ಹಿಂದು-ಮುಸ್ಲಿಂ ಸಾಮರಸ್ಯದ ಪ್ರತೀಕವಾಗಿ ಮಠದ ಗೋಪುರಗಳಲ್ಲಿ ಹಸಿರು, ಕೇಸರಿ ಧ್ವಜಗಳು ರಾರಾಜಿಸುತ್ತವೆ. ಮಸೀದಿಯಲ್ಲಿ ನಿತ್ಯ ನಗಾರಿ, ಟಿಕೊರಿ, ತಾಳ, ಕರಣಿ, ಸನಾದಿ ಪಂಚವಾದ್ಯಗಳ ನಿನಾದ ಕೇಳುತ್ತವೆ.
ಪೀಠಾಧಿಪತಿ ಜಗದ್ಗುರುಗಳ ವಸ್ತ್ರ ಮತ್ತು ಆಭರಣಗಳು ಉಭಯ ಧರ್ಮದ ಶೈಯಲ್ಲಿವೆ.
ಮಠದ ಜಾತ್ರೆಯ ಸಂದರ್ಭದಲ್ಲಿ ಮೈಸೂರು ಮಹಾರಾಜರು ಕಾಣಿಕೆಯಾಗಿ ನೀಡಿದ ಶಿರಪೇಚು, ಪೋಚಿ, ರತ್ನದ ಹಾರ, ದಿಲ್ಲಿ ಬಾದಶಹ ನೀಡಿದ ಕಠಾರಿ, ರಣಬಿಲ್ಲೆ, ಶಲ್ಯ, ಸಿಕ್ಕೆಗಳನ್ನು ಶ್ರೀಗಳು ಧರಿಸುತ್ತಾರೆ. ಹಾಗೆಯೇ ಆನೆ, ಒಂಟೆ, ಕುದುರೆಗಳು ಮಠಕ್ಕೆ ಮೆರುಗು ನೀಡುತ್ತಿವೆ.
ಶಿರಹಟ್ಟಿ ಸಂಸ್ಥಾನಮಠದ ಪರಂಪರೆಯಲ್ಲಿ ಈವರೆಗೆ ೧೨ ಪೀಠಾಧಿಪತಿಗಳು ಆಗಿ ಹೋಗಿದ್ದಾರೆ. ಸದ್ಯ ೧೩ನೇ ಪೀಠಾಧಿಪತಿ ಜ. ಫಕೀರಸಿದ್ಧರಾಮ ಶ್ರೀಗಳು ಮಠದಲ್ಲಿ ಅನೇಕ ಜೀರ್ಣೋದ್ದಾರ ಕಾರ್ಯಗಳನ್ನು ಕೈಗೊಂಡಿದ್ದಾರೆ.
ಶ್ರೀಮಠವು ಉತ್ತರ ಕರ್ನಾಟಕ ಭಾಗದ ವಿವಿಧೆಡೆ ೬೦ಕ್ಕೂ ಹೆಚ್ಚು ಶಾಖಾ ಮಂದಿರಗಳು ಹಾಗೂ ೮ ಶಾಖಾ ಮಸೀದಿಗಳನ್ನು ಹೊಂದಿದೆ. ಸಂಸ್ಥಾನಮಠದಿಂದ ಐದು ಪ್ರೌಢಶಾಲೆಗಳು ಕಾರ್ಯ ನಿರ್ವಹಿಸುತ್ತಿವೆ.
