ಕಾರವಾರ: ಶಿರೂರು ಗುಡ್ಡ ಕುಸಿತದ ಪರಿಣಾಮ ಗಂಗಾವಳಿ ನದಿಯಲ್ಲಿ ಸಿಲಕಿರಬಹುದಾದ ಮೂವರ ಮೃತ ದೇಹಗಳು, ಲಾರಿ ಹಾಗೂ ಇತರ ಅವಶೇಷಗಳನ್ನು ತೆರವು ಮಾಡಲು ಆಗಸ್ಟ್ 3 ಹಾಗೂ 4 ರಂದು ಕಾರ್ಯಾಚರಣೆ ನಡೆಸಲು ಯೋಜನೆ ರೂಪಿಸಲಾಗಿದೆ.
ಆಗಸ್ಟ್ 4 ರಂದು ಅಮಾವಾಸ್ಯೆ ಇದ್ದು, ಸಮುದ್ರದ ಉಬ್ಬರ, ಇಳಿತದ ಪರಿಣಾಮ ಗಂಗಾವಳಿ ನೀರಿನ ಹರಿವು ನಿಧಾನವಾಗುವ ಸಾಧ್ಯತೆ ಇದೆ. ಆ ಸಂದರ್ಭದಲ್ಲಿ ಕೇರಳದಿಂದ ಡ್ರಜ್ಜಿಂಗ್ ಯಂತ್ರ ತಂದು ಕಾರ್ಯಾಚರಿಸಲು ಯೋಜಿಸಲಾಗಿದೆ ಎಂದು ಶಾಸಕ ಸತೀಶ ಸೈಲ್ ತಿಳಿಸಿದರು.
ಅಲ್ಲಿ ಲಾರಿ, ಮೃತ ದೇಹಗಳು ಇರುವ ಸಾಧ್ಯತೆ ಇದೆ. ಅಪಾರ ಕಲ್ಲು, ಮಣ್ಣು, ಮರದ ಸೇರಿಕೊಂಡು ನೀರಿನ ಹರಿವಿಗೆ ಅಡಚಣೆಯಾಗಿದೆ. ಅವಶೇಷಗಳನ್ನು ತೆಗೆಯುವ ಜತೆಗೆ ನೀರಿನ ಹರಿವಿಗೆ ಅನುಕೂಲ ಮಾಡಿಕೊಡುವ ಅವಶ್ಯಕತೆ ಇದೆ. ಆ ನಿಟ್ಟಿನಲ್ಲಿ ಪ್ರಯತ್ನ ಮಾಡಲಾಗುವುದು ಎಂದು ಸೈಲ್ ತಿಳಿಸಿದರು.
