಿಸುತ್ತ ನಮ್ಮ ವ್ಯಕ್ತಿತ್ವವನ್ನೇ ಬದಲಾಯಿಸಿ ಬಿಡುತ್ತದೆ ಎಂದರು.

ಗಾಂಧೀಜಿ ಅವರ ಉಪ್ಪಿನ ಸತ್ಯಾಗ್ರಹದ ಆಶಯವನ್ನು ಜಗತ್ತು ಎತ್ತಿ ಹಿಡಿಯಿತು. ಇವತ್ತಿನ ದಿನಗಳಲ್ಲಿ ಗಾಂಧಿ ಮಾರ್ಗವೇ ಪ್ರಧಾನವಾದದ್ದು. ಮನುಷ್ಯನಾದವನು ನಾಯಿಗಳ ಹಾಗೆ ಜಗಳವಾಡಬಾರದು. ಮೂಲತಃ ಜಗಳಗಂಟಿಗಳಾದ ನಾವು ಮನುಷ್ಯತ್ವ ಇಟ್ಟುಕೊಳ್ಳಬೇಕು. ಧರ್ಮದ ಕಾರಣಕ್ಕಾಗಿ, ಪ್ರತಿಷ್ಠೆಯ ಕಾರಣಕ್ಕಾಗಿ ಒಂದು ಸ್ಪರ್ಧಾತ್ಮಕ ಜಗತ್ತನ್ನೇ ನಾವು ಕಾಣುತ್ತಿದ್ದೇವೆ. ಬಹುಶಃ ಇಂದು ಮೂರನೇ ಮಹಾಯುದ್ಧದ ಲಕ್ಷಣಗಳು ಗೋಚರಿಸತೊಡಗಿವೆ. ಹೀಗಾಗಿ ಗಾಂಧೀಜಿ ಮತ್ತೆ ಮತ್ತೆ ಮುಖಾಮುಖಿಯಾಗುತ್ತಾರೆ ಎಂದು ಹೇಳಿದರು.

ಇತ್ತೀಚೆಗೆ ಮಂತ್ರ, ಪೂಜಾರಿ, ಧರ್ಮವೇ ಯಥೇಚ್ಚವಾಗಿ ಕಾಣಿಸುತ್ತಿವೆ. ಯಂತ್ರ ನಾಗರಿಕತೆಯಿಂದ ಜಗದ ನಿರ್ಮಾಣ ಅಸಾಧ್ಯ. ಮೋಸದ ಮಾತುಗಳಿಗೆ ಕಿವಿಕೊಡದೇ ಯಂತ್ರ ನಾಗರಿಕತೆಯೊಳಗೆ ಶ್ರಮಜೀವಿಗಳ ನಾಗರಿಕತೆ ಹುಡುಕಬೇಕು. ಸಿರಿವಂತರ ಕೈಗೆ ರಾಜ್ಯನೀಡಲಾದೀತೆ ಎಂಬ ಅರಿವು ಗಾಂಧಿಗಿತ್ತು. ವೈಶ್ಯ ಜನಾಂಗದ ಗಾಂಧಿ, ಬರಿಮೈ ವ್ಯಕ್ತಿಯಾಗಿ ಇಡೀಭಾರತವನ್ನು ಸಂಚರಿಸಿ, ಹಿಂಸಾ ಧರ್ಮ ಬಿಟ್ಟು ದೊಡ್ಡವರಾದರು. ಪೂಜಾರಿ ಧರ್ಮ, ಯಂತ್ರಾಧಾರಿತ ಧರ್ಮದಿಂದ ಹೊರ ಬಂದು, ಶ್ರಮ ಸಂಸ್ಕೃತಿಯ ಮೂಲಕ ಜಗದ ನಿರ್ಮಾಣ ಮಾಡುವ ಜವಾಬ್ದಾರಿಯನ್ನು ಯುವ ಜನಾಂಗ ತೆಗೆದುಕೊಳ್ಳಬೇಕೆಂದರು.

ಕುವೆಂಪು ವಿವಿ ಕುಲಪತಿ ಪ್ರೊ.ಶರತ್ ಅನಂತಮೂರ್ತಿ, ಪ್ರಾಚಾರ್ಯ ಡಾ.ಎಸ್.ಸಿರಾಜ್ ಅಹಮದ್, ವಿದ್ಯಾರ್ಥಿ ಕ್ಷೇಮಾಧಿಕಾರಿ ಡಾ.ಕೆ.ಎನ್.ಮಂಜುನಾಥ್ ಮಾತನಾಡಿದರು. ಐಕ್ಯುಎಸಿ ಸಂಚಾಲಕ ಡಾ.ಎಚ್.ಪಿ.ಮಂಜುನಾಥ್, ಪತ್ರಿಕೋದ್ಯಮ ವಿಭಾಗದ ಮುಖ್ಯಸ್ಥ ಡಾ.ಕೆ.ಎನ್.ಮಹಾದೇವ ಸ್ವಾಮಿ, ಡಾ.ಎಚ್.ಎಂ. ಶಂಭುಲಿಂಗಮೂರ್ತಿ, ಡಾ.ಎಂ.ಹಾಲಮ್ಮ, ಡಾ.ಪ್ರಸನ್ನಕುಮಾರ್, ಡಾ. ಮೇಟಿ ಮಲ್ಲಿಕಾರ್ಜುನ ಮುಂತಾದವರು ಉಪಸ್ಥಿತರಿದ್ದರು.

ಹೊಸ ಪ್ರಯೋಗಗಳ ಮೂಲಕ ಗಾಂಧೀಜಿ ಸ್ವಂತಿಕೆಯ ಶ್ರಮ ತತ್ವಗಳ ಪ್ರತಿಪಾದಕರಾಗಿದ್ದರು. ಇಂದಿನ ಸಾಮಾಜಿಕ ಜಾಲತಾಣಗಳು ಸುಳ್ಳುಗಳನ್ನೆ ಸೃಷ್ಟಿಸಿ ಜನರ ಹಾದಿ ತಪ್ಪಿಸುತ್ತಿವೆ. ಇಂತಹ ಮಾಧ್ಯಮಗಳ ಬಗ್ಗೆ ಎಚ್ಚರವಿರಬೇಕು. ಸಾಮಾಜಿಕ ಜಾಲತಾಣದಲ್ಲಿ ಅಸತ್ಯದ ಮಾಹಿತಿಗಳನ್ನು ಬಿತ್ತುವ ಜನರ ಗುಂಪುಗಳಿವೆ. ಇವುಗಳ ಆಮಿಷಕ್ಕೆ ಒಳಗಾಗಬಾರದು. ಶ್ರಮ ಸಂಸ್ಕೃತಿಯ ಸತ್ಯದ ಬದುಕಿಗೆ ಮುಸುಕು ಹಾಕಲಾಗಿದೆ. ಅದನ್ನು ತೆಗೆದು ಸತ್ಯವನ್ನು ಹುಡುಕಬೇಕು. ಸತ್ಯದ ಅನ್ವೇಷಣೆಯು ಎಂದೆಂದಿಗೂ ಅಮರ. ಅಂತಿಮವಾಗಿ ಗೆಲ್ಲುವುದು ಸತ್ಯ ಎಂಬ ಮರ್ಮವನ್ನು ಅರಿಯಬೇಕು. ದೇಶದೇಶಗಳ ನಡುವಿನ ದ್ವೇಷಕ್ಕೆ ಮುಲಾಮು ಗಾಂಧಿವಾದ ಎಂದು ಪ್ರೊ.ಶರತ್ ಅನಂತಮೂರ್ತಿ ಅಭಿಪ್ರಾಯಪಟ್ಟರು.