ಶಿವದಾಸ್​ ಘೋಷ್​ ಅಪ್ರತಿಮ ನಾಯಕ

ಕೊಪ್ಪಳ: ಸ್ವಾತಂತ್ರ ನಂತರ ಬಂಡವಾಳಶಾಹಿಗಳ ಕೈಗೆ ದೇಶ ಹೋಗಿದ್ದನ್ನು ಖಂಡಿಸಿ ಬಡ, ಕಾರ್ಮಿಕರ ಪರ ಹೋರಾಡಿದವರು ಶಿವದಾಸ್​ ಘೋಷ್​ ಎಂದು ಎಸ್​ಯುಸಿಐ(ಕಮ್ಯುನಿಷ್ಟ್​) ಸದಸ್ಯ ಶರಣು ಪಾಟೀಲ್​ ಹೇಳಿದರು.

ನಗರದ ಪಕ್ಷದ ಕಚೇರಿಯಲ್ಲಿ ಸೋಮವಾರ ಹಮ್ಮಿಕೊಂಡಿದ್ದ ಶಿವದಾಸ್​ ಘೋಷ್​ ಅವರ 48ನೇ ಸ್ಮರಣೆ ದಿನ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಬ್ರಿಟಿಷರು ಭಾರತ ಬಿಟ್ಟು ತೊಲಗಿದ ಮೇಲೆ ನಮ್ಮ ದೇಶಕ್ಕೆ ಸ್ವತಂತ್ರ ಸಿಕ್ಕಿತು ಎಂದು ಎಲ್ಲರು ಸಂಭ್ರಮಿಸಿದರು. ಸ್ವತಂತ್ರ ಸಿಕ್ಕಿದ್ದು ಬಂಡವಾಳಶಾಹಿಗಳಿಗೆ ಹೊರತು ರೈತ ಕಾರ್ಮಿಕರಿಗಲ್ಲ ಎಂದು ಹೇಳಿದ ಶಿವಾದಾಸ್​ರು 1948ರಲ್ಲಿ ಎಸ್​ಯುಸಿಐ (ಕಮ್ಯುನಿಷ್ಟ) ಪಕ್ಷ ಸ್ಥಾಪಿಸಿದರು. ದೇಶದ ತುಂಬಾ ರೈತ, ಕಾರ್ಮಿಕ, ವಿದ್ಯಾರ್ಥಿಗಳ, ಯುವಜನರ ಮತ್ತು ಮಹಿಳೆಯರ ಸಮಸ್ಯೆಗಳ ವಿರುದ್ಧ ನಿರಂತರ ಹೋರಾಟ ನಡೆಯುತ್ತಿವೆ. ಈ ಹೋರಾಟಗಳ ಮೂಲಕ ಅಂತಿಮವಾಗಿ ಸಮಾಜವಾದಿ ವ್ಯವಸ್ಥೆ ಸ್ಥಾಪನೆಯಾಗಲಿದೆ ಎಂದರು. ಪಕ್ಷದ ಪದಾಧಿಕಾರಿಗಳಾದ ಮಂಜುಳಾ ಮಜ್ಜಿಗಿ, ಶಾರದಾ, ಸುಭಾನ್​ ನೀರಲಗಿ, ದೇವರಾಜ್​ ಹೊಸಮನಿ, ಆರ್​.ವಿ.ಕಾಮನೂರು ಇದ್ದರು.