ಕಾರವಾರ: ಶಿರೂರು ಗುಡ್ಡ ಕುಸಿತ ಸ್ಥಳದಲ್ಲಿ ನಾಪತ್ತೆಯಾದವರ ಶೋಧ ಕಾರ್ಯಾಚರಣೆಯನ್ನು ಜಿಲ್ಲಾಡಳಿತ ಬಂದ್ ಮಾಡಿರುವುದಕ್ಕೆ ಕೇರಳ ಸರ್ಕಾರ ತೀವ್ರ ಆಟ್ಷೇಪ ವ್ಯಕ್ತಪಡಿಸಿದೆ.
ಗಂಗಾವಳಿ ನದಿ ನೀರಿನ ಹರಿವು ಅತಿ ವೇಗವಾಗಿ ಇರುವ ಕಾರಣ ಜಿಲ್ಲಾಡಳಿತ ಭಾನುವಾರ ಮಧ್ಯಾಹ್ನದಿಂದ ಕಾರ್ಯಾಚರಣೆ ಸ್ಥಗಿತ ಮಾಡಿತ್ತು. ಬೆಳಗಾವಿಯಿಂದ ಆಗಮಿಸಿದ ಮರಾಠಾ ಲೈಟ್ ಇನೆಂಟರಿ ಸೈನಿಕರು, ನೌಕಾನೆಲೆ ಮುಳುಗು ತಜ್ಞರು ಮರಳಿದ್ದಾರೆ. ಎನ್ಡಿಆರ್ಎಫ್, ಎಸ್ಡಿ ಆರ್ಎಫ್ ಅಂಕೋಲಾದಲ್ಲೇ ಇದ್ದರೂ ಸೋಮವಾರ ಕಾರ್ಯಾಚರಣೆಗೆ ಇಳಿಯಲಿಲ್ಲ.
ಅಂಕೋಲಾದಲ್ಲೇ ಬೀಡು ಬಿಟ್ಟಿದ್ದ ಕೇರಳ ಕಲ್ಯಾಶೇರಿ ಶಾಸಕ ವಿಜಿನ್, ತ್ರಿಕರಪುರ ಶಾಸಕ ರಾಜಗೋಪಾಲನ್ ಜಿಲ್ಲಾ ಉಸ್ತುವಾರಿ ಸಚಿವ ಮಂಕಾಳ ವೈದ್ಯ, ಶಾಸಕ ಸತೀಶ ಸೈಲ್ ಹಾಗೂ ಜಿಲ್ಲಾಽಕಾರಿ ಕೆ.ಲಕ್ಷ್ಮೀಪ್ರಿಯಾ ಅವರನ್ನು ಭಾನುವಾರ ಭೇಟಿಯಾಗಿ ಅಸಮಾಧಾನ ಹೊರ ಹಾಕಿದರು. ಪತ್ತೆಯಾದವರ ಅವಶೇಷಗಳು ಸಿಗುವವರೆಗೂ ಯಾವುದೇ ಕಾರಣಕ್ಕೂ ಕಾರ್ಯಾಚರಣೆ ನಿಲ್ಲಿಸಬಾರದು. ಆದರೆ, ಕಾರ್ಯಾಚರಣೆ ನಿಲ್ಲಿಸುವ ಬಗ್ಗೆ ಏಕೆ ಮಾಹಿತಿ ನೀಡಿಲ್ಲ ಎಂದು ಪ್ರಶ್ನಿಸಿದರು.
ಸ್ಥಳೀಯರಾದ ಜಗನ್ನಾಥ ನಾಯ್ಕ, ಲೋಕೇಶ ನಾಯ್ಕ ಅವರ ಪತ್ತೆಯಾಗಬೇಕಿದೆ. ಅರ್ಜುನ್ ಕೇರಳದವರಾದ ಕಾರಣ ಮುಖ್ಯಮಂತ್ರಿ ಪಿಣರಾಯಿ ವಿಜಯ್ ಅವರು ಕರ್ನಾಟಕ ಸರ್ಕಾರಕ್ಕೆ ಪತ್ರ ಬರೆದಿದ್ದಾರೆ ಎಂದು ಶಾಸಕ ವಿಜಿನ್ ತಮ್ಮ ಆಕ್ಷೇಪಣೆ ವ್ಯಕ್ತಪಡಿಸಿದ್ದಾರೆ ಎಂದು ಸ್ಥಳದಲ್ಲಿದ್ದ ಸಿಪಿಐಎಂ ಜಿಲ್ಲಾ ಕಾರ್ಯದರ್ಶಿ ಯಮುನಾ ಗಾಂವಕರರ್ ಮಾಹಿತಿ ನೀಡಿದ್ದಾರೆ.
