ವಿಜಯವಾಣಿ ಸುದ್ದಿಜಾಲ ಗದಗ
ನರೇಗಾ ಯೋಜನೆ ಪರಿಣಾಮಕಾರಿ ಅನುಷ್ಠಾನದಲ್ಲಿ ಹಲವು ದೋಷಗಳಿದ್ದರೂ, ಯೋಜನೆ ಬಲವರ್ಧನೆಗೆ ಅಂಗನವಾಡಿಗಳನ್ನು ಹೊರತು ಪಡಿಸಿ ಹೊಸದಾಗಿ ಶಿಶು ಪಾಲನಾ ಕೇಂದ್ರಗಳ ಆರಂಭಿಸಲು ಉದ್ದೇಶಿಸಿರುವ ರಾಜ್ಯ ಸರ್ಕಾರದ ಯೋಜನೆ ಗೊಂದಲ ಗೂಡಾಗಿದೆ. ಒಂದು ಗ್ರಾಮ ಪಂಚಾಯಿತಿ ಅಡಿಯಲ್ಲಿ ಮೂರ್ನಾಲ್ಕು ಹಳ್ಳಿಗಳಿದ್ದು, ಮಹಿಳಾ ಕೂಲಿಕಾರರು ಒಂದು ಗ್ರಾಮದಿಂದ ಮತ್ತೊಂದು ಗ್ರಾಮದ ಶಿಶು ಪಾಲನಾ ಕೇಂದ್ರಕ್ಕೆ ಆರೈಕೆಗಾಗಿ ಮಕ್ಕಳನ್ನು ಬಿಡುವುದು ಅಸಾಧ್ಯ. 3.5 ವರ್ಷದೊಳಗಿನ ಮಕ್ಕಳನ್ನು ಆರೈಕೆ ಕೇಂದ್ರದಲ್ಲಿ ಬಿಟ್ಟು ಮಹಿಳೆಯರೂ ಕೂಲಿಗಾಗಿ ತೆರಳುವುದು ಕೂಡ ಸಾಧ್ಯವಿಲ್ಲ. ಇನ್ನೂ ರಾಜ್ಯದ ಹಲವಡೆ ಯಂತ್ರೋಪಕರಣ ಬಳಸಿಯೇ ನರೇಗಾ ಕಾಮಗಾರಿಗಳು ಜರುಗುತ್ತಿರುವ ಬಗ್ಗೆ ಆರೋಪ ಕೇಳಿ ಬರುತ್ತಿರುವುದು ಹೊಸತೇನಲ್ಲ. ಹೀಗಾಗಿ ಶಿಶು ಪಾಲನಾ ಕೇಂದ್ರಗಳ ಅಗತ್ಯತೆ ಕುರಿತು ಪ್ರಶ್ನೆ ಉದ್ಭವಿಸಿದೆ. ಯೋಜನೆಯಲ್ಲಿ ನ್ಯೂನ್ಯತೆ ಕಂಡು ಬರುತ್ತಿದ್ದು, ಅಂಗನವಾಡಿಗೆ ಯೋಜನೆಯ ಮೇಲುಸ್ತುವಾರಿ ನೀಡಬೇನೆನ್ನುವ ಕೂಗು ಕೇಳೀ ಬರುತ್ತಿದೆ.
ನರೇಗಾ ಯೋಜನೆಯ ಬಲವರ್ಧನೆ ಗೊಳಿಸುವ ಉದ್ದೇಶದೊಂದಿಗೆ ಕಾಂಗ್ರೆಸ್ ಸರ್ಕಾರ ಮೊದಲ ಬಜೆಟ್ ಅಧಿವೇಶನದಲ್ಲಿ ಶಿಶು ಪಾಲನಾ ಕೇಂದ್ರಗಳನ್ನು ತೆರೆಯುವ ಕುರಿತು ಘೋಷಿಸಿತ್ತು. ಮಹಿಳಾ ಕೂಲಿಕಾರರ 3.5 ವರ್ಷದೊಳಗಿನ ಮಕ್ಕಳ ಪೋಷಣೆಗೆ ಮತ್ತು ಉದ್ಯೋಗ ಖಾತ್ರಿ ದಿನಗಳನ್ನು ಅಧಿಕಗೊಳಿಸಲು ಈ ಯೋಜನೆ ಜಾರಿಗೆ ಉದ್ದೇಶಿಸಲಾಗಿತ್ತು. ಆರಂಭದಲ್ಲಿ 1000 ಗ್ರಾಪಂಗಳನ್ನು ಆಯ್ಕೆ ಮಾಡಿದ್ದ ಪಂಚಾಯತ್ ರಾಜ ಇಲಾಖೆ ಶಿಶು ಪಾಲಕರಿಗೆ ತರಬೇತಿಯನ್ನೂ ನೀಡಿದೆ. ಈ ಮೊದಲು ಆ.15 ರಂದು ಚಾಲನೆ ನೀಡಲು ಹಲವು ಗ್ರಾಪಂಗಳಲ್ಲಿ ಯೋಜನೆ ಚಾಲನೆಗೆ ಸಿದ್ಧತೆಯನ್ನೂ ಮಾಡಿಕೊಳ್ಳಲಾಗಿತ್ತು. ಆದರೆ, ಗ್ರಾಪಂ, ತಾಪಂ ಸದಸ್ಯರ ಸಮಿತಿ, ಜಿಲ್ಲಾ ಹಾಗೂ ರಾಜ್ಯ ಮಟ್ಟದ ಸಮಿತಿ ರಚಿಸದೇ, ಸಂಪನ್ಮೂಲ ಕ್ರೂಢಿಕರಣ, ಅನುದಾನ ವಿನಿಯೋಗ ಸೇರಿದಂತೆ ಹಲವು ನಿಯಮಗಳನ್ನು ರಚಿಸದೇ ತರಾತುರಿಯಲ್ಲಿ ಯೋಜನೆಗೆ ಚಾಲನೆ ನೀಡಲು ರಾಜ್ಯ ಸರ್ಕಾರ ನಿರ್ಧರಿಸಿತ್ತು, ಈ ನಡುವೆ ಆಡಳಿತಾತ್ಮಕ ತೊಂದರೆ ಉಲ್ಭಣಿಸಿದ್ದರಿಂದ ಆ.14 ರಂದು ಸಂಜೆ ಪಂಚಾಯತ್ ರಾಜ್ ಆಯುಕ್ತಾಲಯವು ಏಕಾಏಕಿ ಎಲ್ಲ ಗ್ರಾಪಂಗಳಿಗೆ ಮೌಖಿಕ ಆದೇಶ ನೀಡಿ ಕ್ರಾರ್ಯಕ್ರಮಕ್ಕೆ ತಡೆ ನೀಡಿತ್ತು. ಸದ್ಯ ರಾಜ್ಯದ 4000 ಗ್ರಾಪಂಗಳಲ್ಲಿ ಆರಂಭಿಸಲು ಉದ್ದೇಶಿತ ಶಿಸು ಪಾಲನಾ ಕೇಂದ್ರಗಳ ನಡವಾಳಿಗಳನ್ನು ರಾಜ್ಯ ಸರ್ಕಾರ ಬಿಡುಗಡೆ ಮಾಡಿದೆ. ಗ್ರಾಪಂ, ತಾಪಂ ಜವಾಬ್ದಾರಿ ಮತ್ತು ಅನುದಾನ ವಿನಿಯೋಗ ಸೇರಿದಂತೆ ಹಲವು ಮಹತ್ವದ ನಡಾವಳಿ ಸೂಚಿಸಿರುವ ರಾಜ್ಯ ಸರ್ಕಾರ ಸರಾಸರಿ 1 ಲಕ್ಷ ರೂ. ವೆಚ್ಚದಲ್ಲಿ ತಲಾ ಶಿಶುಪಾಲನಾ ಕೇಂದ್ರಗಳನ್ನು ತೆರೆಯುತ್ತಿದೆ.
